(9)

Dangqgonq gou gwihmax,

Raennaj hemq guh cuz.

Neix daj caekhaex cwz,

Max giengz swenj coz saeq.

Seizneix deng sinhoj,

Fouz vunz gyoh bouxcaz.

Boux aiq dieb ngeiq heu,

Rox beuj bae coemh feiz.

(10)

Loek veh guh “youbai”,

Deng haujlai gwnvi.

Ngoenz guh hong dailix,

Haemh gwnz heiq deng daeuq.

Sinhoj caengz youh caengz,

Mbouj rox dai ngoenzlawz.

Gwq ienq deih ienq mbwn,

Gwnzbiengz nanz guh vunz.

(11)

Baengh Gajdwngh Baujyi,

Dauq gip ndaej diuz mingh.

Fwed raek dauq hwnj mbin,

Hwnjdin bae Doengbaek.

Gyoengq beixnuengx dunggvang,

Geij vunz bang cienzci.

59 nienz ndwen caet,

Gyanghaet caeg deuz mingh.

(12)

Bae daengz Gyahmuzswh,

Naengh ci aeu 5 ngoenz.

Fwn hung aen giuz goenh,

Soh deng gungz byonghloh.

Dungxiek mbouj miz cienz,

Rumh fanden ngaiz lw.

Deuz gak raen cwz ndangq,

Numj daengz ndang gag yungz.

(13)

Bae daengz Hwzlungzgyangh,

Dauq ndaej langh vuenyungz.

Duet nanh dauq baenzvunz,

Nanz lumz cingz beixnuengx.

Baengh rox saw rox sij,

Bangunghsiz hwnjban.

Yaek dai dauq ndaej beih,

It seiq cungj nanz lumz.

(14)

Haidaeuz mbwn goh raeuj,

Mbouj ngawz daeuj rumz liengz.

1968 nienz,

Gyaep ma riengz ndaw doih.

Maex Liujcouh simndei,

Riengz gou gwnvi raeuh.

Youq ndaw doih guh hong,

It ngoenz song gak cienz.

(15)

Ndeigyoh maex Liuhcouh,

Riengz gou ma lajmbanj.

Ngoenz gwn souh haeuxyangz,

Cuk lwgmanh daeuj soengq.

Suenq baz caen simsienh,

Dailix mbouj vit gou.

Gou geq de cib bi,

Yah simndei souj ranz.

(16)

Gai buhnaeng haeuj Ging,

Soengq cingz vih “gyajanq”.

Dwng Siujbingz naengh dangz,

Dauq fanndang ngoenzneix.

Guh it seiq lwgsai,

Buek dai mbouj suenq mingh.

78 nienz ndwen gouj,

Gunghcozcuj daengz ranz.

(17)

Souhnanh ndaej cib bi,

Dauqbae Hwzlungzgyangh.

Cingj cib daiz hek mbanj,

Daeuj daengz ranz caez naengh.

Bakdou diep doiqhoengz,

Lumj doxdoengz ngoenzndei.

Gunghcozcuj ciq cienz,

Cawz ien laeuj gaeq hanq.

(18)

Naengh ci baefaengfaeng,

Song haemh daengz Baekging.

Fwed raek dauq hwnj mbin,

Ndawsim angqfaifai.

Gunghcozcuj Lauxdangz,

It loh bang ok ngaenz.

Baengh miz gungcanjdangj,

“Gyajanq” ndaej gaijcingq.

(19)

Gungqsou gwn duzgvej,

Ak hix ak saekseiz.

Ngwzgvej gwn ngwzfeiz,

Hojnanz gvi duz ndwnj.

Bengj ngwzhaeuq haeb vunz,

Sien boq rumz guh ak.

Roeglaej caux rox mbin,

Buekmingh ding roegciu.

(20)

Humx byauh ndei guh suen,

Ngaiq ndaem ien guh maz.

Doenggvaq miz ngaenz hah,

Bouj ndaej raq rumz liengz.

Gaej yawj namhhoengz cienh,

Feiz coemh gvaq baenz cien.

Nae daj go lwgceu,

Rag goj heu youq laj.

（caengz sat）