Daegyou sam boux baez yien vaiz ok riengh, Samgoeng couh gaen youq baihlaeng gyoengqde. Gyoengq- de ngamq byaij daengz gyaeujmbanj, couh deng vunz mbanj gaemh dawz, lienzhwnz soengq daengz baicuzsoj lo.

Daegcih daeuj daengz baicuzsoj, rox saehcingz baedauq le, gouz minzgingj naeuz:“Daeglwg neix gou gaenq gyauq mbouj dingq lo, caih sou gyaeng dwk hix ndei gaj bae hix ndei.”

Samgoeng danq naeuz:“Gou yawj gyoengqde lijdwg lwgnyez, mboujnex caeux moeb gyoengqde ga raek bae, sou guh boh guh meh, gaej cij naemj bae ra ngaenz, lij aeu lai yunghsim bae son’gyauq gyoengq lwg sou cij ndaej. Sou yawjyawj, gyoengq lwg sou cungj guh gij saeh maz!”

Minzgingj dawz Daegyou、Liq- laenj、Daegngeq sam boux soengq daengz doiqnaj Daegcih naeuz:“Gyoengqde lijdwg lwgnyez, famhcoih hix dwg sou bouxgeq son’gyauq mbouj ndei. Cawjranz moix boux deng fad 500 maenz ngaenz, sou bae ra ngaenz daeuj gyau ba.”

Daegcih naeuz:“Fadngaenz guh maz, dawz gyoengqde bae gyaeng ba!”

Minzgingj naeuz:“Gyaeng dwg gyaeng lwgnyez, fadngaenz dwg fad bouxgeq. Lwgnyez lij iq guh saeh loeng, sou bouxgeq hix miz giz loek.”

Geij boux vunzgeq dingq daengz neix, bouxboux naj nyaeuq lumj lwghaemz, miz vah hix gangj mbouj ok bak lo.

Samgoeng naeuz:“Danghnaeuz dwg lan gou guh gij saeh neix, gou caenfwngz gvej hoz de bae.”

Geij boux vunzgeq dingq dwk, sim’in lumj mid heh, saeh gaenq fatseng lo, gangj caiq lai hix fouz yungh, gyoengqde cij muengh gwnz- mbwn cij haihai lwgda, gouqgouq gyoengq lwg gyoengq lan.

Ngoenzneix mbouj dwg ngoenz haw, mbouj miz ci hai bae lajmbanj.Samgoeng caeuq Daegcih gyoengqde caet bet boux vunz daj baicuzsoj okdaeuj, guhdoih byaij roen ma ranz, gwnz roen bungz daengz Dahcah. Dahcah bineix 15 bi, youq ndaw yangh doeg cuhcungh. Ngoenzneix dwg ngoenzsinghgiz, cij miz ngoenz- neix Dahcah cij ndaej ma ranz baez ndeu, cingq ngamj ndaej caeuq vunz mbanj caemh roen.

Bang vunz neix ndaetfoedfoed byaij youq gwnz loh, yawj hwnjdaeuj caeuq bouxmbanj guhdoih bae haw dauqma doxdoengz. Mboujgvaq seiz- neix gyoengqde gag boux gag miz simsaeh, it loh fouz vah.

Dahcah lij iq bohmeh de hix okrog bae dajgoeng, de youq mbanj- ranz doegsaw. Baeuqhan in dahlan neix, miz maz huq ndei gwn cungj hawj Dahcah gwn gonq. Baeuqhan mbouj rox saw, maz saeh cungj dwg Dahcah gangj ndaej suenq. Cibgeij bi daeuj, Dahcah boux dog baebae dauqdauq, mbouj miz boux cam de gwn ndaej imq mbouj imq, daenj ndaej raeuj mbouj raeuj, hix mbouj miz boux caeuq de gangjgoj guhcaemz, de bienq ndaej mbouj gangj mbouj riu, mbouj miz naemjngeix, mbouj miz maq- muengh, cij bingzbingz damhdamh gvaq saedceij.

Daegcih cam:“Dahcah, mboengq- neix boh mwngz dauq ranz gvaq lwi?”

Dahcah dap naeuz:“Bi’gvaq dauq baez he, bineix mbouj caengz dauq gvaq.”

