Maj cihsuh: Hai, daj ciuhlaux roengzdaeuj cwngci doucwngh couh- dwg baenzneix youqgaenj. Mboujgvaq neix hix suenq mbouj ndaej maz saeh hung, mbouj couhdwg laengz 5000 maenz ngaenz bangbouj dingjrengx ha? Haiz okdaeuj boiz couh ndaej luma——

Cangh cujyin: Raen mwngz gangj ndaej yungzheih lai, saehcingz gvaq- bae yaek buenq bi, gwih guk nanz roengz, mwngz baenzlawz haiz okdaeuj?

Maj cihsuh: Diuz neix ma, gou miz banhfap, cij aeu sij faenh gejgangj ciengzsaeq ndeu hawj gijveij, caiq gyau geij cien maenz ngaenz okdaeuj boiz mbouj couh ndaej luma?

Cangh cujyin: Neix dwg gag iet gyaeuj haeuj hongx bae, roxnaeuz dwg nyinhsoh gouz aeu yienzliengh?

Maj cihsuh: Hei, gangj ndaej nyaenx youqgaenj bae, raeuz ngamq laengz geij cien maenz neix suenq maz vwndiz. Mwngz yawjyawj doengh boux hak haenx dam ndaej geij cib fanh、geij bak fanh, gyoengqde cij dwg vwndiz, rox lwi?

Cangh cujyin: O! Gangj ndaej deng.

Maj cihsuh: Ne, mwngz hai dennauj, gou gangj mwngz sij, sij ndei le sikhaek cienz bae hawj cwngzgih gijveij suhgi, baujcwng mwngz mbouj miz saek di saeh!

Cangh cujyin: Yienghneix?

Maj cihsuh: Hai ya! Mwngz dingq gou gangj couh baenz lo. Hen ndaej mbaek naz youq, laeng ndaej haeux rim ranz.

(Cangh cujyin naengh haeuj naj dennauj bae, hai dennauj.)

Maj cihsuh: Bwh ndei caengz?

Cangh cujyin: Bwh ndei lo, gangj vei!

Maj cihsuh: Gijveij suhgi, bineix codaeuz ngaenz bangbouj dingjrengx baihgwnz bued roengzdaeuj, dou bonjlaiz gaenq guh ndei aen fueng- anq, cingq yaek fat roengzbae hawj gyoengq vunzmbanj. Hoeng, sawqmwh raq fwn naek ndeu daeuj ndaej gig ngamj seiz, gyoengq vunzmbanj geijlai ngoenz daeuj cou raemx dwk naz cungj sai rengz lo, bued ngaenz bangbouj dingjrengx camhseiz caengz miz yungh. Vih neix, dou couh ce gij ngaenz bued roengz haenx youq ndaw cunhveij, caj caezgya doxyaeng le, cij cuengq coh giz engq gaenjyungh ngaenz bae. Fanhfanh ngeix mbouj daengz, miz ndaek vunz sim bwn sim rwix, aeu di neix guh lijyouz daeuj gauq dou.

Cangh cujyin: Cihsuh, mwngz aen ciedciu neix, baenz! (Iet lwgfwngzmeh okdaeuj.)

Maj cihsuh: Ha ha ha, lij dwg gij hing geq manh ha!

(Cangh cujyin sikhaek doengh- fwngz fat faenh vwnzdangj ndaw dennauj de ngamq sij ndei haenx okbae, sim angqvauvau.)

(Liengz vwnzsuh fwngz dawz faenh vwnzgen gyaeujnding ndeu, dinfwngz fouxywkywk、sim angqfwng- fwng hwnjciengz.)

Liengz vwnzsuh: Cihsuh! Cujyin! Siusik ndei, miz siusik ndei ha!

Maj cihsuh、Cangh cujyin: Maz siusik ndei?

Liengz vwnzsuh: Cihsuh, cujyin, gwnz cwngzgih doengbauq haenh mbanj raeuz lo, (Ndenq vwnzgen hawj cihsuh、cujyin) sou yawjyawj, baih- gwnz haenh naeuz mbanj raeuz nienzco hong dingjrengx guh ndaej ndei, ngaenz bangbouj fatcuengq ndaej gibseiz, hawj daengx mbanj gij naz deng rengx cienzbouh ndaej ciuqseiz ndaem caez, mbouj miz saek mbaek deng vit fwz……

Maj cihsuh、Cangh cujyin: A! (Song boux doeksaet dwk noh cungj heu liux, ngunh laemx gvaqbae.)

Liengz vwnzsuh: (Guhmuengz gvaq- bae rex, rex boux mbouj ndaej boux) Cihsuh, cujyin, sou baenzlawz la? Sou baenzlawz la?

(sat)