Mbanjfuzhih dwg aen Mbanjyauz gaeuqgeq vwnzva lizsij gyaenanz ndeu, gizneix miz Guengjsae raeuz aen miuhbaksaeu dog mbouj yungh saek diuz ding doqbaenz ndeu、gij rindidrag geizheih yinxvunz、aen giuzfuk yaemyieng doz miz vwnzva giuzluengq Lingjnamz rimmwd、aen ranzgangjhag Couh Dunhyiz boux cauhnduj lijyoz Ciuhsung caeuq gij ranzyouq lwglan de youq haenx……Ranzcaep、rindeu、rindaeb doenghgij neix ndawde yienh’ok le gij daegcwng vwnzva Ciuhsung caeuq dinfwngz conzdungj de.

Mbanjfuzhih dieg youq Cauz- dungh Cin Fuconh Yauzcuz Swciyen, liz yienhsingz Fuconh 40 goengleix gyae, dwg Mbanjyauz Fuconh aen mbanj gaeuq Dangz Sung ndeu, depgyawj diuz roengaeuq gvangq youh bingz doeng seiqlengq Ciuh- cinzhan guh. Gizneix mwh Bwzsung seiz couh miz vunz senj daeuj youq, daengz Nanzsung seiz hwnghoengh, seiz Mingz Cingh ceiq lai, daengz seizneix baenz le aen mbanj hung miz 1600 lai gyaeujvunz ndeu. Aenmbanj seiq mbiengj goengqbya hophumx, baenz caengz baenz caengz heu- swdswd mwncupcup lumj gaiqgekveh sengcingz gyaeundei nei; diuz dahlajdeih ndeu youq gizneix bauq raemx hwnjdaeuj mbouj dingz mbouj duenh, gyoebbaenz diuz rij raemx sawyau yawj raen daej ndeu lae gvaq gyang mbanj. Ndaw mbanj miz gij laeuzdouhung coengcug gwnz liengz deu va gwnz ciengz veh veh haenx 13 aen, ranzgaeuq funggek daegbied haenx aen dem aen baizlele youq song henz roenbenjrin; ndaw laeuz- douhung ndaw coengceiz, ndaw ranzyouq ndaw miuh, cungj baij venj miz gij mbawveh vah’ngaeux、vagut、vamoiz cangnem ndaej gyaqciq gyaeundei haenx; cueng’va goemq- dou deugaek baenz yiengh fuk luk gimyienz、goengbaed goengsaenz, diuzliengz yiemhranz gungjngaeu deugaek baenz yiengh duzroeg goge、duzlungz duzfungh lai saek lwenqda; miz “ringoengdaek”、“lozcoemhceij”、“giuzfuk”、“miuhbaksaeu” doenghgij rindeu dajcaep yienh’ok vwnzmingz haenx; lij miz daizheiq gaeuq、ranzsaw gaeuq、gaibenjrin、sigbei gaeuq doenghgij riz gaeuq ciuhgeq louzce roengzdaeuj neix dem. Miuhlingzhih ndaw mbanj dwg aen miuh ciuhgeq louzce henhoh ndaej ceiq ndei ceiq hungloet ndeu, caemh dwg ndaw guek raeuz aen miuh donghsaeu faex gig noix raen, gaenq ndaej lied guh daengx guek cungdenj vwnzvuz henhoh danhvei.

Mbanjfuzhih daengx mbanj dwg youz diuz roen benjrin raez baenz 2 leix gyae ndeu swnjciep hwnjdaeuj, cungqgyang aeu benjrin gvangq raez bu, song henz aeu benjrin seiqcingq raez cuengq daengj siengnyemh bu baenz, bingzbwd gvangqyub ndei- yawj; cungqgyang roenbenjrin rox- naeuz henz roen haujlai giz miz ndaekrin daengj hwnj, vunz ndaw mbanj heuhguh rindidrag; roen- benjrin ginggvaq vunzraeuz baenz cien bi byaij muz ndaej ngaeuz- ngubngub, mbangj giz gaenq hed mbang baenz u, louz roengz rizgeq laeglwd. Gij ranzyouq song henz roenbenjrin dwg aeu ciennding vaxheu guhbaenz, mbangj najranz aeu rindiuz guh mbaeklae bu daengz bakdou, doufaex gaeuqgat baenz caengz baenz caengz yuphaeuj, aenbouq aeu benjfaex gyoepbaenz, gvihhuq aeu daizcueng baij baenz, gij bouqdaeuhfouh、bouqsiulaeuj、bouq- caqyouz、bouqnyumxbaengz、cingj- guhceij、bouqdizdiet daengj bouq- gaeuq lij raen lw miz, moix giz moix yiengh, raemhred dwk geqnaeuz gij ronghlwenq gaxgonq. Baihnaj Miuh- baksaeu dwg dieghoengq, doiqnaj dwg daizheiq, moix daengz ngoenzciet hung, cungj miz gij heiqduenz Heiqgvei、Heiqging、Heiqgiz daengj daeuj yienjheiq, gyoengq vunzlai henzgyawj caiqlij Huznanz Gyangh- yungj、Daucouh daengj dieg, cungj gyaez daeuj gizneix yawj yienjheiq、doiq fwen、diuqfoux daengj, nauhyied raixcaix. Mbanjfuzhih aeu gij lijyoz vanzging yinzvwnz fungcingz daegbied、funggek dajcaep daegsaek yienhda caeuq gizdieg gaeuqgeq caemdingh ndeiyawj de, baenz le aen lijyouzdenj lajmbanj cawjdaeuz Hocouh Si.