Guengjsae Bingzgoj Yen miz aen suijgu geizheih ndeu, heuhguh Daemzlingz Suijgu. Gyoengqvunz bonjdeih gangj, aen suijgu neix, mboujguenj raemx baenzlawz hwnjlai, aen dauj iq cingqgyang cungj mbouj rox deng dumh. Miz vunz gaenq youq suijgu dwk ndaej bya, aeu muengx daeuj laengz ciengx youq ndaw suijgu, naemj ngoenzlaeng couh dawz daengz gwnz haw bae gai. Byawz rox ngoenz- laeng daengz bangx suijgu, riuj muengx hwnjdaeuj baez yawj, ndaw muengx mbouj miz saek duz bya, couh lienz vengq gyaep bya hix mbouj raen. Gyoengqvunz bonjdeih rox cungj naeuz dwg duzlungz yienj lingz lo. Duzlungz dauqdaej caeuq aen suijgu neix miz maz doxlienz ne?

Riuznaeuz, aen suijgu neix gaxgonq dwg aen daemz ndeu, heuhguh Daemzraez. Youq henz Daemzraez miz aen mbanj ndeu. Miz ngoenz he, dienheiq aeng lai, lumjbaenz yaek doek fwn lo. Miz boux vunz ndeu youq ndaw ranz, yawjraen duz bya ndeu cingq bin coh bak dou ranz de. De nyinhnaeuz swhgeij dava lo, uet mbat da ndeu caiq yawj, caen dwg duz bya ndeu. De doq buet gvaqbae, sim’angq vauvau gip dawz duzbya hwnjdaeuj, ngiengxgyaeuj coh baihrog baez yawj, raen ndaw mbanj gwnz namh cungj miz bya bin.

Gyoengqvunz ndaw mbanj hix fatyienh lo. Seizhaenx, daengx mbanj cungj nauhyied hwnjdaeuj, gya’gya hohhoh, mboujguenj dwg bouxsai roxnaeuz mehmbwk, vanzlij bouxlaux roxnaeuz lwgnyez, cungj angqyangz dwk buet ok bakdou daeuj gip aeu gij bya, cuengq roengz ndij caeuq swx bae. Gyoengq bya neix yenzlaiz dwg daj Daemzraez bin hwnj, haujlai vunz youh buet daengz henz daemz bae, lumj gip rin nei gip aeu bya. Haemhde, ranzranz lumj gvaq ciet nei, cien、cawj roxnaeuz gug gwn gij bya begbeg gip ndaej, mizfeih dangqmaz. Miz vunz maez gwn bya ndip, couh caemj roengz liuhrang bae, mizdauh ciekciek cimzgwn nohbya. Ndaw hoengheiq cungj rang feih bya. Gwn rim dungx rim hoz le, gaenq haeuj laep lo, gyoengqvunz hozhaih dwk caem haeuj fangzhwnz bae.

Byonghhwnz, rumz hung ci daeuj, byajyap byajraez, fwn hung yaek daeuj lo. Raemxfwn lumj miz vunz youq gwnzmbwn aeu bat raix roengz- daeuj nei, gij ranzhaz youq gij rumz ci fwn soen lajde dingj mbouj ndaej lo. Gij haz dingjranz deng rumz hung ci hwnj gwnzmbwn bae, youh deng gij fwn dwk doek roengz namh daeuj, gij ciengz naez deng fwn cung yaek byoengq doemq roengz. Gyoengqvunz saenzrubrub, mbouj miz muengh dwk yawj coh gij mbwn laepsaengsaeng, mbouj rox mbwn vihmaz baenzneix doiq gyoengqde. Hoeng, gij saeh vunz mbanj engq siengj mbouj daengz daeuj lo. Gizgyae, raemxhung langhlangh gyonj gij sa、rin caeuq faex itloh gvaqdaeuj, gyangyak sojmiz, aen mbanj raemhrwnh bienqbaenz haij- yangz gvangqlangh.

Mbwn rongh, miz aen ranz haz ndeu daengj youq ndaw gyang raemx, miz boux mehyah ndeu ndwn youq bakdou, raemxda laevangvang. De couhdwg yahmaiq singq Max ndaw mbanj. Ngoenzlwenz, de hix yawjraen ndaw mbanj seiqlengq cungj miz bya, de yaek bae gip seiz, miz duz bya ndeu bin daengz rog bakdou ranz de. De raen duz bya neix song da lumj miz raemxda yaek lae roengz, yawj hwnjdaeuj hojlienz lai lo. De couh gip duz bya neix cuengq roengz aen bat cang miz raemx bae. Haemhhaenx, yahmaiq singq Max simsienh, mbouj nyaenx gwn duz bya neix, couh laeglemx dawz de cuengq roengz Daemzraez bae lo. Ndigah de ndaej mienx gij cai neix.

Dingqnaeuz, duz bya yahmaiq singq Max cuengq roengz ndaw daemz neix, dwg gij lwglan duzbyaj gwnz- mbwn. Ngoenzlwenz, gyoengqde dox- buenx hwnj mboek, dwg aenvih duzbyaj yaek roengzdaeuj cazyawj gij cingzgvang lajbiengz. Byawz siengj daengz gyoengq bya lwglan duzbyaj gawqyienz deng vunz mbanj neix gwn roengz dungx bae. Duzbyaj hozndat dengdeng, couh fat ciengz rumzfwn hung neix, dumh aen mbanj neix bae. Duz bya ndaej cuengq dauq haenx gig haenqrengz gouz duzbyaj, de cij hawj yahmaiq singq Max lix roengzdaeuj.

Baenzneix gangj Daemzlingz goj miz heiqlingz!