Mbwk:

Hojsik duz lwglingz,

Cingq youq rin guh’angq,

Makleiz youq henz ndang,

Feih byang fouz fap aeu.

Sai:

Baihnaj miz lwgleiz,

Aen ndei youq gwnz dingj,

Bak siengj gwnringring,

Fwngz dinj cingh yawj ndwi.

Mbwk:

Gwnz bya miz lwgleiz,

Aen ndei miz daihbaj,

Mwngz byaij bae daengz laj,

Fwngz gaem nga couh ngauz.

Sai:

Lwgmeuz naengh henz dah,

Raen bya siengj gwn gaemz,

Naemj roengz raemx bae gaem,

Lau caem roengz lajdaej.

Mbwk:

Duzgaeng youq henz dat,

Hozhat mbouj miz caz,

Hojsik meuz henz dah,

Raen bya mbouj gamj coemj.

Sai:

Seiq nyied roengz fwnraq,

Bya ndaw dah gwn faeuz,

Gou dwg duz roegraeu,

Ndwn gwnz gaeu muengh byouq.

Mbwk:

Seiq nyied raemx rim doengh,

Gyoengq bya youz ndaw faeuz,

Bouxgvai rox cang ngaeu,

Vunzhuk laeu roed deq.

Sai:

Vunz dwk muengx ndaw daemz,

Gou cang saeng caem rij,

Bya haeuj gou bae bix,

Deng bya biq okfwngz.

Mbwk:

Vunz cang setfouz bae,

Mwngz cang mae doxdauq,

Aeu couh aeu bya laux,

Mbouj aeu nyauh buenx fwngz.

Sai:

Bakmbanj miz aen mboq,

Byadoj youq ndaw gyang,

Gou dawz muengx bae cang,

De cienq ndang haeuj laeg.

Mbwk:

Bakmbanj miz diuz dah,

Byagaq youq cingqgyang,

Gwnz coq laj hix cang,

Bya baenzbang haeujdaeuj.

Sai:

Ciengx gaeq youq bakdou,

Sim gou you daengz hwnz,

Vunz caeg gaeq bae gwn,

Ce di bwn youq roengq.

Mbwk:

Nuengx daengq mwngz daegbeix,

Mbouj yungh heiq youq ndang,

Cawx dietmeuz ma cang,

Mwngz sim’angq ciengx gaeq.

Sai:

Ndaemnaz youq bakdou,

Fuengz mou youh fuengz gaeq,

Haeux yaek ndaej sou bae,

Mougaeq caeg bae gwnz.

Mbwk:

Gaiq naz bakmbanj cae,

Daeh namh laeb ciengzveiz,

Daengz nungzyoz vanq seiz,

Ei mougaeq daeuj caeg.

Sai:

Bakmbanj miz gaiq reih,

Aeu deiq ma ndaem mungz,

Vunz caeg bae baenz mbung,

Gou cawj mbaw hung gwn.

Mbwk:

Bakmbanj miz gaiq naz,

Dawz ma ndaem haeuxnah,

Cingj vunz daeuj ciemz gyaj,

Haeux sou gvaq caez gwn.

Sai:

Hojsik lai lez reih,

Doeklaeng sai seiz gvaq,

Cib nyied ngamq ndaemnaz,

Haeuxgyaj gaenq maj hoh.

（caengz sat）