Aen go 《Gou Daj Mbanjcuengh Daeuj》ndeu, ciengq ok vah ndawsim geijlai boux vunz Mbanjcuengh okrog buekguh haenx; aen go《Goreux Haiva Couh Dauq Ranz》 ndeu, gwnz muengx diemj dingq mauhgvaq cien fanh vunzbaez; aen go《Son Mwngz Gangj Vahcuengh》ndeu, hawj de miznaj ndaej ciengjgim Guengjsae gaiq daihcibroek Betgveiq ginzsingh ciengj. De, couhdwg Luz Cwngsin, boux cauxguh go liuzhingz Vahcuengh gig ndaej bouxmaezgo Mbanjcuengh gyaezmaij——deng gyoengq boux- maezgo caenmaed heuh baenz “Daegsaenq iq Mbanjcuengh” haenx.

Hainduj ciengq go Vahcuengh: Gou daj Mbanjcuengh daeuj

“Gou daj Mbanjcuengh daeuj, ranz youq laj dinbya, daj iq ndaw ranz hoj, okrog bae dajgoeng……” Neix dwg goswz aen go《Gou Daj Mbanj- cuengh Daeuj》, de ciengq ok vah ndawsim ciencien fanhfanh boux vunz Mbanjcuengh okrog buekguh haenx. Doengzseiz, hix dwg gij ndwenngoenz caensaed gaxgonq Luz Cwngsin bae dieg henzhaij buekguh, daiqdaeuz hainduj ciengq go Vahcuengh haenx.

Luz Cwngsin doekseng youq aen mbanjbya iq Dava Yen Guengjsae ndeu, bi 2001 daj Guengjsae Yisuz Yozyen bizyez, bi 2004 vih gvaq ndwenngoenz, boux vunz dog byaij hwnj diuzroen bae Guengjdoeng buekguh. Gvaqlaeng 4 bi, Luz Cwngsin gonqlaeng youq ndaw ye- cungjvei、aenbah yienj dinfwngz、ciujbah Fuzsanh、Gvangjcouh caeuq Sinhcin guh boux ciengqgo mbouj dingh. Bi 2005, hawsingz henzhaij hwnghwnj funghcauz go liuzhingz guekrog, boux ciengqgo mbouj rox ciengq gij go guekrog couh deng caenx daengz henzbien diuzsienq senglix bae.

Bi 2005 haemh ndeu, youq ndaw aen ciujbah Sinhcin ndeu, boux ciengqgo ndeu cingq yungh cungj vah hawj vunz lumj rox lumj mbouj rox，gig ndeidingq ndeu ciengqgo, boux- dingq mbouj rox goswz, hoeng cix deng gij singgo saenqdoengh sim vunz de gamjdoengh, daihgya riengz yaem’wenq dopfwngz nyaunyau……Neix cingq dwg aen ciengzgingj Luz Cwngsin geij bi haenx youq Sinhcin roemx biengz ndeu. Daegmbauq youq mbanjbya Guengjsae doekseng、mbouj rox gangj vahguekrog neix, haemh haenx youq ndaw ciengz aenhaemh ciengq hwnj go “Vah- daigoz”——Vahdaigoz caeuq Vah- cuengh caemh dwg Dung Daiz yijcuz Cuengh Daij yijcih, song cungj vah neix gig doxlumj, gizsaed de dwg ciengq vahcoj bonjfaenh go Vahcuengh. Aen go Vahcuengh gag raiz ndeu ciengq liux, de cingq lau deng bouxdingq luenhnauh, siengj mbouj daengz laj daiz sing dopfwngz goksasa……

