Ndwen 7 ngoenz 31, Lingzyinz Yen Swcwngz Cin Lungjhau Cunh Mbanjlung’vangz geiz mbin- yagyag, ciengq go diuq foux, gizneix cingq banh ciet vwnzva “yeyau Mbanjyauz·Bunuj cimzmoq”.

Hozdung yienhciengz, gyoengq vunzmbanj ciuq gij sibgvenq ndwenngoenz dangdieg, yungh haeuxgwn guh baenz ceiz daengj doenghgij gijgwn ndei neix, caeqbaiq cojcoeng, gouz bimoq fwn yinz rumz swnh, haeuxgwn fungsou. Gyoengq vunzmbanj gag bien gag yienj 《Ngaiz Cimzmoq》《Lwg Mbanjyauz Okhaq》《Hoh Fungsou》《Fouxdajndaem》 daengj gofoux minzcuz yienghnduj lai cungj lai yiengh, langhbaij le doxgaiq gunghyi fwngzguh minzcuz gyaqciq haenx, yinx ndaej haujlai bouxhek daeuj yawjngonz youzcet. Mwh guh cezmuz lij caphaeuj cwngcwz fapgvi、 cihsiz leih beksingq caeuq gij ciengzsik vwnzva conzdungj minzcuz doxdoengh ciengjdap dem, bouxyawj laj daiz dopfwngz huhu, haenhndei mbouj daengx.

Ciuq cam rox, ciet cimzmoq dwg aen ciet conzdungj Bunujyauz dangdieg, daih cojcoeng daj- ndaem、dwknyaen gvaq ndwenngoenz, baeznaengz daengz ndwenroek haeuxyangz baenz le, gyoengqde cungj aeu haeuxyangz daengj doengh go haeux sou ma ranz gonq, guhbaenz ceiz baiq cojcoeng、 gingq saenzbya, hawj cojcoeng cimzmoq le, gak ranz gak hoh cij cingqsik bae mbaetsou.

(Loz Hihhaij/罗希海)