Sai:

Bet nyied gveiqva hai

Rang doh gai doh luengq

Heiq fiz gyoengq beixnuengx

Caez cuengq sing ciengq go

Mbwk:

Mbwn sang heiq youh sangj

Baihnaj gvangqgumgum

Baihhenz ci raq rumz

Liengzsumsum ndei youq

Sai:

Gova hwnj ndaw suen

Vunz mbouj guenj nya goemj

Rumz boq ngaiz fiengz hoemq

Va loemq mbouj gyaeundei

Mbwk:

Vamaedlaeh youq byai

Dujduj hai ndaej angj

Daengz henz couh raen rang

Lwgsau angq camq gyaeuj

Sai:

Vunz caen mbouj lau gyaj

Max gvai boiq angim

Cijaeu nuengx miz sim

Mbouj yungh cim hix lig

Mbwk:

Gyaez beix geiq youq sim

Raemx guenq rim diuz dah

Hwnz ninz mbouj laepda

Yawj baq daengz ranz rongh

Sai:

Cangzngoz youq ronghndwen

Eufwen swhgeij dingq

Yaek roengz biengz daeuj bingq

Lau mbouj hingz bouxcoz

Mbwk:

Cangzngoz boux vunz dog

Yaek okrog ma cim

Roeb lumj beix ngamj sim

Angq rim eiq ciuhvunz

Sai:

Gyanghwnz ninz mbouj ndaek

Yaek hwnqdaeuj ngonz roen

Baihnaj lumj miz hoenz

Umj daeuj goenq faexnduk

Mbwk:

Siengj beix ninz mbouj caem

Hwnqdaeuj gaem dou aj

Laihnaeuz beix daeuj ra

Seiqhenz lah mbouj raen

Sai:

Haethaemh cungj siengj nuengx

Maqmuengh vaiq baenzranz

Ngeix daengz couh simfanz

Ciuhvunz nanz ra yah

Mbwk:

Siengj beix siengj daengz maez

Lumj raemxdah bae haij

Siengj lai lau uk vaih

Muengh caeux guh daizlaeuj

Hab:

Song raeuz sim doxgyaez

Lumj cimmae doxrangh

Yien fwngz byaij roen gvangq

Giet yenhyangh caemh rongz