Bi 2006, Luz Cwngsin cienj bae Gvangjcouh buekguh, baez daih’it bungz daengz yinhyoz vangjdoxlienz. Cungj fuengsik cienzboq moq cienz- boq ngaih、cienzgoek cauxguh cienhnoix、gisuz suijbingz iugouz mbouj sang neix, gig vaiq couh deng de dawzndei, caemhcaiq miz aen gien baengzyoux ndei ndeu. Luz Cwngsin sawq yungh gij fuengsik bonjfaenh caixhangz haenx bae gaij bien mbangj go liuzhingz, aeu de yungh hingzsik dienz swz Vahcuengh fanciengq okdaeuj. Doeklaeng cungj fanciengq depgaenj gyoengqvunz Mbanjcuengh neix loeklak ndaej daengz haujlai vunz doengzyieng youq rog haenx doxhap, yaepyet heiq vunz gwnz muengx hoenghhwd hwnjdaeuj, miz le haujlai bouxmaezgo, giz louzvah yiebmienh aengo vanzlij miz vunz yungh Vah- cuengh louzvah. Doeklaeng, lij miz vangjyouj yiedsim lienzhaeh daengz Luz Cwngsin, vih gij go de cauxguh haenx boiq sawmuq goswz Vahcuengh、boiq hwnj vehmienh MV, fatbouh youq gwnz muengx.

Ginggvaq geij bi youq rog youzlangh, Luz Cwngsin dauqdaej yawjraen, go Bouxcuengh cij dwg gaiq bonj anndang bonjfaenh, dwg gij hwngfat fuengyiengq bonjfaenh ceiq ndei. Ndigah, de gietdingh dauqma Mbanjcuengh hwngfat.

Hwng daengx Mbanjcuengh: Goreux haiva couh dauq ranz

“Roxgeiq ngoenzde fwn doek iq daeuj, daeggo yaek bae baihgyae, dahnuengx soengq gou daengz laj goek goreux, ndawsim miz vah gangj mbouj liux, nuengx ha nuengx ha, youq ranz caj gou, daengz goreux haiva daeggo couh dauq ranz……” Neix cingq dwg duenh goswz ndaw aen go《Goreux Haiva Couh Dauq Ranz》 Luz Cwngsin cauhnduj ndeu. Bi 2008 seiz goreux haiva, Luz Cwngsin dauqma mbanj- ranz Guengjsae, byaij hwnj diuzroen dajcauh ciengqgo.

Luz Cwngsin dauqma daengz Guengjsae, gonqlaeng haeuj daengz lai aen funghranz cauxguh ciengqgo cauxguh go Vahcuengh. Bi 2009, aen go《Goreux Haiva Couh Dauq Ranz》Vahcuengh cauhnduj de baez daih’it fat okbae, gwnz muengx diemj dingq aen go neix miz daengz cien baez fanh baez. Youh ginggvaq geij bi roengzrengz cauxguh, de youq bi 2011 fatbouh mbaw conhciz bonjfaenh go liuzhingz《Go Dwg Ciengq Vah- cuengh》, mbaw conhciz neix dwg youz de gag raiz、gag boiq diuh, hix dwg mbaw conhciz Vahcuengh cauhnduj Cungguek, ra ndaej diuzroen go Vah- cuengh caeuq go daihneix giethab lo.

“Danghnaeuz gangj haujlai go Vahcuengh gwnz muengx lij daengx youq aen duenh genjdanh yungh Vahcuengh fanciengq, yienghneix gou gaenq byaij gonq yamq ndeu.” Luz Cwngsin naeuz, daj fatbouh mbaw conhciz bonjfaenh daih’it hainduj, de gaenq yungh cienzbouh goengrengz bae haeujlaeg vatcimh、cingjleix caeuq cauxguh go Vahcuengh. Daengz seizneix, go Vahcuengh de cauhnduj miz 100 lai aen, gaiq go fanciengq hix yaek daengz 100 aen.

