Lanz Beizvwnz, bineix ndaej 23 bi, vunz Yinhcwngz Yen, bouxdoigvangq gij vwnzva Mancuengh ndeu. Youq bienqbaenz bouxdoigvangq gij vwnzva Mancuengh gaxgonq, Lanz Beizvwnz dwg hag ciennieb yw doenghduz, bizyez le de bae Guengjdoeng gai yw gvaq, hoeng, doeklaeng raen bonjfaenh doiq vwnzva Mancuengh engq miz yinx, couh mbouj guh dauqma ranz riengz gobiuj ginghyingz bouq gai Mancuengh. Ginggvaq byongh bi damqra gvaqlaeng, Lanz Beizvwnz youq gwnz giekdaej gunghyi Mancuengh, dajveh haujlai doxgaiq miz cauxeiq miz yinx, lumjbaenz vwnzgi、goenhsoij、ndangdaenj gij doxgaiq yungh Mancuengh daeuj guh neix, hawj gij Mancuengh gaxgonq mbouj miz vunz cawx haenx bienqbaenz doxgaiq mbouj doh gai. Doiq coglaeng, de naeuz yaek laebdaeb doigvangq Mancuengh, hawj engq lai vunz roxyiuj gij yinxdaeuz cungj vwnzva neix.

De dwg hag canghywdoenghduz, cix gyaezhwnj Mancuengh

Ranz Lanz Beizvwnz miz ciengzdajciengx, de daj aen ciennieb yw doenghduz Yozyen Gisuz Cizyez Nungzyez Guengjsae bizyez, yienzbonj dajsuenq bizyez le couh dauqma ranz bang hong, hoeng, bizyez le youh gietdingh okrog bae roemxroemx gonq, lienhlienh bonjsaeh. Bi 2014, de youq Guengjdoeng gai yw, bi seizgan ndeu, Lanz Beizvwnz yienznaeuz hag ndaej haujlai doxgaiq, hoeng cix mbouj raen haengjheiq caeuq roxnyinh miz cingzcik, “ndawsim gag raen faenh hong neix mbouj hab bonjfaenh.” Lanz Beizvwnz naeuz. Bi 2015 codaeuz, Lanz Beizvwnz dauqma ranz, aenvih vunz ndaw ciengzdajciengx ranz de gaenq doh lo, ndigah de couh naemj daengz, bonjfaenh rox daemj di Mancuengh, yienghneix de hixnaengz caeuq gobiuj doxcaez ginghyingz bouq gai Mancuengh.

Lanz Beizvwnz daj iq couh caeuq bouxgeq ndaw ranz youq, yawj gyoengqde baenzlawz daemj Mancuengh、siuqva、eu fwen, dingq gvenq yawj gvenq le, hix roxyiuj caeuq dawzndei mbangjdi dinfwngz lo, doeklaeng gobiuj youh bang sonyinx, mboengq seizgan ndeu hag rox daemj Mancuengh. Lanz Beizvwnz lij geiq ndaej fan Mancuengh daih’it de gag daemj haenx, raez miz 30 lizmij baedauq, daengx fan yawj hwnjdaeuj cocat mbouj bingz, hoeng couhdwg fan Mancuengh cocat mbouj bingz neix, hawj Lanz Beizvwnz roengz gietsim caeuq gobiuj doxcaez laebdaeb ginghyingz aenbouq. “Aenvih gyoengq bouxgeq yawjraen dou bouxcoz daemj Mancuengh, cungj angq dangqmaz, naeuz bouxcoz hagrox dinfwngz, couh ndaej cienz roengzbae lo.” Lanz Beizvwnz naeuz. Mwhhaenx youq henz de, gij vunz lumj de bae hag daemj Mancuengh haenx haemq noix, bouxgeq haeujcoengh, hawj de engq- gya miz cwzyinganj lo, hix hawj de engq maij Mancuengh lo.

