Moix baez ngeix daengz gienh saeh fatseng youq seiz roengzdangz, gou couh roxnyinh najmong fouzbeij.

Seizhaenx gou lij doeg haj nienzgaep. Ngoenz ndeu banhaet, mbwn gvengqcagcag, ndit ronghsagsag, rumz ci liengzfifi. Roengzdangz daihngeih gou iu geij boux doengzhag bae baihlaeng gyausiz dik lwggienq, dik ndaej geij baez, dou cungj naeuz gij dieg neix gaeb lai, dik mbouj sangj, ndigah dou couh doxiu bae gwnz daizheiq dik. Dah’ingj muengz naeuz:“Mbouj baenz mbouj baenz, lauxsae gangj gvaq, gizhaenx miz vunz lai, danghnaeuz dou bae gizhaenx dik couh yungzheih deng bouxwnq.” Gou mbouj haeujsim dwk naeuz:“Yawj mwngz, ngeix ndaej baenzlai, mbouj lau, raeuz dik yaep he couh roengzdaeuj.” Gangj sat, dou couh buet hwnj gwnz daizheiq bae lo.

Gwnz daizheiq miz geij boux lwgnyez cingq guhcaemz. Gou angq raixcaix, gizneix gvangqraeuh dik lwggienq gig simhai. Sawqmwh, lwggienq mbin coh gyoengq lwgnyez haenx, gou lau swhgeij dik mbouj ndaej, couh iet ga gvaqbae dik…… Va vu…… ok saeh le, byawz ngeix daengz gou mbat iet ga couh dik deng boux lwgnyez daenj buhhenj, de in ndaej daejnganga, dou gipmuengz buet gvaqbae yawj. Yw! gvaengzda dah- nyez neix lae lwed lo, baenzlawz guh cij ndei ne? Gou doq bae ra lauxsae daeuj. Doeklaeng lauxsae hawj dou sien bae hwnjdangz, de daiq dahnyez haenx bae yihyen yawj canghyw. Gou caeuq bohmeh gou doeklaeng daiq saenzcingz daengz ranz dahnyez neix bae yawj de.

Itcig daengz seizneix, gvaengzda dahnyez haenx lij miz gij biuj gou dik. Gou ienqhoij dangqmaz, ndawsim gag naeuz: Gou seizhaenx dingq dah’ingj yienq cij deng, mbouj wngdang……

Gienh saeh neix gvaqbae ndaej geijcib bi lo, hoeng, seizneix gou lij geiq ndaej gig cingcuj, gienh saeh neix hawj gou rox miz gij vah yienq aeu dingq haeuj rwz, mboujnex rox ok saeh hung.