De dwg boux lauxsae ciengqgo aen hagdangz yisuz he, yungh seizhoengq hag caeuq yenzgiu Sawcuengh, gonqlaeng cauhguh caeuq fanhoiz gvaq geijcib aen go Vahcuengh maenhndei, vanzlij yungh Sawcuengh fanhoiz okbanj gvaq 1-4 cek saw ciengqgo siujyoz; de gaenxmaenx douz gauj Sawcuengh hawj meizdij, geijcib bi caengz daengx gvaq, caemhcaiq aeundaej aen cwngheuh bouxdunghsinyenz maenhndei Guengjsae Minzcuz Bau; de bi’ndwen daengz betcib lij camgya Vahcuengh Sawcuengh suijbingz gaujsi, bienqbaenz bouxgaujseng ceiq geq Guengjsae Vahcuengh Sawcuengh suijbingz gaujsi. De couhdwg Nungz Gvangh lauxsae yinhyozhi Guengjsae Yisuz Yozyen.

Caeuq Sawcuengh giet cingz, roengzrengz hag dauqdaej aeundaej cingzcik ndei

Gij cingzyienz Bouxcuengh Nungz Gvangh lauxsae seng ma couh miz.

De youq bi 1936 doekseng, diegseng dwg Guengjsae Denhdwngj Yen, vunz Bouxcuengh. Bi 1958 gauj ndaej yinhyozhi Guengjsae Yisuz Conhgoh Hagdangz, bizyez le louz youq hagdangz guh gij hong sonhag boq dig caeuq boiq yaem ciengqgo diuqfoux ndawbiengz. Bi 1957 ndwen 11 Gozvuyen cingqsik baecinj 《Fueng’anq Sawcuengh》, youq dieg Bouxcuengh hainduj doihengz yungh, fatdoengh le ciengz hagsib yungh Sawcuengh hoenghhwd ndeu, cig- daengz bi 1967 “vwnzva dagwzming” hainduj, hong doihengz Sawcuengh deng bik daengx roengzdaeuj. Aenvih gak cungj yienzaen, Nungz Gvangh loekgvaq 10 bi seizheiq ndei hagsib Sawcuengh, de roxnyinh gig hojsik.

Bi 1982, Guengjsae Bouxcuengh Swcigih Yinzminz Cwngfuj hoizfuk gij hong doihengz Sawcuengh deng daengx roengzdaeuj cib geij bi haenx, caemhcaiq hoizfuk Swcigih Minz- yijveij dem. Bi 1984 ngoenz ndeu, Nungz Gvangh bae liuh ranz doengzyieng mwhhaenx youq Swcigih Minzyijveij guhhong haenx, youq mwh gangjgoj roxdaengz Swcigih Minzyijveij yaek banh aen ban hag Sawcuengh Vahcuengh, de dingq ndaej aen siusik neix le faengz dangqmaz, sikhaek bauqmingz camgya aen ban hag Sawcuengh Vahcuengh.

Daj mwh camgya aen ban hag Sawcuengh Vahcuengh hainduj, Nungz Gvangh couh gyaez Sawcuengh laeglaeg bae. Hoeng, hag 3 ndwen seizgan dan hag ndaej gij cihsiz giekdaej gyoep raiz Sawcuengh, naemj hag daeuq hag laeg lij aeu laebdaeb roengzrengz. Aenvih gig maij Sawcuengh, doeklaeng Nungz Gvangh fwt siengj ok aen naemjfap ndeu, gietdingh youq yisuz yozyen banh aen ban hag Sawcuengh ndeu. Mwh de aeu aen naemjfap neix lwnh hawj boux doengzyieng youq Minzyijveij guhhong haenx le, doengzyieng gig haeujcoengh, angqvauvau dwk ciepsouh Nungz lauxsae iucingj, naeuz nyienh daeuj guh lauxsae son Sawcuengh mbouj aeu cienz. Ginggvaq mboengq seizgan caepcawq ndeu le, aen ban hag Sawcuengh ciuqseiz banh, hagseng miz daengz 30 lai vunz gvaq. Gangj daengz gizneix, Nungz lauxsae riuhoho dwk naeuz:“Banh ban mbouj dwg muzdiz la, muzdiz caen dwg vih hawj bonjfaenh miz seizheiq hagsib Sawcuengh engq lai.”

