Vunz Mbanjhung dajcaep goeng- fou gig nduen. Yienzlaiz cuj daihsam miz 8 vunz, Goak dang cujcangj, ndawde, 3 boux vunz gaenq miz maex, 5 boux daegmbauq dandog.

Geij bi gonq, gyoengqde lij baen daihgoeng siujgoeng, siujgoeng guh hong gyauxnaez、diuz naez、bau cien daengj, hong naek dwgrengz caemh- caiq cienz hong youh lai siuj. Hoeng mbouj miz banhfap, byawz heuh gyoengqde mbouj rox hwnj gok caepcien ne.

Goak miz daegnuengx he youq rog dang ganbu, nuengxbawx heuhguh Liuzmaeq, vunz hau youh gyaeu, daeglwg de 4 bi gaenq bae Youwzyenz lo. Nuengxbawx cij dwg youq ranz cawj gwn, ndaejhoengq de ciengzseiz bae guhdoj.

Miz ngoenz he, daegmbauq he doiq Goak naeuz:“Heuh Liuzmaeq daeuj caeuq raeuz guh hong hix ndaej ha?” Goak naeuz:“Heuh daeuj lanz loh couh ndaej, doengh yah neix dinfwngz seuqsat, guh ndaej gij hong raeuz ma?” “Naengh de guh di hong, gaej bae doj, nuengx mwngz lai soeng bw.”

Byawz rox, Goak baez sawq cam, Liuzmaeq couh nyienh bae guh hong lo, aenvih de doj saw lai deng bouxgvan de hongz lai lo.

Miz Liuzmaeq caez daeuj guh hong, hong cuj daihsam guh ndaej gig bieng, caezgya miz gangj miz riu, 5 ngoenz hong, 4 ngoenz couh guh sat lo. Caen dwg: Saimbwk doxdap, guh hong mbouj mad. Liuzmaeq mbouj luenh guh hong naek, ngamq guh songsam ngoenz, haemh baez roengz ninz couh mbouj rox doengh lo. Doeklaeng de menhmenh sibgvenq. De ngeix, boux dajcaep hong lai mbaeu caemhcaiq cienz ndaej lai, gou hix aeu hag dajcaep…… Baenzneix, Liuzmaeq doq guh hong doq cazyawj saefouh baenzlawz beng sienq、dwknaez、baenzlawz ngonz mae caep cien…… Yawj lai ndawsim Liuzmaeq miz daej lo.

Gvaq ndaej geij ndwen, miz ngoenz he, Liuzmaeq doiq daihgya naeuz:“Gou dang saefouh ndaej lo!” 8 boux de dingq le doeksaet caez, riu naeuz:“Mwngz rox caep? Dou dauq- dingq byaij baema! Ndei, mwngz daeuj hwnj gok caep loh cien ndeu hawj dou yawjyawj.”

Liuzmaeq hwnj ndaej song gok ciengz, beng ndei mae, yaep he couh caep ndaej loh cien ndeu lo. Caezgya yawj le, da cungj daengx liux, raen gij ciengz caep ndaej youh cingq youh soh youh bingz, caeuq saefouh caep ndaej doxdoengz. Daegmbauq he geizheih dwk cam:“Mehliuz seizlawz hag rox dajcaep?” Liuzmaeq naeuz:“Gou cawx ndaej 2000 gonj cien dauq youq laeng ranz, ngoenz ndaejhoengq gou couh bae ndaw daemz aeu boengz dauq lienh dajcaep. Caep mbouj cingq mbouj soh couh cek bae, cek le youh caep, caep le youh cek…… Lienh geij ndwen cij hag ndaej yienghneix ne!” Caezgya dingq le, cungj haenh Liuzmaeq miz ceiqheiq, lij naeuz yawj yaep he mbouj beij guh baez he, guh baez he mbouj beij guh ndaej lai.

Doeklaeng, 5 daegmbauq siuj- goeng haenx hix hag Liuzmaeq, baeznaengz lij heuh saefouh son di. Mbouj geij nanz, cuj daihsam bouxboux rox caepcien lo. Yienghneix couh mbouj faen daihgoeng siujgoeng lo, gyaux naez daihgya caezsim ndau, buen cien caezgya guh, caep ciengz daihgya daeb, bouxboux rox suenq gij soq boiqliuh mad ciengz.

Gyoengq vunzmbanj rox le, angq haenh gyoengqde caez okrengz, naeuz:“Gwnzbiengz fouz saeh nanz, cijaeu gaenx bae hag, cungj hag haengj ndaej rox!”