Gizneix gorungz geq sang daemx mbwn, rumzliengz cifefe; gizneix vunzmbanj simsoh gaenxhong, depgyawj swyenz……Bodaemzbenj, aen mbanj iq diegbya gungzndoq bya sang hophumx、moix vunz bingzyaenz miz reihnaz mbouj daengz 3 moux neix, youq gak gyaiq bangcoengh lajde, roengzrengz guh song sam bi seizgan, haenqrengz gaijndei vanzging aenmbanj、coicaenh hongsaeh hwngfat caeuq gyagiengz ndaw mbanj guenjleix, caezsim okrengz hwnjguh mbanj guhyiengh cunghab, ndaej bienqbaenz aenmbanj moq sevei cujyi miz daegsaek Bouxcuengh roen doeng raemx doeng、cinghseuq gyaeundei、hongsaeh hwngvuengh ndeu.

Bodaemzbenj dieg youq baihdoengbaek Nazmaj Cin Liengzging Gih Namzningz Si, liz cin cwngfuj 6 goengleix gyae. Daengx mbanj 320 ranz 1332 vunz, Bouxcuengh ciemq 84%; miz reihnaz 4000 lai moux, gaxgonq gak ranz gag ndaem oij、haeuxnaz、duhdoem、gvehoengz、lwgmanh daengj doenghgo, 2012 nienz daengx mbanj moix vunz bingzyaenz cinghsouhaeuj 3800 maenz. Bi 2013 ndwen 7 ngoenz 9, Cunghgung Cunghyangh Cwngcigiz cangzveij、Gozvuyen cungjlij Lij Gwzgyangz bae daengz ndaw mbanj cunzyawj diuyenz, guh le aen cijsi youqgaenj “hawj minzseng gaijndei, hawj yinzminz habhoz” neix. Namz- ningz Si riengzlaeng couh dingh Bodaemzbenj guh mbanj guhyiengh cunghab, ciuq gij iugouz “Namzningz ceiq ndei、Guengjsae caiqlij daengx guek itlouz” bae hwnjguh, coih diuz roen doeng mbanj 5.65 goengleix, coih baenz 4 diuz roen doeng gij mbanj wnq gungh 4.32 goengleix, coih 10 diuz roen ndaw mbanj gungh 4 goengleix, luengqhongh bienq geng 40 diuz, hawj roen mbanj doeng seiqlengq.

Bodaemzbenj hopheux 4360 moux diegdeih guh faenzcieng, yinxhaeuj seiq aen giyez gyaeujlungz ndaw si nungzyez guhdaeuz gohgi hamzliengh sang、daiqdoengh naengzlig ak、guhyiengh yauqwngq hung haenx haeuj mbanj, ndaemganq maknongzgoet、makgam、gosisaux caeuq laebguh aen suen gangbungz byaek gve yawjngonz mbaetaeu hanghmoeg, daengx bo reihnaz doengjit riuzcienj baundaem, vunzmbanj bang giyez dajgoeng, gawq sou ndaej cienzco youh lingx ndaej ngaenzhong, souhaeuj bi beij bi lai, daengz bi’gvaq daengx bo vunzmbanj bingzyaenz cinghsouhaeuj gaenq mauhgvaq 15000 maenz; vunzmbanj lij youq dieghoengq caeuq song henz roen ndaw mbanj ndaem le gomakgaivaiz、gomakbenjdauz、gomaknam caeuq gak cungj gak yiengh gova gorum, cang lumj aensuen va faex swnghdai ranghloqhwngq haenx nei, loegheu gyaeundei.

Bodaemzbenj youq guh ndei hong ginghci doengzseiz, caemh laemxsim guh ndei hong vwnzva ndaw mbanj, laebbaenz le doihfwen leuxloh、doihgyonghwet、doih Heiqbegvah、doihlamzgiuz daengj, ngoenzciet ngoenz hongsoeng, vunzmbanj cungj comz youq giz ndeu eu fwen diuq foux, yienjheiq dwkgiuz, nauhyied dangqmaz, hawj cingsaenz vwnzva swnghhoz vunzmbanj lai cungj lai yiengh, daengx mbanj yienh’ok gij yiengh ndei caezsim doxhuz、bingzan onjdingh、haenqrengz guh baenaj ndeu.