Daegngeq naeuz ndei, baenzlawz gangj ngoenzneix hix haep vunz ndaej di ngaenz gvaq, songde boux banq mbaq boux doxcaez bae ra Liqlaenj.

Mbanjrog miz bak lai ranz, vuuz hix lai, ndaw mbanj hai miz song aen youzhisiz, lajmbanj mbouj miz boux guenj, danhfanz mwngz miz ngaenz, bouxlaux lwgnyez cungj ndaej caemz.

Mbanjranz Daegyou youq mbanj- ndaw, mbanjndaw liz mbanjrog sam goengleix baedauq, byaij din cib lai faencung couh daengz. Mbwn laep dingh le, Daegyou sam boux couh daeuj daengz mbanjrog, boux gaen boux byaij haeuj youzhisiz bae.

Bohmeh Liqlaenj caeuq bohmeh Daegngeq cungj youq Guengjdoeng guh hong, Liqlaenj caeuq Daegngeq naemj guh maz saeh hix mbouj miz bouxlawz gangj ndaej. Ndaw mbanj bit、gaeq caeuq mou daengj doihduz ra mbouj raen, cib miz bet gouj dwg songde caeg, vunzmbanj bouxboux yawj youq ndaw da haemz youq ndawsim, gij saeh guhcaeg neix mbouj ndaej gaem fwngz dawz din, bouxlawz hix mbouj gamj gangj, haemhhaenx Daegyou doek roengz laj canz Baeuqhan daeuj, vunz mbanj angq ndaej yaek bekfwngz.

Haemhneix Daegyou gyoengqde dwk denswj youzhi gaeuq seiz, gaenq hwnz lo, gyoengqde byaij daengz gyaeujmbanj, roxnyinh seiqlengq caemrikrik. Daegyou naeuz:“Haemh- neix aeu ra di “huq” cij dauqbae.” Daegngeq caeuq Liqlaenj ngaekgyaeuj caez naeuz:“Ndei!” Sam boux neix youq bakmbanj doxyaeng yaep ndeu, gietdingh bae caeg duz vaiz Samgoeng.

Samgoeng miz song daeglwg, geij bi neix cungj bae baihrog guh hong, lwgdaih miz boux mbwk caeuq boux sai song boux lwg, lwgngeih caengz baenzgya, lan mbwk Mumu 7 bi lai, youq ndaw mbanj hagdangz doeg it nienzgaep, lan sai Linzlinz 3 bi lai, mbouj caengz roxsoq, song boux lan caeuq Samgoeng Sambuz gwnyouq.

Samgoeng ciengx miz 3 duz vaiz. Gyangngoenz, Sambuz youq ranz guenj lan, Samgoeng langh vaiz bae ndoi gwn nywj. Samgoeng naemj: Daeglwg youq baihrog guh hong ndaej geijlai ngaenz mbouj youqgaenj, seizneix gou lij miz rengz, lai ciengx geij duz vaiz, daengzcog lan maj hung, dawz vaiz bae gai, hix miz ngaenz hawj lan bae doegsaw, doeklaeng caiq ciengx caiq gai, youh miz ngaenz hawj lan ok haq roxnaeuz aeu yah.

Aen riengh vaiz Samgoeng youq baihlaeng aen ranz hung de, riengh vaiz aeu aen suj hung lumj gaemxgienz nei daep dwk, gyanghwnz Samgoeng aeu hwnqdaeuj hawj vaiz dwk nywj song sam baez.

Daegyou sam boux lumh daengz aen riengh vaiz Samgoeng, sawqmwh dingqnyi miz sing hai dou, yaep ndeu cij raen Samgoeng umj gwed nywj heu he coh riengh vaiz de byaij gvaqdaeuj. De byaij daengz dou riengh vaiz, cuengq roengz gwed nywj heu, daj ndaw daehvaq mbon ok yaekseiz hai suj le venj suj youq henz, dwk nywj hawj vaiz. Dwk ndei nywj, Samgoeng caiq dawz suj daep dou riengh ndei, menhmenh byaij daengz diengzhaex bae oknyouh.

Seizneix Daegyou swhgeij con haeuj ndaw ranz Samgoeng bae, youq giz laep ndoj hwnjdaeuj. Samgoeng yawjraen lo, naemj youq ndawsim, de lumj bingzseiz doxdoengz, mbouj vueng mbouj muengz dwk byaij haeuj ranz bae, daegdaengq dawz gij yaekseiz hai dou riengh vaiz haenx hoij youq gwnz byai fa, “e, e” ae song sing, haeuj rug bae ninz lo. Samgoeng mbouj gamj roengz ninz, de daj gungx dou cazyawj Daegyou yaek guh maz.

Daegyou caj Samgoeng haeuj rug bae le, yaengyaeng byaij gvaqbae mo aeu gij yaekseiz riengh vaiz, youh menhmenh hai dou okbae lo.

Caen dwg lwgnyez guh saeh mbouj ngeix baedauq, Samgoeng caj Daegyou okbae le, de ok doulaeng bae, heuh geij boux vunzmbanj hwnqdaeuj bae gyaeujmbanj gaemh caeg. Comz ndei vunz, Samgoeng couh fanj dauq aen riengh vaiz de, youq henz riengh vaiz maeuq yawj.

Daegyou sam boux baez yien vaiz ok riengh, Samgoeng couh gaen youq baihlaeng gyoengqde. Gyoengqde ngamq byaij daengz gyaeujmbanj, couh deng vunz mbanj gaemh dawz, lienzhwnz soengq daengz baicuzsoj lo.（caengz sat）