Gizneix bya heu raemx saw, rin daengj gamj laeg, dieg ndei vunz gvai, miz aen ranzsaw siengzhuz yuzgyah, miz aen Miuhsienmbwn daugyau, lij miz aen Bauwnhsw fuzgyau, comz yuzgyau、daugyau、fuzgyau youq giz ndeu, caeuqcomz cix mbouj doxdoengz; goengq Byasonggaeq riuzmingz doh biengz. Gizneix couh dwg Mbanjbyalai Yauzsanh Cunh Cinzdangz Gih Gveigangj Si.

Mbanjbyalai dwg aen Mbanj- cuengh conzdungj youq diegbya aeu Byasonggaeq guh cungsim ndeu, dieg youq baihsaebaek Cinzdangz Cin, liz hawsingz Cinzdangz miz 4 goengleix gyae, daengx mbanj miz 1000 vunz, hongsaeh aeu ndaem ngaeux、haeuxnaz caeuq guh lijyouz guhcawj, moix vunz bi cinghsouhaeuj 8800 maenz doxhwnj. Aenmbanj seiqhenz goengqbya hopheux, ing bya dep raemx, gingjsaek gyaeundei, miz goengq bya dandog daemqdet mbouj yienhda geijlai、gaxgonq laj dinbya miz song ndaek rin yiengh lumj duz gaeqboux ngiengx gyaeuj haen’oeko haenx gvaq cix ndaej heuhguh Byasonggaeq, conghgamj gwnz bya miz siengqnaengh Guenyaem、mbawdoz Dazmoz saecoj naj coh bangxciengz、gamj “ronghfuz” daengj gingjyawj geizheih, gig miz gij yiengh cienzgeiz, dwg aen gingjdenj okmingz Cinzdangz Cin. Daj ciuhgeq daeuj ranghdieg Byasonggaeq couh riuz miz aen gojgaeq sae’mbwn Cungh Gveiz gaeb duzfangz gyaep duzgvaiq, daihlaeng couh heuh conghgamj gwnz bya guh Gamjbouxsien, caemhcaiq laeb miuh baiqcaeq, heuhguh Miuhsienmbwn. Aen Miuhsienmbwn seizneix dwg seiz Ciuhcingh guh- baenz lwce, daengz seizneix gaenq ndaej song bak lai bi. Seiqhenz Byasonggaeq miz Dahfuklungz、Dah- loeglingz、Dahsouhcin、Mienglwgcaiz seiq diuz dah, baenz bi seiqgeiq raemxsaw laeratrat, doenghgo maj mwncup.

Mbanjbyailai ranzcaep dwg ciennaez gang vax lai, miz gij daegdiemj “ganranz diegbingz”, yinzvwnz gingjgvanh daiq miz daegdiemj ranghdah Dahsihgyangh Guengjsae, caiqlij dieg youq ranghdieg Vahgun Vahcuengh dox- giethab de, habngamj laebbaenz aen lijyouz funghgingj mingzswnggih aeu “fungsug fungcingz Bouxcuengh baijyienj + vwnzva Bouxcuengh swnjcienz + diegmbaeq + daegsaek nungzyez lijyouz yawjgingj + fuzgyau vwnzva yenzgiu cungsim” daengj lai cungj yenzsu gyoebbaenz ndaej yienh’ok daegsaek fungsug ndaw- biengz Bouxcuengh Dahsihgyangh neix. Bi 2016 ndaej lied guh buek daihngeih “aenmbanj daegsaek minzcuz vunznoix Cungguek”.

Seizneix, Mbanjbyalai cingq haenqrengz cauxguh aen suen hong- saeh lijyouz ciengxndang youqndwi minzcuz vunznoix comz miz lai cungj yenzsu vwnzva Bouxcuengh ndeu, caj guhbaenz le, ndawde ranzyouq daegsaek aeu ciemq gij ranz ndaw mbanj 95% doxhwnj, vunzmbanj youq ndaw mbanj, ndaej baenz aen mbanj okmingz miz daegsaek minzcuz vunznoix Guengjsae souhaeuj dingzlai dwg baengh yiengh mbanj gyaeundei yinxvunz caeuq guhhong gvaq saedceij cungj daiq miz fungsug fungcingz Bouxcuengh daengj hongsaeh lijyouz ndaej daeuj ndeu, daiqdoengh Cinzdangz Gih gak hangh hongsaeh minzcuz cangq- vuengh hwngfat.