Sai:

Daj bakmbanj nuengx gvaq,

Raen duzmax caez hoengz,

Siengj aeu ma dwk loengz,

Hoeng de sim mbouj nyienh.

Mbwk:

Beix raen duz max hau,

Aen cauz bouxwnq gyaeng,

Mwngz roengzfwngz doeklaeng,

Bae daengz ndaw loq aeu.

Sai:

Daeuj cam duz max hau,

Vuenh cauz nyienh mbouj nyienh,

Mboujguenj geijlai cienz,

Beix ok ngaenz yien bae.

Mbwk:

Duzmax ngamq deng gyaeng,

Giemx sam caengz de foengx,

Din dik cauz mbouj byoengq,

Nanz roengz doengh bae youz.

Sai:

Hojsik vunz raen sien,

Yien duz max bae gvaq,

Gou yinhheiq daiq ca,

Gij raemxda gag conh.

Mbwk:

Mwngz caeux rox miz max,

Vihmaz mbouj bae aeu,

Bouxwnq yien bae caeux,

Mwngz daeuj ngonz dieg byouq.

Sai:

Gaxgonq mbouj miz ngaenz,

Ndaej raen mbouj ndaej cawx,

Seizneix gou daeuj yawj,

Siengj cawx mbouj miz gai.

Mbwk:

Max dwg max bonjdeih,

Mbouj feiq geijlai ngaenz,

Daeuj doeklaeng fouz faenh,

Miz ngaenz cawx mbouj ndaej.

Sai:

Hojsik govamai,

Vunz dawz byai bae gvaq,

Mbouj ndaej gwnz cixbah,

Hoeng yaek aeu laj goek.

Mbwk:

Mbatlaeng raen vamai,

Mwngz geiq gaemh byai bae,

Daengz vunz dawz bae caez,

Mwngz ndaej maz youq fwngz?

Sai:

Sam nyied miz vamai,

Caeux hai youq gwnz gyaz,

Gou byaij bae daengz laj,

Vunz caeux hah dieg gvaq.

Mbwk:

Sam nyied gizgiz va,

Gyaz beij gyaz engq moq,

Vunz buet bae mbaet doh,

Va moq mbouj caj mwngz.

Sai:

Va hai youq henz mboq,

Gwnz bo dujduj gyaeu,

Gou yaek ngeix bae aeu,

Youh miz gaeu lanz roen.

Mbwk:

Fag cax song gaen seiq,

Dwk cibngeih liengx gang,

Diem din hwnj bya sang,

Gaeu lawz vang couh raemj.

Sai:

Daj cax hix yungzheih,

Ra gang ndei daeuj boiq,

Beix siengj gwn gij oij,

Ra mbouj doiq giz ndaem.

（caengz sat）