Youq aen ndoengfaex hung, miz haujlai doenghduz gaenxhong youq. Ginggvaq caezgya sinhoj guh gong, noucoengz iq cawx ndaej danci, “dinglingling” caen lengj. Muindaem gwih dwk mozdozceh, “du du du” caen vifung! Duzciengh hai aen ci yinh huq, buet bae buet dauq muengz daeh doxgaiq……

Ci lai dwg gienh saeh ndei, biujmingz gij saedceij caezgya cungj gvaq ndaej ndei hwnjdaeuj lo! Hoeng, roeggaphau canghyw cix simnyap lo. Aenvih gij gyaudoeng saehhux beij gaxgonq engq lai. Ndoengfaex yihyen yaek hawj bouxsieng youq rim lo.

Baenzlawz guh ne? Caezgya giet- dingh baij duzlingz lingzvued bae ndaw singz hag gyaudoeng gveihcwz, dauqma le dang gyaudoeng gingj- caz.

Duzlingz dauqma lo, de dawz gij doxgaiq hag ndaej bien baenz go, youq ndoengfaex gvangjbo dendaiz son ciengq:

Ci hung ci iq byaij baihswix,

Bakloh cibcih aeu yawj cing.

Daeng loeg byaij、daeng hoengz dingz,

Daeng henj rongh seiz yaek bwh byaij.

Gig vaiq, caezgya cungj rox ciengq, hix cungj ciuq guh lo.

Hoeng, byawz siengj daengz, gyaudoeng gveihcwz ngamq guh ngoenzdaih’it couh luenh lo. Aen ndaeng duzciengh deng bungq, lwed lae lumj raemxdah nei; ga muimeuz deng at raek lo, in ndaej hemqyaya; baihlaeng caekhaex noucoengz cij lw buenq diuz rieng, daj gwnz faex roengzdaeuj cungj laemx youq gwnz namh……

Duzlingz hojsouh dangqmaz. De siengj mbouj doeng gij gyaudoeng gveihcwz, vihmaz youq ndaw singz hung guh ndaej gig ndei, youq ndaw ndoengfaex couh mbouj lingz ne? Itdingh aeu caz cingcuj.

De sien caz daenggyaudoeng, daeng dwg ndei, youh bae caz moix aen ci, ci hix mbouj miz maz mauzbingh, doeklaeng gietdingh caz ndang doenghduz youq ndaw ndoeng- faex youq. Youq roeggaphau canghyw bangcoh lajde, cazyawj lwgda moix cungj doenghduz. Laxlawz cawzliux duzlingz caeuq yahvaiz, gizyawz doenghduz youq ndoengfaex cungj dwg swzmangz. Gyoengqde faen mbouj ok saekhoengz、saekloeg caeuq saek- henj, ndigah mboujguenj daeng saek maz rongh, cungj gyonj byaij gyonj hai.

Duzlingz yied siengj yied sieng- sim, de siengj vih caezgya guh saeh ndei, doeklaeng cix hawj haujlai doenghduz deng sieng, youq yihyen ywbingh.

Duzlingz ngeix bae ngeix dauq, ngeix ngoenzhwnz ndeu, cungjsuenq siengj ok aen banhfap ndei daeuj lo.

Ngoenzdaihngeih, ndoengfaex gvangjbo dendaiz, cezmuz gvangjbo gyaudoeng bo souj go moq ndeu daeuj:

Aen ci baedauq byaij baihgvaz,

Bakloh cibcih aeu yawj cing.

“Samgak” byaij, “fuenggak” dingz,

Yawjraen aen luenz couh bwh byaij.

Duzlingz dawz daengloeg gaij guh hingzsamgak, doenghoengz gaij guh hingzcingqfueng, daenghenj gaij guh aenluenz, yienghneix couhcinj byawz dwg swzmangz, hix ndaej daj hingz- cang aen daeng daeuj faenbied dingz roxnaeuz byaij. Daj seizhaenx hwnj, ndoengfaex gyaudoeng cizsi ndei lai lo. Caezgya cungj haenh duzlingz dwg boux gyaudoeng gingjcaz coeng- mingz dahraix.