Daegcaiz caen siengj mbouj doeng, Daegvang vihmaz bienqbaenz yienghneix ged.

Ngoenzlwenz, Daegcaiz bang lansai de ra cienzhag, bae ranz Daegvang ciq cienz. Daegvang baez dingqnyi lansai Daegcaiz gauj hwnj dayoz, song da doq byaengq hai ronghsag:“Caen ha?” Riengzlaeng youh angqvauvau naeuz, “Hohheij hohheij! Lansai mwngz dwg aen mbanj raeuz boux daih’it gauj hwnj dayoz, hawj mbanj raeuz ceng aeu naj lo.” Gwx yaep he, de youh mbe hai song faj fwngz, ngauz gyaeuj naeuz:“Caen mbouj doiqseiz, gij cienz gou cungj dawz bae cawx giuz makgai caez lu.”

Daegcaiz ma daengz ndaw ranz gag nyapswdswd. Daegvang baezgonq mbouj dwg vunz yienghneix. Daegcaiz caeuq Daegvang daj seiz lij daenj vaqbengh couh guhdoih guhcaemz, vet conghlae、mbon rongzroeg caemhcaiq lij lohgengz lohgangh bae caemx raemx, song vunz caenmaed lumj song beixnuengx. Daj siujyoz doegsaw daengz cuhcungh, song boux hix caemh hag caemh ban. Cuhcungh doeg sat le, song boux doxdoengz mbouj bae hag, youh caiq doxcaemh okrog bae dajgoeng. Bingzseiz miz maz hojnanz, songde cungj doxbang doxcoengh. Daegcaiz mizseiz bungq daengz ndaw ranz yungh cienz gaenj, cam Daegvang ciq cienz, Daegvang soqlaiz mbouj yaemhywx saek baez. Byawz liuh, baezneix lansai de gig mbouj yungzheih gauj hwnj dayoz, cam de ciq cienz gip yungh, de cix baenzneix saepnaep. Daegcaiz baenzlawz mbouj yiemzmbwq Daegvang ne.

Vunzmbanj byawz mbouj rox, ranz Daegvang miz cienz. Daj Gvuengjdoeng dauqma ranzmbanj, Daegvang couh co 10 moux diegndoi ndaem makgai. Geij bi daeuj, bibi cungj canh ndaej geij fanh maenz cienz. Bonjlaiz Daegcaiz hix miz di cienz, caen dwg ranz laeuh deng fwnraq, daxbeix de song ndwen gonq deng ci bungq laemx, hwet raek bae, yw bingh yungh caez gij cienzrom beixnuengx song ranz, ndaw ranz seizneix couh lumj rek byaek venj daujdingq——hoengqvatvat. Sousou liemxliemx cij comz ndaej 3000 maenz, liz fanh maenz cienzhag lij ca 7000 dem. Cam vunzmbanj ciq? Gaej naemj lo, gizdieg neix caenh did rinbya mbouj did gohaeux, naz rengx reih noix, binaengz haeuxgwn ngamq gaeuq ciengx dungx, ranzlawz miz cienzrom ciq hawj mwngz? Ndaw mbanj caenh dwg Daegvang uk gvai dungx raeh rom ndaej cienz ndwi lo, hoeng de cix gig saejheiq. Daegcaiz gag danqheiq, vunz ha, yied miz cienz yied ndaengngaeu. Daegcaiz vih ra cienzhag gienh saeh neix gip dwk lumj maet haeb caekhaex nei saet hwnj saet roengz.

Gvaq geij ngoenz, Daegvang yamq haeuj ranz lansai Daegcaiz daeuj, naeuz:“Gou ndaejnyi vunz naeuz, gwnz haw miz ranz bouqdiemq ndeu soucawx makitvaiz bae oemq laeuj, gaen 10 maenz. Mwngz liz bae hagdangz lij miz ndwen lai dem, mboujyawx haeuj ndoi mbaet makitvaiz dawz bae gai, rom guh cienzhag.”