Caenhguenj doeklaeng aen ban hag Sawcuengh yisuz yozyen dan banh le baez ndeu, hoeng, Sawcuengh suijbingz Nungz Gvangh gaenq daezsang haujlai lo. De mboujdan ndaej doengswnh dwk yawjdoeg saw Sawcuengh, vanzlij hag rox yungh Sawcuengh raiz faenzcieng dem.

Mu Sawcuengh, yungh ciengqgo raiz biencieng Sawcuengh

Gij lingzganj cauhguh yozgiz Nungz Gvangh daj ndaejgeiq mwh lij iq okdaeuj, daj goengqbya dahraemx mbanjranz okdaeuj, daj gamjcingz Bouxcuengh okdaeuj. 20 sigij 80 nienzdaih, aen cozbinj《Mbanjcuengh Angqvauvau》de vih Denhdwngj Yen camgya gizdieg Namzningz vwnzyi comzyienj raiz haenx, yienjok le ndaej ciengj cezmuz maenhndei.

Nungz lauxsae naeuz, gij hong bonjfaenh guh dwg boiq yaem ciengqgo diuqfoux ndawbiengz, lai bi daeuj miz seizheiq caeuq haujlai fwen Bouxcuengh maenhndei roxnaj. Hoeng, aenvih hainduj mbouj rox Sawcuengh, mbouj miz banhfap dawz fwen Bouxcuengh yienghnduj geiqloeg roengzdaeuj, ndigah gag raen hojsik dangqmaz. De naeuz:“Miz Sawcuengh le, couh lumj miz aen luzyinhgih ndeu nei, di ndeu hix mbouj bienq dwk dawz yaem’wenq ndawbiengz daj gyaeuj daengz rieng ndeindei geiqloeg roengzdaeuj, hawj hong gou dem aen mimiz vujgi ndeu lo.”

Riengzdwk suijbingz Sawcuengh Nungz Gvangh cugyamq daezsang, de hainduj sawq yungh Sawcuengh bien raiz go caeuq fanhoiz faenzcieng. Gonqlaeng fatbiuj gvaq 《Sawcuengh Hai Va’nding》 caeuq 《Dangj Caeuq Beksingq Sim Lienz Sim》daengj 7 aen go youz Swcigih Minzyijveij bien swz、Nungz Gvangh bien buj haenx, fanhoiz gij go《Yienghsiengq Moq Mbanjcuengh》《Beksingq Bouxcuengh Danqhaenh Dangj》daengj 15 aen. Gij faenzcieng de fanhoiz haenx miz 《Seiq Fap Gya Gemj Swngz Cawz Boux- cungnienz Bouxlauxnienz Cangq- ndang》 daengj 44 bien.

Nungz Gvangh dwg bouxdungh- sinyenz maij raiz faenzcieng douz haeuj meizdij Sawcuengh, mboujdan douz gauj hawj 《Guengjsae Minzcuz Bau》 (banj Sawcuengh), lij douz gauj hawj《Sam Nyied Sam》(banj Sawcuengh), ndigah youq biengz Vahcuengh Sawcuengh haemq mizmingz, daegbied dwg youq Guengjsae Minzyijveij、Guengjsae Minzcuz Bause、Sam Nyied Sam Cazcise daengj danhvei haujlai vunz cungj rox. Bi 2016, Nungz Gvangh ndaej mbawcingq mingzdaeuz bouxdungh- sinyenz maenhndei Guengjsae Minzcuz Bau bi 2016.

Genhciz mbouj vut Sawcuengh, bae gauj Sawcuengh baenz bouxgaujseng ceiq geq

Bi 2014 ndwen 8 ngoenz 2, bi 2014 Guengjsae Vahcuengh Sawcuengh suijbingz gaujsi doengzseiz youq Namzningz、Cungzcoj song aen si banh, dieg gaujsi ndawde dieg ndeu youq Namzningz Si Daih 29 Cunghyoz gauj, 343 boux bouxgaujseng camgya gaujsi. Ndawde, bouxgaujseng bindwen ceiq noix dwg 18 bi, ceiq hung dwg 77 bi. Bouxgaujseng ceiq geq neix couhdwg Nungz Gvangh.

