“Cuengh hoiz”: Hawj vwnzva Bouxcuengh fatok rengzhoengh

Baihdoeng nding,

Daengngoenz hwnj,

Cungguek ok boux Mauz Cwzdungh,

De vih lauxbeksingq gvaq ndaej ndei……

Ndwen 6 ngoenz 9 hauh, youq Liujcouh Si Liujgyangh Gih Cwngz- donz Cin, Veiz Mou doq danz gizdah doq yungh Vahcuengh ciengq 《Baihdoeng Nding》, doiq bouxvunz gangj Vahcuengh naeuz, go Cuengh engq ndaej hawj vunz doenghsim.《Baihdoeng Nding》banj Vahcuengh hawj beksingq Bouxcuengh yungh gij vahgangj bonjfaenh bae sugrox gaiq go daegdingh seizdaih haenx.

Veiz Mou dwg vunz Lijgauh Cin Liujgyangh Gih Liujcouh Si, Boux- cuengh, boux minzgingj gungh’anhgiz cijveih cungsim Liujgyangh Gih ndeu, rox veh youzva、gyaezmaij ciengqgo、gig maez gizdah.

Veiz Mou bouxvunz bineix ndaej 52 bi neix genhciz lai bi aeu go Vahgun fanhoiz baenz Vahcuengh ciengq, dwg boux gingjcaz “maij ciengq go Cuengh” ndeu. Mwh vangjyouj yungh Sawgun cawqmingz hing Cuengh，dan yawj gij eiqsei cihsaw, cungj yaek hawj vunz got dungx riu dwk raemxda yaet. Veiz Mou naeuz “maij ciengq go Cuengh” dwg “fatyiengz vwnzva Bouxcuengh, gyaepgouz yisuz seiqvunz” de.

De naeuz, baez daeuz yungh Vahcuengh ciengqgo dwg bi 2011. Mwhhaenx, baengzyoux youq Guengjdoeng dang bing gvaq haenx cam de, yungh Vahguengjdoeng ciengqgo gig ndei dingq, yungh Vahcuengh ciengq baenzlawz yiengh ne? Coenz vah neix baez okdaeuj, lumj raemxgyoet rwed gyaeuj nei, hawj Veiz Mou fwt singjsag hwnjdaeuj lo, de sikhaek guh hwnj- daeuj.

“Aeu goswz Vahgun cigciep hoiz baenz go Vahcuengh, gig mbouj swnh bak, caen ciengq mbouj okdaeuj.” Veiz Mou naeuz, doeklaeng raen mbouj ndaej baenz cih baenz coenz cigciep hoiz Vahgun, dan ndaej aeu gij eiqsei ciengq okdaeuj, caemhcaiq yungh vahsug Vahcuengh、 doxgaiq beksingq ciengzseiz raen haenx bae lawh mbangjdi mingzswz, caen geijlai baez sawqyungh cungj mbouj miz loekca dahraix.

Veiz Mou dawzndei banjdaeuz ndei lo, cungj maez fanciengq go. “Baez roengzban, couh simmaez fanhoiz go liuzhingz, daengz seizneix gaenq fanciengq gvaq 100 lai aen lo, haujlai vunz aenvih gingqhaenh mingzdaeuz de，cungj daeuj cam de aeu dezgo Vahcuengh.”

Veiz Mou naeuz, beixnuengx Liujgyangh Gih dingq gvaq go Vahcuengh de le, mboujguenj rox mbouj roxnaj, cungj daeuj caeuq de aeu dezgo, seizneix gaenq soengq hawj “bouxmaezgo” baenz cien mbaw MV dezgo Vahcuengh gag danz gag ciengq de gaekloeg haenx, cungj mbouj aeu saek faen ngaenz, gwzluzgih gaenq yungh vaih 3 aen lo.

