Mbwk:

Daegbeix gaej doeknaiq,

Va baih lij dauq maenh,

Geiq neix ndaem mbouj baenz,

Gaenlaeng youh cawx ceh.

Sai:

Duzlungz mbouj dwkrengz,

Mbwn rengx caemh ndit doengx,

Doenghgo hix mbouj noengq,

Dai geij doengh haeuxnaz.

Mbwk:

Daengngoenz ciuq baihbaek,

Fwj baenzndaek baihsae,

Naihsim dawz roengzbae,

Cungj miz baez roengz fwn.

Sai:

Geiqciet gaenq gvaqbae,

Byajraez hix fouz yungh,

Maqmuengh fwnraemx cung,

Bineix ndaej fungsou.

Mbwk:

Byajraez laeng doekfwn,

Gwnz mieng cungj dwg raemx,

Doenghgo caez dwkraemx,

Maj ndaej aemyangyang.

Sai:

Doekfwn ndikfwn iq,

Mieng lij caengz ndaej rim,

Doenghgo gwn mbouj imq,

Aeu gijmaz limz gyaj.

Mbwk:

Cingj beix gaej doeknaiq,

Baenzlai raemx youq daemz,

Aeu dwk naz lienzhaemh,

Doenghgo aem fouzbeij.

Sai:

Daengngoenz baez bin hwnj,

Haemhlwenz dwn raemx coq,

Doenghgo hawqfofo,

Gwnz namh doq dek caez.

Mbwk:

Daengngoenz bin hwnj mbwn,

Banhaemh ndwnj roengz bya,

Mbouj miz di ndit dak,

Doenghgo maj mbouj mwn.

Sai:

Daengngoenz doek roengz bya,

Mboujcaiq ma doxdauq,

Rin doek roengz haijlaux,

Baenzlawz fouz hwnjdaeuj.

Mbwk:

Daengngoenz doek baihsae,

Yungh mae rag doxdauq,

Rin doek roengz haijlaux,

Aeu muengx lauz hwnjma.

Sai:

Dingq nuengx baenzneix gangj,

Ndawsim gou mbouj caem,

Ra haeuxceh ma ndaem,

Gaem seizgan youq fwngz.

（sat）