Nungz Gvangh laebdaeb geij bi gaenxmaenx camgya gaujsi. Bi 2014 baez daih’it camgya Vahcuengh Sawcuengh suijbingz gaujsi(cogaep), mbouj habgek, caeuq diuzsienq habgek 60 faen ca 2 faen. De mbouj aenvih mbouj habgek doeknaiq, dauqfanj engq roengzrengz bwh gauj, Bi 2015 gauj ndaej 63 faen. Cingzcik yienznaeuz habgek lo, hoeng, lij ca maenhndei gig gyae, de lij dwg mbouj simlaemx, ginggvaq roengzrengz bi ndeu, bi 2016 de laebdaeb bauqgauj Vahcuengh Sawcuengh suijbingz gaujsi(cunggaep), dauqdaej ndaej 65 faen cingzcik ndei cunggaep gaujsi lo.

“Gauj ndaej cingzcik 65 faen, ndawsim youq ndei gvaq, beij mbouj habgek ndei gvaq di ndeu. Hoeng, gangj hwnjdaeuj hix najmong, boux- wnq gauj ndaej 80 lai faen, bonjfaenh doeklaeng baenz donh hung ndeu, neix gangjmingz bonjfaenh hag ndaej mbouj gaeuq ndei, mbouj gaeuq laeg, giekdaej mbouj gaeuq maenhsaed.” Dauqngeix hwnj gij cingzcik Vahcuengh Sawcuengh suijbingz gaujsi, Nungz Gvangh angqhoho dwk doiq gicej naeuz.

Yiengjsouh Sawcuengh, bouxgeq simhoengz ceiqheiq sang ciengq go Bouxcuengh angqvauvau

Nungz Gvangh gaenq dwg bouxgeq bi’ndwen gvaq betcib, hoeng yiengh de yawj hwnjdaeuj cix cij miz 60 lai bi baenzneix. Miz haujlai vunz cam de baenzlawz ciengxndang gvaq, de naeuz:“Ciengxndang gangj mbouj hwnj, gou dan rox ciuhvunz ceiq youqgaenj dwg guh ndaej haj diuz: It dwg hableix gwn, ngeih dwg habdangq yindung, sam dwg simcingz bingz, seiq dwg gimq ien hanh laeuj, haj dwg ninz ndaej doh.”

Yawjraen Nungz Gvangh bindwen gvaq betcib lij baenzneix vih Sawcuengh buet hwnj buet roengz, gicej nyaenx mbouj ndaej cam de:“Nungz lauxsae, mwngz bi’ndwen baenzneix hung lo, vih gijmaz lij doiq Sawcuengh mbouj vut mbouj gveng、mbouj daengx bit gvaq ne?” De naeuz:“Gou hag Sawcuengh, yungh Sawcuengh fanhoiz haujlai faenzcieng caeuq cauhguh haujlai go Sawcuengh, ndaej daengz Guengjsae Minzcuz Bau caeuq Sam Nyied Sam Cazcise maij caeuq fatbiuj, camgya Vahcuengh Sawcuengh suijbingz gaujsi ndaej faensoq cunggaep, ndawsim gou ndaej youq onj, cingsaenz hix ndaej saenqdaenh!”

Simcingz vuenheij, ndangdaej couh ndei. Yenzlaiz, Nungz Gvangh daj ndaw Sawcuengh ra ndaej angqyangz, ndigah de bi’ndwen geq lij ceiqheiq sang! Caijfangj liux gvaqlaeng caeuq Nungz lauxsae doxbiek, gicej ngamq cienj ndang, Nungz lauxsae youh boq hwnj aen go《Mbanjcuengh Gyaeundei》de gagcauh haenx, yaem’wenq soengswt itcig hoedheux youq henz rwz gicej……