(21)

Feiz lag nywj maj ndei,

Gaej lau feiz lag baq.

Siengj byaet ginhyinzvah,

Gaej lau nga camx fwngz.

Siengj gwn raemx Reijmboq,

Ngvat doh ma guh leij.

Siengj gwn rang gofaiz,

Reijrunghbaiz bae ra.

(22)

Baengh ndaej maex Liujcouh,

Aen gya gou mbouj sanq.

Dauqbae Hwzlungzgyangh,

Couh ndaej langh vuenyungz.

Gwn souhbyaek gvaq haemh,

Yah goj naengh bakdou.

Deng souh hoj cib bi,

Bouj ngaenz cien ngaenz fanh.

(23)

78 nienz bingzfanj,

Dauq naengh bangunghsiz.

Ngoenz gaem bit gwq sij,

Gaen hingzsi guh saeh.

Baihgwnz miz lingh daeuj,

Baihlaj aeu ciuqbanh.

Haenqrengz vih vunzlai,

Daengz ngoenz dai hix dij.

(24)

82 nienz ndwencaet,

Roeggacak bauq saenq.

Dauq diuh ma Gveilinz,

Ndawsim angq raixcaix.

Maex Liujcouh saenq fangz,

Diemj yieng baiq namz baek.

Daengq daihlwg daihlan,

Mbouj lumz dangj aencingz.

(25)

Yozyau sij baugau,

Heuh gou gyauq Sawcuengh.

Hwnzngoenz gou gwq muengh,

Vih Bouxcuengh okrengz.

Sawcuengh ceiq ndei geiq,

A、e、ei、o、au.

Lwghag lingx ndaej saw,

Ngoenz gyaez yawj mbouj cuengq.

(26)

Son Sawcuengh sam bi,

Nienzgeij daengz duiyouh.

Lwghag song bak gouj,

Sam boux haeuj dayoz.

Hagseng ok faenzcieng,

Gou caez riengz vuenheij.

Cuk geq dauq ok rangz,

Baengh rumznamz mbwn raeuj.

(27)

Son geij bak hagseng,

Gunghcoz cungj cengheiq.

Daeuj Gveilinz banh saeh,

Cungj ndaej geiq daeuj cunz.

Vunz raeuz daeuj lajmbwn,

Rox dauhleix cij deng.

Saeseng niemh ganjcingz,

Itseiq vunz cungj geiq.

(28)

Gyoengq hagseng baengzyoux,

Ndaej bang gou haujlai.

Ngoenzneix gwndaenj ndei,

Daengz dai lij roxnyinh.

Louz ndaej diuz mingh neix,

Baengh beixnuengx caez couz.

Dauq ndaej ma Gveilinz,

Suenq mingh ndei dahraix.

(29)

Daeuj lajmbwn guh vunz,

Ndaej vuenyungz couh ndei.

18 bi fouz saeh,

Gou caux ngeix gaxgonq.

Gonq deng ien’uengj saeh,

Seizneix cungj mbouj lumz.

Guenj de hoj baenzlawz,

Seizneix gvaq ndaej angq.

(30)

Baekging baek hoengzgeiz,

Gou cij meiz ngoenz van.

Daengq daihlwg daihlan,

Aeu vih dangj okrengz.

Lungz fungh caez hwnj mbin,

Vuenyungz rim diendeih.

Caih ngoenz ndit ngoenz fwn,

Mbouj lumz gungcanjdangj.

（sat）