Vihmaz cij miz mehmbwk roq longj ne? Aen neix miz aen goj riuz ndeu.

Riuz naeuz, gaxgonq miz boux lwgsai ndeu, lij iq seiz bohmeh de caez dai lo, de mbouj miz mbaenq baengh, saedceij gvaq ndaej cibfaen hojnanz. Bang ranz mbiengj doeng rap fwnz gwn can ndeu, bang ranz mbiengj sae sou haeux vuenh donq ndeu. Daengz ndang maj hung miz rengz couh haeuj ndaw bya bae vet longj. De baengh rengz swhgeij gag ciengx bonjfaenh gamjdoengh gwnzmbwn dahsien ndeu. Dahsien neix couh roengzdaeuj caeuq de doxaeu baenzranz.

Doeklaeng, gij saeh neix deng vuengzdaeq rox lo. Vuengzdaeq maez boux dahsien neix, couh naemj aeu dahsien neix haeuj vuengzgung daeuj guh yah’oiq de. Ndigah, de couh siengj aen geiq ndeu, baij vunz gaemh lwggyax neix haeuj vuengzgung, heuh de soengq duz mou ndeu lumj Byadaisanh nei naek, soengq gang laeuj ndeu laeuj lumj diuz raemxdah nei lai, soengq bit baengz ndeu lumj diuz roen nei raez, soengq aen ceiz ndeu itdingh aeu miz it fanh song cien gaen. Vuengzdaeq lij daengq gij doenghgaiq neix aeu youq ndwencieng coit soengq daengz, mboujnex couh aeu soengq yah de daeuj.

Fandauq daengz ranz, de mbouj gamj caeuq yah de gangj gij saeh neix, cij dwg baenzngoenz mbouj gwn mbouj ndoet, siengj baenzlawz bae ra daengz gij doxgaiq vuengzdaeq heuh de bae ra. Yah de cam de, de couh gangj lo. Dahsien neix rox liux, couh riu lo, cij daengq lwggyax gwn haeux gonq, de ndaej ra daengz gij doxgaiq neix.

Ndwencieng coit daengz lo, gyoengq bing youh gaemh lwggyax neix bae vuengzgung. Yaek okdou seiz, yah de soengq hawj de aen caengh ndeu、 aen rok ndeu caeuq fag cik ndeu, caemhcaiq son de baenzlawz doiq vuengzdaeq gangj.

Raen daengz vuengzdaeq, lwggyax neix ndenq aen caengh gvaqbae, doiq vuengzdaeq gangj:“Vuengzdaeq mwngz baij vunz bae caengh Byadaisanh miz geijlai naek ba, mboujnex mwngz hix mbouj rox duz mou yah gou ciengx caeuq Byadaisanh dwg mbouj dwg naek doxdoengz.” Vuengzdaeq ngeix yaep ndeu, cij naeuz:“Byadaisanh gou couh mbouj bae caengh lo, saeh neix suenq mwngz guh daengz.”

Lwggyax neix youh ndenq aen rok gvaqbae naeuz:“Vuengzdaeq mwngz baij vunz dawz aen rok neix bae daek raemxdah miz geijlai rok, gou couh bwh ndei aen gang cang ndaej baenzlai rok laeuj.” Vuengzdaeq ngeix yaep ndeu, naeuz:“Gij laeuj neix gou couh mbouj aeu lo.”

Lwggyax neix youh ndenq fag cik gvaqbae naeuz:“Vuengzdaeq mwngz baij vunz bae rau ga roen miz geijlai raez, yah gou couh gunghawj gij baengz raez doxdoengz.” Vuengzdaeq youh ngeix yaep ndeu naeuz:“Gij baengz neix mienx lo, mwngz mbouj yungh soengq daeuj.”

Lwggyax neix youh naeuz:“Yah gou cingq daem haeux guh ceiz. Gij sing roq longj ‘dong dong dong’ gaenq cienz daengz gingsingz lo, vuengzdaeq mwngz dingqnyi lwi? Guh ceiz neix ndei lo, vuengzdaeq mwngz itdingh caenndang bae aeu.” Doeklaeng Vuengzdaeq maz cungj mbouj gangj lo, couh cuengq Lwggyax neix dauq ranz lo. Gyoengqvunz cungj haenh dahsien neix mbeihung youh coengmingz.

Doeklaeng, gyoengqvunz vih geiqniemh dahsien neix, moix bi ndwencieng coit guh ceiz baij youq gwnz faengx caeq cojcoeng. Caemhcaiq youq ndwencieng coit haetromh, gyoengq mehmbwk lij yunghrengz roq longj.