Gwn cieng gvaq, Daegcih caeuq Dahriemj youh yaek dauqbae Guengjdoeng lo. Daegcih gig siengj umj Daegyou baez he, vih neix de ndenq dangz ndenq bingj, ndenq ngaenz ndenq buh moq, Daegyou cungj mbouj aeu, cij got ga daxbuz mbouj cuengq, lij heuh daxbuz vaiq daiq de bae youz, Daegcih caeuq Dahriemj raemxda loenqbyoegbyoeg mbouj dingz.

Daegcih youq baihrog guh hong sinhoj, hoeng mbouj siengj hawj lwg caeuq daxmeh youq ranzcoj gwn hoj. Ndigah Daegcih ndwenndwen geiq ngaenz dauq hawj daxmeh, heuh de mbouj caiq bae guh hong reihnaz, youq ranz guenj ndei Daegyou couh baenz.

Mbouj geij nanz, Daegyou daengz seiz bae hagdangz doegsaw lo. Hagdangz liz ranz gyae, lij aeu byaij gvaq geij aen mboq. Daxbuz mbouj cuengqsim, haetromh aemq Daegyou bae hagdangz, banhaemh youh bae hagdangz ciep Daegyou dauqma, ngoenz fwn doek mbouj dingz, ngoenz ndit ndat mbouj duenh. Daegyou daj iq couh mbouj miz bohmeh in, de ciengzciengz doiq daxbuz de guh’unj guhnyah, seizseiz mbouj siengj lizhai daxbuz de. Daxbuz de ciengz aeu ngaenz daeuj yaeuh de, daengq de dingqvah, roengzrengz doegsaw, ngeix gwn maz couh bae cawx maz.

Daegyou cib bi seiz de naeuz mbouj doegsaw lo, daxbuz de hix mbouj rox gangj maz lo, caih de maij guh maz couh guh maz. Daegcih dauq ranz baez ndeu, de naemj heuh Daegyou caiq bae doegsaw. Hoeng Daegcih youq ranz caet bet ngoenz, Daegyou mbouj haeuj ranz saek seiz, Daegcih bi gyaeuj laklak liz ranz bae lo, de gag gangj gag naeuz:“Rangz sang gvaq faex lo, rangz sang gvaq faex lo.”

Vah gangj gyae lo, caiq gangj Daegyou byaij daengz gyawj, Daegcih naeuz:“Yo, dingqnaeuz mwngz deng sieng lo, gou daegdaengq dauq ranz yawj mwngz, gij sieng mwngz ndei di caengz?”

Daegyou mbouj ok sing, hix mbouj cim Daegcih da he, cigsoh byaij haeuj ranz bae, Daegyou ruprap gwn vanj souh ndeu, youh ok doulaeng bae lo.

Daegyou bae gizlawz, Daegcih mbouj rox; Daegyou bae guh maz, Daegcih hix mbouj rox. Daegcih naengh youq gyang ranz, cim coh daxmeh, byoem aen gyaeuj daxmeh yaek hau caez lo, de sim baez soemj, raemxda yaek conh ok.

Daegcih mbouj gamj caiq cim aen naj daxmeh, hix mbouj gamj naemj daxmeh baenzlawz sinhoj, de byaij daengz bakdou, haida yawj bae, doiqnaj dwg goengq bya hung sang ndeu. Couhdwg goengq bya hung sang neix dang mbanjcoj de, hawj mbanjcoj de roen mbouj ndaej doeng, dienh hix mbouj ndaej daengz, ciengx ndaej ndaem ndaej hoeng gai mbouj bae, ndaw mbanj cib ranz miz gouj ranz gungzhoj. Laj dinbya dwg gij reih de, seizneix cib lai bi mbouj raeq lo, ndaw reih maj rim gohaz, gwnz bya faex mwn, loegauau, yawj hwnjdaeuj funggingj gyaeundei bw!

Geiqndaej bi he, Daegcih hwnj goengq bya hung he bae aeu fwnz, mbouj haeujsim couh roux roengz dat bae, gyaeuj deng saeg congh, lwed laeyeye, gyo’ndaej miz baengzyoux Daegnou aemq de ma ranz, mboujnex couh ce mingh youq gwnz bya lo.

Mbanjranz couhdwg yienghneix, mbouj miz haeux gwn, mbouj miz fwnz ndaengj, mbouj miz ngaenz yungh. Danghnaeuz mbouj dwg yienghneix, bouxlawz maij vut meh ce lwg okrog bae dajgoeng a!

Hwnz lo, lij caengz raen Daegyou dauqma. Daxmeh doiq Daegcih naeuz:“Gaej caj de lo, Bohyou mwngz bae ninz ba.” Daegcih haeuj rug bae, hoeng hwnz he hix mbouj laep da.

Mbwn yaek rongh seiz, rog ran miz vunz hemq ra Daegcih. Daegcih doq hwnqdaeuj hai dou, bakdou gaenq ndwn miz geij boux minzgingj.

Boux minzgingj he cam naeuz:“Mwngz couhdwg Daegcih ba?” Daegcih dap naeuz:“Gou couhdwg!” Minzgingj naeuz:“Daeglwg mwngz ok saeh lo, mwngz caeuq dou bae baicuzsoj baez ndeu ba!”

Dingq daengz neix, Daegcih roxnyinh mbwn laep caez, bak mbouj riengx naj mbouj swiq, engq mbouj ndaej gwn saek di doxgaiq couh gaen minzgingj ok dou bae.

Daeuj daengz bak mbanj, Daegcih raen Daxgoeng Liqlaenj caeuq Mehdaiq Daegngeq hix deng minzgingj heuh daeuj.

Vah faen song baih gangj, haemhlwenz Daegyou daj doulaeng okbae le, couh bae ra Liqlaenj caeuq Daegngeq, Daegyou doiq Daegngeq naeuz:“Haemhneix raeuz bae dwk denswj youzhi ba.”（caengz sat）