Yawjraen gij go bonjfaenh ciengq haenx baenzneix ndaej vunz angqcoux, Veiz Mou naeuz de yaek laebdaeb yungh Vahcuengh daeuj ciengq go liuzhingz, aeu vwnzva Bouxcuengh yungzhaeuj go liuzhingz bae, hawj vwnzva Bouxcuengh fatok rengzlig moq.

Cienzciengq:Hawj yaem’wenq daeuz youq Mbanjcuengh cienz

Bouxlaux ya lwgnyez ya,

Doengh lwg ae ya doengh dah,

Vunzlai gvaqdaeuj gyang neix lah,

Dingq gou ciengqgo gaej gangjvah……

Veiz Mou guhhong senhconz gungh’anh lai bi lo, bi 2012 hainduj doenggvaq go Vahcuengh yiengq vunzlai senhconz faplwd caeuq hong gungh’anh, ndaej beksingq dangdieg haenhndei, deng vunzlai dangdieg haenhbaenz “gingjcaz canghfwen mizmingz” “minzgingj canghfwen mizmingz Mbanjcuengh”.

Youq dieg comzyouq minzcuz vunznoix baenzlawz hawj engq lai vunz ciepsouh gimqdoeg gyauyuz, caencingq liz huqdoeg gyae’gyae bae, muengh gvaq ndwenngoenz gyaeundei, itcig dwg gij nanzdaez Veiz Mou youq guhhong senhconz gimqdoeg naemj gaijgez haenx. Ngoenz ndeu, Veiz Mou naemj daengz aen cawjeiq he, gij go Vahcuengh geij bi neix bonjfaenh gagcauh haenx gig ndaej beksingq dangdieg gyaezmaij, vih maz bonj- faenh mbouj cauh aen go Vahcuengh ndeu daeuj senhconz gimqdoeg ne?

De yungh ca mbouj geijlai byonghbi seizgan cungfaen diucaz yenzgiu gij sienghaih huqdoeg le, giethab gij gyaezmaij vunzlai Bouxcuengh bonjdieg, aeu fwen Bouxcuengh conzdungj yungzhaeuj liuzhingz yenzsu, aen go cauhnduj 《Go Vahcuengh Gimqdoeg》 youz de bonjfaenh raiz swz、boiq diuh、yienjciengq neix okyienj lo. Aen go neix feihdauh Bouxcuengh naekna, goswz sengdoengh、mizyinx、caensaed, swnh bak lulu、hamzngeih laegdaeuq.

Aen go gagcauh neix okdaeuj le, ndaejdaengz Liujgyangh Gih Gimq- doeg Bangunghsiz caeuq lanzmoeg 《Fapceih Liujgyangh》 Liujgyangh Gih Densidaiz haenqrengz haeujcoengh, gyoengqde baij bouxvunz ciennieb bae vih Veiz Mou loegguh le MV, riengz vehmienh hong gimqdoeg cienjvuenh, aeu aen go neix yienj ndaej cingzgingj doxyungz、vahyaem mizyinx, hawj vunz youq ndaw hingriu nyinhrox daengz gij sienghaih huqdoeg, dabdaengz aen muzdiz hemqheuh vunzlai liz huqdoeg gyae’gyae bae. Aen MV neix mwh youq “6·26” ngoenz gimqdoeg gozci youq yienh yinzminz gvangjcangz baez daeuz boqcuengq, couh yinx ndaej ca mbouj geijlai cien vunz daeuj ngonzyawj, foenfoen damqdingq youq gizlawz cawx ndaej mbaw dezgo neix.

Ngoenz daihngeih, “bouxmaezgo” Veiz Gen’gyah daengz ranz cam de aeu dezgo, de maz cungj mbouj naemj couh soengq hawj Veiz Gen’gyah ndwi. Veiz Gen’gyah aeundaej dezgo le, sikhaek buet dauq ranz boqcuengq, aen yingjdezgih ndaw ranz cuengq mbouj ok, couh aeu bae ndaw ci cuengq. Dingq liux le, youh sikhaek cawx ma aen douzyingjgih moq ndeu, haemhnaengz youq bakdou aen bouq bonjfaenh boqcuengq, yinx ndaej vunz ranznden gag daiq daengq iq daeuj ngonzyawj, vunz gvaqroen hix daengx roengzdaeuj yawj.

