●Ndwen 7 ngoenz 11 hainduj, Hoznanz Swngj Anhyangz Swhfan Yozyen Dangjveij daengz Mbanjyauz Mbanjcwngzgaj Linzcwngz Cunh Bwzyinz Yangh Yungzsuij Myauzcuz Swciyen haiguh aen hozdung bang son’gyauq, aen hozdung neix guh ndwen ndeu. Ca mbouj lai 10 boux bouxgagnyienh daihhagseng daeuj son’gyauq 40 lai boux hagseng iq Yauzcuz louz mbanj vehveh、 diuqfoux、 yinx simleix daengj 12 monz yozgoh, hawj gyoengq lwgnyez gvaq mbat gyajseizhwngq angqyangz caen- saed he.

(Lungz Linzci)

●Ndwen 8 ngoenz 5, Namzningz Dietloh Giz haiguh aen hozdung ngoenz haicuengq dietloh, yungh ndwen 8 ngoenz 5 caeuq ngoenz 6 song ngoenz singgeiz neix cujciz 50 aen gyaranz yawjngonz gij gencuz geiqhauh dietloh caeuq sezbei sezsih dungceh, hawj gyoengqde haeuj gyawj roxnyinh dietloh hwngfat bienqvaq.

(Luz Boh’an)

●Geij bi neix daeuj, Liujcouh Si Yungzanh Yen giethab swhyenz vanzging caeuq dienheiq daegsaek dangdieg, sonyinx caeuq bangfuz vunzlai gungzhoj diegbya dajndaem makit song miuz, cujyau daj- ndaem makit yahwz、 vwnhgwz song cungj, guhbaenz le cungj vunqsik moq canjnieb bang- gungz dajndaem、guenjleix、siugai、cwkyo caez guh, moix moux ndaej laisou 5000 maenz baedauq, bangcoengh vunzlai gungzhoj diegbya vaiqdi vut gungz baenz miz.

(Danz Gaijhingh)

●Bineix hong ciubing hainduj daeuj, Denzyangz Yen gak gaep dangjveij cwngfuj gig yawjnaek hong ciubing, dawz hong dungyenz senhconz dang bing saeqsim guh daengz singz mbanj gyaranz moix boux bouxcoz hab bi’ndwen bae, cietsaed guh daengz senhconz caeux、 fatdoengh caeux、anbaiz caeux、 hengzdoengh caeux、doeksaed caeux, hawj gyoengq bouxcoz hab bi’ndwen gaenx- maenx bauqmingz bae dang bing.

(Vangz Gozsun)