Daegcih haenh naeuz:“Bohmeh mwngz mingh caen ndei ha, miz lwg dingqgangj youh roxsoq. Yawjyawj mwngz, doeg daengz cuhcungh gaenq maj baenz lwgsau lo, danghnaeuz lwg gou ndaej dingqvah lumj mwngz, gou dai seiz da hix ndaej laep lo.”

Dahcah mbouj rox gangj maz, cij ndei dingq dwk mbouj ok sing.

Gyoengq lwgnyez ndaw mbanj laebdaeb oksaeh, vahsug naeuz “lwg bouxlawz boux de sim’in”, bouxlawz muengh lwg gaeq miz saeh a, ndigah vunz ndaw mbanj mboujlwnh youq gyae’gyawj dajgoeng cungj dauq ranz lo. Ngoenzneix, bohmeh Dahcah mbwn caengz laep couh ma daengz ranz lo, gyoengqde raen Dahcah bak hoengz noh maeq, cuengqsim lo.

Lwglan cungj dauq comz lo, Baeuqhan sim gig angq, haemhneix daegdaengq gaj duz gaeq he guh caeuz. Gaeq dwg Baeuqhan gag ciengx, noh saed youh mbouj nyangq, naeng biz youh mbouj nywnx, rangfwtfwt, youq ndaw singz nanz ndaej gwn cungj gaeq neix.

Noh ndei aeu miz laeuj, haeux ndei aeu miz byaek. Gwn caeuz seiz, Baeuqhan couh dauj boi laeuj rimraeuh ndeu yaek ndoet. Daeglwg raen le, naeuz:“Boh, mwngz yied daeuj yied geq lo, mbatlaeng noix gwn di laeuj ba, gwn laeuj lai mboujdan haih ndang, lij rox nguh saeh dem.”

“Sou cungj gvaiq gou gwn laeuj lai, lau gou gwn laeuj lai mbouj rox ciengx lan son lan luba. Sou yawj gyoengqdoih laeuj mbouj gwn ien mbouj cit, guhdoih guenj lan, gij lan gyoengqde guhcaeg guhdoj, doek raemx dai feiz. Sou yawj dahlan gou, maj ndaej yauhyubyub, gou gwn laeuj mbouj nguh saeh, sou cuengqsim ba!”

Baeuqhan gangj le, daegdaengq cim Dahcah da ndeu, lij nip gagaeq ndenq hawj Dahcah, naeuz:“Gwn, lan gou gwn ba!”

Dahcah gaem hwnj aen gagaeq neix cingq yaek gwn, de roxnyinh dungx fan lumj mbwn cienq, lumj miz maz yaek rueg ok bak nei. De guhmuengz buet daengz doulaeng bae, aj bak rueg geij baez, youh rueg mbouj ok maz doxgaiq, hojsouh ndaej raemxda doek roengzdaeuj.

Dahmeh Dahcah raen lo, gvaqbae cam:“Dahlwg a, mwngz baenzlawz lo?”

“Mbouj rox.” Dahcah hoiz coenz vah neix le, hix mbouj siengj gwn doxgaiq, haeuj rug hwnj mbonq bae ninz lo.

Daxmeh de ndang mbouj ndei, seng Dahcah le, couh mbouj caiq seng lwg, doiq de daeuj gangj, go rangz ndeu, boux lwg dog, mbouj bengz lumj gim hix dij lumj ngaenz. Cibgeij bi neix daeuj, vihliux lai rom di ngaenz hawj dahlwg neix, de bi daengz byai youq rog guh hong, mbouj miz geijlai seizgan dauq ranz yawj Dahcah. Seizneix dahlwg bingh lo, guh meh baenzlawz cuengqsim?

Seizneix gij vunz raeuz gwn doxgaiq cab lai, boux vunz baenz maz bingh cungj miz. Ngoenzlaeng haet- romh, daxmeh Dahcah you Dahcah baenz bingh naek, couh vah unq vah van gienq Dahcah bae yihyen genjcaz.

Bohmeh Dahcah caeuq Baeuqhan soengq Dahcah bae yihyen, gyoengqde youq laj roq deq, sim diuqboebboeb cij maqmuengh Dahcah mbouj ndaej maz bingh.

Yaep ndeu canghyw okdaeuj naeuz:“Lwg lan sou mizndang lo.”

Dingq ndaej coenz vah neix, daengx ranz vunz roxnyinh mbwn laep caez.

（sat）