Mancuengh “mbouj miz vunz cam”, dauq ranz cauhnieb deng saetmuengh

Daj bi 2015 ndwen 4 hainduj, Lanz Beizvwnz cingqsik caeuq gobiuj doxcaez ginghyingz bouq gai Mancuengh, hoeng gij Mancuengh gyoengqde cengdi cungj mbouj miz saek di gai ndaej okbae, neix hawj Lanz Beizvwnz yienzbonj gig miz saenqsim naemj cauhnieb roxnyinh maezvaeg simnyap, “miz saek sam seiq ndwen seizgan, mbouj miz vunz daeuj cawx doxgaiq. ” Lanz Beizvwnz naeuz. Ngamq hainduj, de laihnaeuz dwg fuengfap ginghyingz mbouj baenz, ndigah couh aeu gij Mancuengh daemj ndei haenx daengz ranz beixnuengx youq henzgyawj gingjgih haenx bae gai, doeklaeng cij miz sam seiq boux hekyouz daeuj cam, cam liux le couh liux lo. Youq mwh caeuq hekyouz doxgyau, Lanz Beizvwnz raen gyoengqde cam ceiq lai dwg, gij doxgaiq neix dauqdaej aeu daeuj guh gijmaz?

Lanz Beizvwnz raen, gij Mancuengh gyoengqde daemj haenx yienznaeuz gyaeundei, hoeng dan miz sam gaiq gaeuq, couhdwg baengzdemhninz、nda、najdenz. Seizneix gwnzbiengz hwngfat baenzneix vaiq, gig noix miz vunz aeu yungh sam gaiq gaeuq neix. Yienghneix, Lanz Beiz- vwnz couh naemj guh saek di doxgaiq wnq. Gig vaiq, Lanz Beizvwnz caeuq gobiuj de couh yungh Mancuengh guh le song aen daehraek iq, daengx aen daehraek aeu baengzfaiqmaz daeuj guh, Mancuengh guh dajcang. Miz di dungxcieg, Lanz Beizvwnz aeu song aen daeh iq neix bae gwnzhaw gai, liuh mbouj daengz gig vaiq couh gai ok aen ndeu, aen lw roengzdaeuj haenx, Lanz Beizvwnz sij mbouj ndaej gai lo, aenvih neix dwg gij doxgaiq de baez daih’it gag guh okdaeuj, de naemj ce roengzdaeuj guh geiqniemh.

Angqguh cauxeiq, gij doxgaiq Mancuengh de mbouj doh gai lo

Cimz daengz gij ndeicawq aendaeh daiqdaeuj le, Lanz Beizvwnz caeuq gobiuj de sikhaek hainduj dajveh guh gij doxgaiq Mancuengh miz cauxeiq haenx, caemhcaiq guh’ok le baenzdauq doxgaiq miz cauxeiq. Youq gwnz dajveh fuengmienh, Lanz Beizvwnz gaijbienq gij dajveh doenghbaez aeu Mancuengh guh cawj、aeu liuhbaengz guh bouj haenx, dauqfanj dwg aeu liuhbaengz、gij doxgaiq wnq guh cawj, Mancuengh guh bouj. Lumjbaenz, geu buhlungxheiz he, danghnaeuz cungj dwg Mancuengh, yawj hwnjdaeuj couh bizbwdbwd、mbouj daihfueng, hoeng danghnaeuz yungh Mancuengh daeuj guh cangdiemj di, couh yienh’ok daegsaek minzcuz caeuq gij gyaeundei bonjfaenh lo.

Riengz cungjloih doxgaiq gyalai, aenbouq Lanz Beizvwnz caeuq gobiuj de ginghyingz haenx hainduj hawj vunzlai sugrox, gij doxgaiq gyoengqde gai haenx dingzlai cungj dwg yiengh gyaeu gyaq cienh, cijaeu miz doxgaiq moq gai, gig vaiq couh ndei gai vanzlij mbouj doh gai. Youq mwh ginggvaq neix, Lanz Beizvwnz lij hwngfat le aen vunqsik ginghyingz gauhdonh dinghguh neix, couhdwg ei gij iugouz bouxcawx daezok haenx daeuj cienmonz guh doxgaiq, lumjbaenz mbangjdi bouxcawx maij gwn caz, couh daeuj ra de guh baenzdauq gaiq demh cenjcaz caeuq baengzdaiz, Lanz Beizvwnz couh ei gij iugouz bouxcawx daeuj guh dajveh daegbied.

