Geij bi neix daeuj, Mbanjbyavang ingbaengh rangh guhyiengh hongsaeh dingjdaemx ietnangq, cingjhab swhyenz, lai yiengh caez guh, haenqrengz laebbaenz aen mbanjmoq gvanghfuz swnghdai “hongsaeh dingjdaemx、lajmbanj guhyiengh、vunzlai souh’ik、dieg ngamj vunz youq、hongsaeh aenmbanj ngaeudoengh、hongnaz lijyouz yungzhab” neix, aeundaej cingqyauq ndei.

Mbanjbyavang dwg aen mbanj Vangcungh Cunh Cwngzsiengh Cin Lungzanh Yen, diegyouq baihdoengnamz yienhsingz Lungzanh, liz Namzningz Baksaek gauhsuz goengloh diegokroen Siujlinz 3 goengleix gyae, dwg gizdieg cungqgyang rangh guhyiengh haedsim nungzyez ciuhneix — Aensuen Swnghdai Naednaed Haeux Guengjsae (Yinghli Gvanghfuz fatdienh hanghmoeg), sam mbiengj bya hophumx, doenghnaz naj mbanj gvangqyub, seiqhenz mbanj faexgeq daengjroeb, yienghgingj gyaeundei. Mbanjbyavang lizsij haemq nanz, daj ciuhgeq couh yawjnaek doegsaw sonsaw, Ciuhcingh ok le boux yiengsawq daih’it mingz “gaijyenz” gvaq. Daengx mbanj seizneix miz 74 ranz 294 vunz, miz reihnaz 2400 moux, sam bi gonq miz dingzlai gaenq riuzcienj hawj gunghswh doengjit dajndaem, vunzmbanj sou ngaenzco lij haeuj gunghswh dajgoeng, souhaeuj bi beij bi lai.

Bi 2015, Mbanjbyavang ndaej lied guh Namzningz Si mbanjguhyiengh cunghab, haiguh cungj mozsi hwngfat “mbanj gvanghfuz”—ingbaengh aeu rengz hongsaeh dingjdaemx Rangh Guhyiengh Gvanghfuz Swnghdai Nungzyez (Haedsim) Vangcungh Lungzanh Yen, ndaw yienh cingjhab cienzngaenz 3870 fanh maenz, saedhengz hwnjguh ranzmoq、goenggungh boiqdauq sezsih、gij gingj ngonzyawj daengj 15 aen hanghmoeg, guh ranzlaeuz moq 55 aen, cienhoengz、vax mong、dingjranz lingq、faqciengz gyaeujmax gij yiengh ranzlaeuz neix yienhok le daegsaek vwnzva “naz”, gwnz dingj ranz ancang miz gvanghfuz fatdienh hidungj doedok le gohgi ciuhneix, leihyungh ndatndit gvanghfuz fatdienh, gij dienh ndaej gaeuq ndaw ranz yungh, lw roengzdaeuj cix “gai” hawj dienhmuengx canhngaenz. Doengzseiz, lij coih ndei aen ranz gaeuq bak bi ndeu, guh raemxuq cawqleix sezsih、hawjraemx baizraemx daengj gunghcwngz, lij guh le ranzcunhsij、daizheiq、 gvangjcangz、 lanzgiuzcangz、 luengqhongh “gaijyenz”、giuzbingzan、cingjceih Huzyezyaz hawj raemx saw、hopheux aen huz bu roen rinmaxluenx、roen hopheux aenmbanj、bu roensuijniz gyang mbanj、ndaw mbanj rog mbanj ndaem faex、guh laeuzcunghab goenggungh fugsaeh daengj, hwngfat swnghdai lijyouz、“nungzgyahloz” daengj hongsaeh, cauxguh aen gingjdenj bya heu raemx saw aenmbanj gyaeundei ndeu, cungj ginghci baenqgvax nungzyez moq “reihnaz ndaem byaek gve, gwnz dingjranz fatdienh” dox giethab, comz nwngzyenz moq、ndaemganq yauqik sang、nungzyez gohbuj、youqndwi yawj gingj youq giz ndeu neix, hawj vunz raen le roxnyinh singjsien dangqmaz, aen mbanj moq swnghdai lijyouz yienghmbanj gyaeundei、dieg ngamj vunz youq ndeu okyienh youq baihnaj vunzlai lo.