“Yiemh gungj ciengzngauh sang, roenbenjrin bu doh; cien heu vax mong doq, Cungduenz rox okmingz.” Hot fwen haprwenz yinxvunz ndeu eu ok le gij yiengh gaeuqgeq gyaeundei Mbanjcungduenz Fucang Cunh Cinlungz Cin Bingznanz Yen. Aen mbanj iq neix ranz gaeuq baenz benq, cien heu vax mong, gwnz liengz gwnz saeu gaekdeu doz gyaeu、gwnz ciengz veh miz veh lengj、luengqhongh vangraeh daengjsoh doxdoeng, Ranzdafuh、Ranzduhgun daengj ranz gaeuq louzce ndaej haemq ndei, gyuemlongz miz cungj heiq swhyienz sohswd ndeu. Bi 2016 ndwen 11, mbanj gaeuq Mbanjcungduenz ndaej lied haeuj Guengjsae raeuz buek daih- ngeih aenmbanj conzdungj.

Mbanjcungduenz dieg youq baihsaenamz Cinlungz Cin, aenmbanj youq Ciuhmingz Gyahcing nienzgan hainduj hwnjguh, gaenq miz seiq bak lai bi lizsij. Ndaw mbanj daj Ciuhcingh Ganghcih nienzgan hainduj couh lienzdaemh miz vunz youq gwnz ciengzgohgij aeundaej goengmingz, gonqlaeng miz geijcib vunz gaujhwnj siucaiz、gunggij daengj. Geij bak bi daeuj daengx mbanj gungh guh miz 70 lai aen ranz gaeuq seiz Ciuhmingz Ciuhcingh, aenranz doxcomz baenz benq, ciengzngauh daengjsoem yiemhranz gungjngaeu, ranzrwzho yiengh daegbied, deufaex、deurin、deucien yienghsiengq gyaqciq. Ndawde louzce ndaej haemq ndei dwg Ranzdafuh caeuq Ranzduhgun, song aen ranz doxliz mbouj gyae, funggek dajcaep doxdoengz, cungj dwg yiengh ranzrwzho cien heu vax mong、saeu liengz gaekdeu、caep ndoen yiemh gungj haenx; gwnz ciengz laj yiemhranz, aeu ciendeu caeuq bitveh lai saek caep baenz fuk dem fuk dozveh gyaeundei, miz gingj huz saek bya gyaeundei, miz giz doz gova caznywj duznon duzbya, gak cungj gak yiengh, yawj bae lumj lix nei lij doenghyebyeb, vih ndaw hongh demlai le cungj yinxdaeuz mbouj doxdoengz ndeu. Gij doz neix ndawde moix fuk cungj hamz miz aen goj ciuhgeq ndeu, fungcingz yinzvwnz gauhyaj caemhcaiq hamzeiq laeglwd. Byaij haeuj ndaw gyang mbanj gaeuq, caenh raen baenz diuz baenz diuz luengqhongh miz raez miz dinj、gvangq miz roek cik aeu rinbyahoengz bu baenz haenx vangraeh camca iet gvaq seiqlengq lienz daengz bakdou gak ranz, yienh’ok gij rizgeq ronghlwenq gaxgonq aenmbanj.

Cawz ranz gaeuq gyaeundei le, ndaw mbanj feihvuzciz vwnzva yizcanj lai cungj lai yiengh, moix bi liggaeuq ndwensam、ndwengouj caeuq ndwencieng, ndaw mbanj cungj guh miz foux saeceij daengj minzsuz hozdung, daengx mbanj ranzranz caeuqfaenh, hawj gij minzsuz hozdung neix daihdaih swnjcienz, hoenghvuengh daengx mbanj.

Daj bi 2015 gvaqdaeuj, vunzmbanj youq bouxguhdaeuz daiqdoengh lajde, gak ranz gag sousib cingjcoih ndei ranzgaeuq, mbangj vunzlaux caemh dawz gij doxgaiq gaeuq okdaeuj roxnaeuz bonj geiqloeg yiengh aenmbanj goj aenmbanj okdaeuj bangcoengh hong dajcoih, caezsim aeu gij hengzdoengh bonjfaenh daeuj henhoj faenh “huqbauj” ciuhgeq louz roengzdaeuj neix, caemhcaiq dawz gij ranzgaeuq ndaw mbanj caeuq gij gingjyawj minzsuz daegsaek mbanj henzgyawj giethab hwnjdaeuj hwngfat hongsaeh lijyouz, daiqdoengh vunzmbanj byaij hwnj roen baenz fouq.