Aenvih youq doigvangq gij vwnzva Mancuengh haemq roengzrengz, Lanz Beizvwnz caeuq gobiuj de ndaejdaengz cwngfuj dangdieg haeujsim, youq bi 2015 satbyai, song boux de ndaej aen ciengzdieg mbouj aeu cienz gvendaengz bumwnz daezhawj ndeu, aen ciengzdieg neix youq henzgyawj lijyouz gingjgih mizmingz dangdieg ranz banhgoeng hakdoj singq Moz haenx, cujyau dwg hawj gyoengqde baij caeuq daemj Mancuengh. Aenvih youqgyawj lijyouz gingjgih, haujlai hekyouz cungj bae dieg baij Mancuengh gyoengqde yawjyawj, neix hix vih gyoengqde doigvangq Man- cuengh hai ok le diuzroen moq.

Eu fwen hwnjdaeuj, de yaek laebdaeb doigvangq gij vwnzva Mancuengh

Seizneix, Lanz Beizvwnz gaenq caeuq gobiuj de laebbaenz aen gunghswh doigvangq vwnzva, caemhcaiq ciusou le buek mehmbwk ndeu daeuj daemj Mancuengh, Lanz Beizvwnz mboujdan son gyoengqde baenzlawz daemj Mancuengh mbouj aeu cienz, lij bang gyoengqde gai gij Mancuengh gyoengqde gag daemj okdaeuj haenx. Vihliux engqgya gyaak bonjfaenh, aeu engq lai yenzsu yungzhaeuj cauxeiq dajveh bae, Lanz Beizvwnz dauqcawq byaij cunz hagsib, roxyiuj swnghcanj yenzsu moq caeuq gij daegdiemj minzcuz vunznoix wnq. Lanz Beizvwnz mboujdan maij daemj Mancuengh, lij maij eu fwen, mwh youq Aen Yozyenz Gisuz Cizyez Nungzyez Guengjsae hwnjhag, de couh aeundaej gij cwngheuh fwenvuengz Guengjsae——daihhingz fwen doxdax gvaq lo. Miz seiz okrog bae caeuqfaenh mbangjdi aenhoih doigawj doxgaiq roxnaeuz aenhoih baijgai, Lanz Beizvwnz couh eu hot fwen ndeu, yinx vunzlai haeujsim.

Dauqngeix mwh ngamq hainduj cauhnieb, Lanz Beizvwnz naeuz, bonjfaenh youq diuzroen Mancuengh cauxeiq ndaej baenz, dwg aenvih ndaejdaengz bangeq yingjyangj. De lwnh gicej, youq henzgyawj ranz banhgoeng hakdoj singq Moz, miz buzgeq bi’ndwen ndaej 92 bi ndeu, buzgeq neix ngoenznaengz cungj haidou youq ranz daemj Mancuengh, buzgeq maqmuengh yungh cungj fuengsik neix, yinx hekyouz haeuj ranz bonjfaenh bae, hawj gyoengqde roxyiuj gij vwnzva Mancuengh. Buzgeq lij ngoenznaengz cungj bae dieg baij Mancuengh gyoengqde yawjyawj, caemhcaiq riu naeuz de yaek dai lo, yaek aeu aen congzrok ndaw ranz bonjfaenh soengq hawj Lanz Beizvwnz, hawj gyoengqde laebdaeb doigvangq gij vwnzva Mancuengh.

“Ndawsim gou gizsaed gig saenqdoengh, roxnyinh daengz gij cwzyin gwnz mbaq naek raixcaix.” Lanz Beizvwnz naeuz. De dajsuenq ciep roengzdaeuj, youq gwnz giekdaej gaeuq, laebdaeb guh doxgaiq Man- cuengh cauxeiq, doengzseiz byaij diuzroen gveihmozva, yungh engq lai seizgan caeuq rengz daeuj ginghyingz. “Ngoenznaengz cungj caeuq Mancuengh caezyouq, ndawsim gig angqyangz gig rimhoz, hix roxnyinh gig miz cingzcik.” Lanz Beizvwnz naeuz. De raen cijaeu ndaej guh gij saeh bonjfaenh maij, couhcinj yungh geijlai seizgan hix raen dijndaej, hix mbouj raen baeg.