Geij bi gonq, miz ngoenz ndeu, Laeujgeq doiq yah de Aigvei naeuz:“Naengh gwn bya baih, ninz gwn haij mboek. Mwngz mbouj miz hong guh, gou roxnaj boux ngauz laeuj he, mwngz bae bang de gai laeuj ndaej lwi?”

Aigvei dap naeuz:“Daxda lij lix seiz hix guh laeuj gai, gou youq ranz ciengzseiz bang hong, hix hag rox guh laeuj. Gou nyienh gag guh laeuj gai, mbouj nyienh bae hawj vunz guenj. Hoeng, aeu miz geij fanh maenz ngaenz guh bonj cij baenz.”

“Aeu geij fanh maenz bae a?” Laeujgeq mbouj ngeix daengz guh laeuj ndwi hix yaek aeu baenzlai ngaenz. “Geij fanh lij siuj ne, aeu cawx liuh、cong ngauz、caep cauq、caujgiciz…… Guh baenz le, gou bau mwngz ngoenz sam donq cungj miz laeuj ndei ndoet. Mboujgvaq, mwngz roengzban dauq aeu caeuq gou caez guh hong. Miz seiz mbwn laep lij aeu guh.”Aigvei menh- menh caeuq Laeujgeq gej naeuz.

“Ndaej, gou bae ciq cienz dauq raeuz caez guh laeuj!” Laeujgeq angq dwk naeuz.

Aigvei boux vunz sang hung, naj wenj da rongh caemhcaiq bwn ndaem. De guh laeuj gig nyinhcaen, lwgndo de aeu ywdoj gag guh, senj aeu gij haeux guh ndaej laeuj ndei, oemq haeuxngaiz ceiqsiuj 30 ngoenz. Gaen haeux he ceiq lai aeu gaen ngeih laeuj, baujciz gij laeuj miz 35 doh, gaen laeuj gai 6 maenz.

Laeuj mbouj gaeuq gai seiz, de hix mbouj guh gyaj, ndigah laeuj de gig ndei gai. Hainduj, Aigvei lij doz laeuj hwnj haw bae gai, doeklaeng boux yaek aeu laeuj cungj gag ra daengz ranz de daeuj cawx. Baez cawx couh aeu cibgeij gaen, miz saekseiz lij miz vunz dingh aeu hajcib gaen bak gaen. Doengzsaeh Laeujgeq ciengzseiz heuh Laeujgeq bang cawx laeuj.

Guh laeuj mbouj canh maz cienz, cijdwg ndaej ndwq ciengx mou. Aigvei ciengx miz duz moumeh he caeuq cibgeij duz moudaeg iq, nyouhhaex cienzbouh cung haeuj ndaw caujgiciz bae. Daengz ndaw caujgiciz miz heiq giciz lai, de couh aeu heiq giciz coemh feiz ngauz laeuj. Yienghneix, youh mbaet ndaej fwnzhaz, youh mbouj yungh naengh henz cauq yawj feiz, laeuj byaij youh yinz. Gvaq ndaej geij ndwen, Aigvei couh ndaej gai mbat mou hung ndeu.

Miz ngoenz singhgizloek he, Aigvei doiq bouxgvan Laeujgeq naeuz:“Ngoenzneix mwngz gueng mou caeuq gai laeuj, mwngz aeu geiq ndei boux- lawz cawx laeuj raeuz, mienx ndaej doeklaeng miz vunz luenh daeuj cauz, naeuz dwg gwn gij laeuj dou gai deng in deng bingh. Gou dawz geij gaen laeuj bae ranz daxdaiq cimq yw……” Laeujgeq bek najaek naeuz:“Rox lo, mwngz cuengqsim, gou itdingh guh ndei!”

Banhaemh, Aigvei dauq ranz, Laeujgeq gwn laeuj lai lo, gig angq doiq de naeuz:“Ngoenzneix raeuz lai canh ndaej 120 maenz lo.” Aigvei roxnyinh geizheih couh cam:“Vih- maz?” Laeujgeq gangj:“Gou aeu 20 gaen raemxheu caem ndaw biengx- laeuj bae, laeuj gaenq gai liux lo.” Aigvei baez dingq, doeksaet yat, danq naeuz:“Baezneix gven dou mbouj guh laeuj gai lo, fouz naj caez liux. Mwngz ha, danghnaeuz dang hak hung deng gaemh hix vaiq bw! Guh vunz guh seng’eiq cungj aeu lauxsaed, sim dam haih vunz hix haih swhgeij ha!” Laeujgeq baez dingq yah de baenzneix gangj, hix vueng lo, doq naeuz:“Gou…… Gou loek lo, baenzlawz guh?” Aigvei naeuz:“Laeuj cit gaenq gai okbae, ngoenzcog gai mou sat bae boiz ngaenz vunz cawx laeujgyaj suenq lo……” Aigvei gangj sat fuz Laeujgeq bae ninz lo, yienzhaeuh couh bae fan sawbouh.

Ngoenzlaeng, Aigvei dawz huz- laeuj comz youq itheij yaek okbae. Laeujgeq cam naeuz:“Dawz bae gai la?”Aigvei naeuz:“Ndaek vunz mwngz caen dwg vaih. Mwngz haih gou haemhlwenz sinhoj baenzlai, gou ciuq gij dan mwngz geiq boux cawx laeuj haenx cug mbanj cug boux hai mozdozceh bae gangj mingz cingz- gvang caemhcaiq doiq ngaenz ngoenz- haenx gyoengqde cawx laeuj dauq boizlaex. Lij doiq gyoengqde naeuz, caj gou dawz laeuj ndei caiq soengq hawj gyoengqde.”Laeujgeq baez dingq couh angq dwk haenh:“Yo! Yah gou guh ndaej bw!”

Aigvei naeuz:“Guh seng’eiq mbouj ndaej yaeuh vunz! Doeklaeng mwngz caiq baenzneix guh, gou couh mbouj guh laeuj gai lo!” Laeujgeq najmong naeuz:“Roxhit lo, doeklaeng gou itdingh lauxsaed guh vunz!”