Go Vahcuengh daiqdaeuz: Son mwngz gangj Vahcuengh

“Baengzyoux ndiepgyaez miz seizheiq daeuj daengz Guengjsae, yawjyawj gaiq dieg funghgingj gyaeundei neix, lwgminz Bouxcuengh angqcoux mwngz, yiedcingz angqcoux mwngz……” Neix dwg duenh goswz ndaw aen go《Son Mwngz Gangj Vahcuengh》ndeu, seizneix, aen go riuzcienz gig gvangq neix, gaenq bienqbaenz aen go gig youqgaenj youq mwh gak cungj vwnzva minzcuz yienjok hozdung. Bi 2012, aen go《Son Mwngz Gangj Vahcuengh》Luz Cwngsin miznaj ndaej ciengjgim Betgveiq ginzsingh ciengj. Cauxguh 12 aen go denyingj《Aen Dingzdingj》, vih diuzroen ciengqgo Luz Cwngsin byaij ndaej engq swnh dwkroengz giekdaej, hix hawj diuzroen daiqdaeuz go Vahcuengh liuzhingz de yied byaij yied gvangqlangh.

Bi 2013, Luz Cwngsin youh doiok mbaw conhciz ciengqgo Vahcuengh cauhnduj daihngeih bonjfaenh《Maez Youq Mbanjcuengh》. Mbaw conhciz yungh《Maez Youq Mbanjcuengh》 《Mbanjcuengh》《Va Hai Va Loenq》 daengj go guh daiqbiuj neix, yungz- haeuj yaem’wenq fwen yienghnduj ndawbiengz Bouxcuengh, diuh go haprwenz youh unqswnh, caeuq funggek daihneix go liuzhingz mbaw conhciz daih’it gig mbouj doxdoengz.

Seizneix, Luz Cwngsin baengh song mbaw conhciz de, bienqbaenz boux daih’it suijbingz cauxguh go Vahcuengh sang daengz gaep daengx guek fathengz haenx, gij go mbaw conhciz hix vih neix ndaej haeuj cangsouloeg Bwzdu、QQ、Guzgouj caeuq gak aen KTV doxlienz daengj ciengqgo bingzdaiz. De roxnyinh miznaj dwk naeuz:“Hawj daengx- gyoengq bouxmaezgo Vahcuengh youq ndaw KTV doxlienz daengx guek ndaej diemj ciengq go Vahcuengh gienh saeh neix, gou boux daih’it guh daengz lo！”

Seizneix, dieg guhhong Luz Cwngsin mboujdan cauxguh go Vahcuengh, lij bang doiok canghgo moq Vahcuengh, vih vunzmoq raiz go、bang vunzmoq daezhawj mbwndeih ciengqgo gvangqlangh. De daegbied iugouz vunzmoq gaej daengx youq aen duenh fanciengq go liuzhingz gwnz muengx ndwi, wnggai youq gwnz giekdaej yenzsu Bouxcuengh dijbauj bae haeujlaeg gyagoeng go daihneix, yienghneix cij cauh’ok go maenhndei caencingq miz yiyi、ndaej riuzcienz daengz coglaeng haenx.

Caijfangj sat gaxgonq, gicej cam aen vwndiz gvendaengz saeh bonj- faenh de ndeu: Ndwenngoenz bonj- faenh canghgo Vahcuengh ndeu，dwg baenzlawz ndei ne?

Luz Cwngsin baez riunyumj, caem yaep ndeu cij naeuz:“Go Vahcuengh liuzhingz yienznaeuz gaenq miz haujlai bouxmaezgo, hoeng seizneix dingzlai lij dwg dan yinx go Bouxcuengh. Caeuq canghgo Vahgun miz haujlai bouxmaezgo mbon cienz yawj hoihyienjciengq doxbeij, ndwen- ngoenz canghgo Vahcuengh lij gig nanzgvaq.” De dingz yaep ndeu naeuz, “Gou yaek laebdaeb roengzrengz, dawz go Vahcuengh doi daengz baihnaj seiqgyaiq cij dwg siengj- muengh ceiqlaeng gou.”