Cienzgangj gaxgonq, moix bi daengz liggaeuq caet nyied ngeihcib, Mbanjcuengh raeuz gvaq Ciet- dahvangh, daegbied dwg boux guh sae caeuq boux guh dauh, moix baez daengz ngoenzneix, itdingh aeu bit aeu gaeq baiq baed caeq saenz.

Vahgangj gyangngoenz gak boux gak ranz guh doxgaiq caeq ndei le, daengz banhaemh fuemxfwdfwd, caez- gya couh guhdoih bin hwnj bya sang bae yawj ronghndwen. Gyoengqvunz daiq ngaiz naengj haj saek、faengx roxnaeuz ngaiz aeu lwgbiek bok naeng caeuq haeuxcid caez cawj, doq gwn doq yawj ronghndwen menhmenh swng hwnjdaeuj.

Gyoengqvunz cienzgangj: Gij seizheiq mwngz doeklaeng youq neix yawj ronghndwen baenz luenz rox- naeuz baenz gak, dwg rwix dwg ndei, couh yawj lwgda mwngz yawjraen gij doxgaiq maz lo. Danghnaeuz bouxlawz yawjraen aen ronghndwen luenz lumj aen yienzbaujgim, bouxde ngoenz- laeng couh fatcaiz; danghnaeuz lumj aen gox faex, couh dai roengz yaemgan; danghnaeuz lumj lwgdaeuq, bihaenx gomiuz couh ndaej demsou, doihduz ciengx baenz; danghnaeuz lumj aen daengngoenz, itdingh deng rengx; danghnaeuz yawj mbouj raen ronghndwen, cij raen baenz benq mong mok, couh deng raemx dumx.

Seizneix, Bouxcuengh raeuz mbouj saenq gij gangjfap neix lo, haemh caetnyied ngeihcib gwn caeuz sat le, daihgya couh comz youq gyanghongh, eufwen diuqfoux, angq- yangz fouzbeij.