Daegcaiz it di hix mbouj yawj hwnj da, gijneix miz maz citgeiz, makitvaiz ndaw bya baenz dong baenz rangh, dij maz cienz? Seiz lwgnyez, de caeuq Daegvang mbaet gwn dwk dungxsiq bae. Giz dieg neix, maz cungj mbouj miz, hoeng makndoi cix rim lueg rim bya. Caiqnaeuz, bya dat ndoi lingq, lansai de daj iq couh youq hagdangz doegsaw, naj hau noh oiq, baenzlawz guh ndaej gij hong naek neix? Daegcaiz nyinhnaeuz Daegvang mbouj ciq cienz hawj vunz le gag simhaw, yungh gij saeh neix daeuj lox vunz. Daegcaiz engq huj Daegvang lo. Hoeng, lansai Daegcaiz cix sim’angq raixcaix, ngoenz daihngeih couh aemq loz haeuj bya bae lo. Daegcaiz ngauz gyaeuj ndiengndieng.

Banhaemh, Daegcaiz yawjraen lansai aemq byongh loz makitvaiz naiqnueknuek yamq haeuj ranz, aen naj caeuq fan gen deng oen coeg em heh, valoekloek; aen naj deng ndit cik dwk hoengzbyoengbyoeng. Daegcaiz raen cojgvaq lai, sim’in dwk naeuz:“Bae baenzngoenz cij mbaet ndaej geij gaen makitvaiz, dwgrengz lai, mbouj bae suenq lo, comz mbouj gaeuq cienzhag mbouj hwnj dayoz hix mbouj dai vunz.” “Mbouj!” Lansai de sing hung naeuz, “Gou baenzbaenz cungj aeu bae. Gou mbouj naetnaiq, ngoenzcog caiq bae!” Doq hemq doq siengsim dwk raemxda youq gvaengzda baenq bae baenq dauq, couhdwg mbouj hawj rihbyoegbyoeg.

“Yienghneix couh deng lo.” Daegvang mbouj rox seizlawz haeuj ranz daeuj, riuhoho doiq lansai Daegcaiz naeuz:“Ngamq guh hong cungj miz di naiq, vunz guh hong yied guh yied mizrengz, gvaq geij ngoenz couh ndei lo, gaej doeknaiq, menhmenh guh.” Gangj sat, Daegvang youh lwnh lansai nyi, aen bya lawz miz makitvaiz lai, aen bya lawz yungyiemj lai, daengq de re ngwz re doq. Lij son de baenzlawz mbaet mak cij yungh- rengz noix, baenzlawz aemq loz cij mbouj haed mbaq. Lansai Daegcaiz dingq ndaej gig nyinhcaen, ngaek- gyaeuj dedded.

Couh yienghneix, lansai Daegcaiz gyangngoenz bae mbaet makitvaiz, ngoenz daihngeih daxmeh de soengq bae bouqdiemq. Mehlwg roengzrengz guh hong, ciemh ngoenz ciemh mbaet ndaej lai. Doeklaeng, lienz Daegcaiz hix youq mbouj onj lo, caemh hwnj bya bae bangfwngz. Sam boux vunz caez okrengz, yaek daengz ngoenz bae hag, fanh maenz cienzhag cungjsuenq comz ndaej gaeuq lo. Soengq lansai hwnj ci bae hag seiz, raen lansai yienznaeuz vunz bienq ndaem bienq byom, hoeng naj hai lumj mbwn’o ronghcingx, cingsaenz gvaekgvaek, Daegcaiz sim soeng haujlai. Danh- seih, baez ngeix daengz Daegvang mbouj ciq cienz hawj lansai, de lij hozgaek gedged.

Lansai naengh ci bae gyae lo. Daegcaiz raen mbwn lij caeux, couh byaij haeuj aen diemq lauxdoengz de bae cejgoj. Yi! Ndaw bouq lauxdoengz doi miz makitvaiz, lauxdoengz guh ienlaeuj seng’eiq, seizlawz hix sou makitvaiz ni? “Mwngz mbouj rox ha?” Raen Daegcaiz miz di doeksaet, lauxdoengz naeuz, “Gij makitvaiz neix, dwg Daegvang heuh gou bang de sou hane. Gou hix mbouj rox de guh maz mingzdangz, gunghcangj sou hawj 10 maenz, de hix sou 10 maenz, neix mbouj dwg guh siedbonj seng’eiq maz? ”

Laxlawz Daegvang yienghneix daeuj bangcoengh lansai de. Daegcaiz mingzbeg lo: Yienghneix guh, cij aeueiq lwgnyez, youh muzlienh gij ceiqheiq lwgnyez. Daegvang caen mizsim lo.

Sawqmwh, Daegcaiz roxnyinh gvaengzda ndatndumndum.