Haujlai vunz naeuz, daj iq gangj Vahcuengh, hix dingq fwen gvaq, hoeng, yungh Vahcuengh daeuj ciengq go liuzhingz, youh dwg cungj feihdauh wnq, ndeidingq raixcaix.

Cauhnduj: Hawj Vahcuengh youq ndaw hinggo swnjcienz hwngfat

Nuengx ya nuengx ya nuengx le,

Mwngz youq gak mbwn lawz le,

Go youq bak rog mbanj le,

Muengh mwngz lumj muengh ndaundeiq lo……

《Nuengx Ya Nuengx》aen go Veiz Mou ciuq diuhfwen mbanjranz ranghdieg Sanhgungjgiuz Baujyinz Cunh Lijgauh Cin Liujgyangh Gih cauhguh neix, dwg gangj gij goj boux lwgmbauq lajmbanj ndeu youq mbanjranz gaenxguh bienq fouqmiz le, maqmuengh bouxyoux youq diegrog dajgoeng haenx dauqma mbanjranz caeuq bonjfaenh doxcomz. Aenvih neiyungz lumj caen nei, ndigah ndaej bouxcoz dangdieg gyaezmaij.

Veiz Mou hainduj gag cauhguh go Vahcuengh, daengz seizneix gaenq cauhguh gvaq 30 lai aen go lo.“Dingq ndaej rox, gig caenciet, miz heiqsik bonjdieg, cingq dwg gij cujyau yienzaen caezgya gyaezmaij gij go cauhnduj Veiz Mou.” “Bouxmaezgo” Veiz Mou Cungh Cunzgangh yienghneix bingzgyaq gij go Vahcuengh de. Cungh Cunzgangh youq haw Lijgauh Cin guh seng’eiq, de soucomz le gij go Vahcuengh Veiz Mou.

“Bouxmaezgo” Veiz Mou miz bouxgeq heuj doek liux、lwgnyez heuj caengz hwnj liux, miz goengguhnaz youq naz caenaz, hix miz mehmbwk youq ranz guhsaeg dajcawj haenx.

Liujgyangh Gih 100 lai fanh gyaeujvunz ndawde 80% dwg Bouxcuengh, Vahcuengh dwg gij vah vunzlai ngoenznaengz yungh, eu fwen Vahcuengh hix dwg gij conzdungj beksingq. Hoeng, seizneix bouxcoz mbouj rox gangj Vahcuengh yied daeuj yied lai, mbouj haengj hag fwen, vwnzva Bouxcuengh bungzdaengz swnjcienz nanzdaez.

Liujgyangh Gih Vwnzlenz bouxfucwz mizgven dingq gij go Vahcuengh Veiz Mou gagcauh haenx liux le naeuz, youq Guengjsae haujlai vunz cungj dingq rox go Vahcuengh, hoeng gaiq cauhmoq mbouj lai, lumj gij go Vahcuengh Veiz Mou baenzneix habngamj vunz Bouxcuengh neix, vunzlai geiq ndaej ngaih caemhcaiq gyaezmaij, doiq swnjcienz vah minzcuz vunznoix miz cozyung gig hung. Aen Yozvei Fwen Guengjsae fuveicangj Vangz Yaujbingz naeuz, fwen Bouxcuengh okyienh gij yienhsiengq gatduenh, swnjcienz vwnzva Bouxcuengh wnggai gaenhwnj yamqdin gwnzbiengz, ra hwngfat lai yiengh, doenggvaq cienzciengq go liuzhingz Vahcuengh, hawj vunzbiengz maij Vahcuengh, gyaak nyinhdoengz vwnzva minzcuz.