Mbanjvuengzlingz miz daegcoz ndeu heuhguh Ahgauh. Bi 1990 seizdoeng, yah Ahgauh yaek seng lwg lo. Bohmeh de sim’angq dangqmaz, caj dwk umj lan. Yah de hix gig vuenheij, hwnzngoenz cimq youq aen dungx swhgeij.

Miz ngoenz he, daxmeh doiq Ahgauh naeuz:“Dahbawx ndang yaek mbaeu lo, mbanj raeuz liz yihyen gyae, mwngz lijdwg daiq de bae yihyen gonq ba?” Ahgauh naeuz:“Mbouj youq- gaenj, ngoenzseng caengz daemx, gvaq geij ngoenz menh bae. Gou gaenq caeuq geij boux canghyw gangj gvaq gienh saeh neix.”

Byawz rox daengz ngoenz daih- ngeih gyanghwnz 11 diemj, sawq- mwh gvat rumz hung, ci ndaej vax gwnz ranz fan haujlai. Fwn mbwk hix gaen dwk cung roengzdaeuj. Couh youq seizneix, yah Ahgauh heuh dungx in, yied heuh sing yied hung. Daengx ranz vunz gip ndaej lumj moed youq gwnz gva remj. Daxmeh doiq Ahgauh naeuz:“Mwngz vaiq bae heuh canghyw, gizlawz gaenh couh sien bae gizlawz. Raeuz hix mbouj rox dwg mbouj dwg nanzseng. Vaiq di!”

Ahgauh dawz ndei dendungz caeuq fagliengj, gipmuengz okdou. De soemh fwnrumz vaiq byaij 4 leix loh couh daengz najdou Se canghyw Mbanjfag lo. De roq dou heuh:“Se canghyw, gou dwg Ahgauh, cingj hai dou……” De laebdaeb heuh ndaej geij faen cung, mbouj nyi baihndaw miz saek sing. De ngeix, haxbaenh cigsoh bae Mbanjleuh lij lai vaiq bw! Se canghyw 60 geij bi lo, lumj cungj dienheiq neix, de wnggai mbouj bae dajyw lo.

Siengj daengz neix, de sikhaek buet bae Mbanjleuh. Canghyw Mbanj- leuh dingjlingz mbouj youq ranz. Ahgauh gip ndaej lumj feiz coemh bwnda, de youh soemh fwn max mbouj dingz ve ganj bae Mbanjhawceih. Daengz naj dou Cieng canghyw le, de roq dou heuh, gangj mingz laizyouz. Geij faen cung gvaqbae lo, mbouj miz vunz daeuj hai dou. Ahgauh aeu dendungz rongh gwnz rongh laj, raen henz dou hung gwnz baiz ndeu sij naeuz “Canghyw mbouj youq ranz, ngoenzrawz de cij dauq”. Ahgauh ngonz le, cibfaen sim gip, de gag naeuz:“Caen boihseiz, vaiq daj loh iq ganj baema, heuh ndaw mbanj yahlaux lai rox haenx daeuj ciepseng.”

De gangj sat couh con haeuj ndaw fwn bae moq. Youq gwnz loh, de deng rumz ci fwn soen, yamq daemq yamq sang caenxgenggeng, buhvaq dumz caez. De gag danqheiq naeuz:“Hai, mbouj dingq bouxlaux gangj, dangqnaj couh gwnvi. Swhgeij sinhoj mbouj youqgaenj, mingh song mehlwg dijbauj lai bw! Naengh ok maz saeh mbouj ndei, baenzlawz guh ne?”

Ahgauh byaij ndaej aen cung- daeuz lai cij daengz mbanj. De bae ra boux yahlaux caeuq de dauq ranz. Gyoengqde baez haeuj ranz couh dingqnyi “Vuh va, vuh va……” sing lwgnding daej, de cij raen ndaw ding caux miz bo feiz ndeu, Se canghyw caeuq Cieng canghyw geij boux vunz cingq naengh byoq feiz. Cieng canghyw raen de dauq, angq naeuz:“Ahgauh, gou ngamq ciepseng sat, yah mwngz gaenq seng daeglwg ndeu, hoh mwngz baenz boh lo. Yienznaeuz dwg nanzseng, hoeng seizneix song mehlwg bingzan fouzsaeh. Buhvaq mwngz dumz lo, bae vuenh gonq caiq daeuj umj lwg.”

Ahgauh gikdoengh ndaej gangj mbouj ok saek coenz vah. De rieg buhvaq ndei bae yawj yah caeuq lwg liux couh daeuj henz feiz naengh. Cieng canghyw naeuz:“Se canghyw, rox mwngz youq neix, gou couh mbouj yungh daeuj lo.” Se canghyw riu naeuz:“Mbouj youqgaenj, mwngz daeuj ndaej gib, ciepseng lijdwg sou mehmbwk lai ak. Gizsaed, gou ngamq ninz ndaej cit ci ien seizgan ndeu, Ahgauh couh daeuj roq dou ranz gou. Gou siengj, fwnrumz hung, youh nit, swhgeij 60 geij bi lo, mbouj bae, byawz hix gvaiq mbouj ndaej. Ahgauh lizbae yaep he, gou youh ngeix, mbouj deng, yw bingh gouq vunz dwg saeh bonjcik canghyw. Byawz heuh dou guh canghyw? Gou couh hwnqdaeuj daenj ndei haizgau caeuq buhfwn, beq loengxyw rongh dendungz ganj daeuj lo.”

Cieng canghyw hix riu naeuz“Dwg a, byawz heuh dou guh canghyw? Wnggai seiz heuh seiz daemx. Geij ngoenz gonq gou cingqngamj okrog bae banhsaeh, guh ndaej vaiq, banhaemh neix couh dauq ranz lo. Ahgauh bae heuh, gou baez dingq, ganj mbouj gib dap de, couh hwnqdaeuj sousib doxgaiq yaek daeuj. Ok dou gaenq mbouj raen de lo. Gou couh heuh daeglwg gou aeu mozdozceh doz gou daeuj neix lo.”

Ahgauh dingq le, gikdoengh fanhfaen, gyo’mbaiq dwk naeuz:“Gig docih sou, sou dwgrengz lo. Vah gyaeundei gou hix mbouj rox gangj lai. Gou doq loengh di haeuxbyaek, raeuz itheij gwn siuyeh!”

Rog ranz, fwnrumz doxgyaux, mbwn nit deih gyoet. Ndaw ranz, raeuj lumj seizcin. Seizneix, daegnding ndaw rug youh “vuh va……vuh va……” dwk ciengqgo hwnjdaeuj, lumjbaenz danq daxmeh caeuq canghyw daiq de daeuj aen gwnz- biengz ronghsaksak neix.