Liqlaenj doiq Daegyou naeuz:“Gou caeux couh rox duz lwg ndai mwngz miz lai sim, maz saeh cungj naemj gag gwn, baezlaeng mwngz caiq boux ndeu bae guh saeh, mwngz ngoenz dai 3 baez gou hix mbouj cienq naj coh mwngz.”

Lumhlumh giz gyaeuj in, Daeg- you roxnyinh “gag gwn ndaej gag daej mbouj mwn” coenz vah neix gangj ndaej deng lo, de gaenq lai baez boux dog okbae “guh saeh”, ngeix mbouj daengz baezneix “meuz geq doek ringj”, cien ienq fanh ienq couh ienq swhgeij mwhhaenx mbouj siujsim, caeg mbouj ndaej maz mbouj gangj, ndang in gyaeuj congh mbouj gangj, baezneix vunzmbanj bouxboux cungj rox de dwg vunz guhcaeg lo, caen dwg vunz baez boihseiz gwn raemxheu hix gaz hoz ha. Daegyou yied naemj yied hozndat.

Haicin lo, vunz mbanj bouxboux nyaengq ndaemcin, ngoenzneix dienheiq ndei, Liqlaenj、Daegngeq、Daegyou doxcaeuq bae haw youz. Gwnz hawz boux miz ngaenz naemj gwn maz couh cawx maz, angqangq riuriu, gyoengqde 3 boux cungj mbouj miz saek faen ngaenz, cijndei yawj vunz gwn、yawj vunz yungh、yawj vunz angq.

Daegngeq naeuz:“Raeuz sawq bae haep lwg hagseng iq he aeu ngaenz yawj ndaej mbouj ndaej, baenzlawz?”

Liqlaenj caeuq Daegyou cungj ngaekgyaeuj naeuz ndei.

Cingq gangj, seizneix doiqnaj couh miz dah hagseng ndaej cib bi baedauq he coh gyoengqde byaij daeuj. Daegyou 3 boux humx gvaqbae, dangj roen naeuz:“Hawj di ngaenz hawj dou, mboujnex mbouj cuengq mwngz gvaqbae.”

Dah hagseng iq neix rox saehcingz mbouj ndei, naj bienq heu liux, guhmuengz daj ndaw daehvaq mbon ok mbaw 5 maenz ngaenz he ndenq hawj Daegyou, lumj lau deng guk haeb nei vaiqvid couh buet deuz lo.

Baez nduj “haigoeng” couh ndaej ngaenz, Daegyou 3 boux angq dwk cim doxcoh riu hwnjdaeuj, gyoengqde fwngz gaem fwngz coh gyaeuj haw byaij bae, youq aen dan gai gijgwn he, daeg hagseng iq he cingq aeu mbaw 10 maenz ngaenz he cawx mak, Daegyou gvaqbae bengq geu buh de naeuz:“Mwngz sien gaej cawx mak, gvaqdaeuj, dou miz vah caeuq mwngz gangj.”

Gwnz haw boux bae boux dauq, Daegyou 3 boux daiq daeg hagseng iq daengz giz gungx ranz ndeu. Liqlaenj naeuz:“Miz geijlai ngaenz cungj gyau daeuj hawj dou ba, mboujnex roq mwngz ciengz ndeu.”

Daeg hagseng iq neix hix mbouj lau, de aj bak couh yaek heuh vunz, Daegngeq cung gvaqbae, goemq aen bak daeg hagseng iq hwnjdaeuj, Daegyou ciengj aeu mbaw 10 maenz ngaenz haenx le naeuz:“Mwngz caen mbouj lau dai ha?” Gangj sat din sauz daeg hagseng iq neix geij baez, daeg hagseng iq neix in ndaej gutgungq ringx youq gwnz namh, gouz naeuz:“Gou mbouj gamj lo! Gou mbouj gamj lo!”

Banringzgvaq, vunz haw sanq lo, Daegyou、 Liqlaenj caeuq Daegngeq 3 boux miz gangj miz riu maranz bae, ngoenzneix gyoengqde haep le 6 boux hagseng iq, sou ndaej 40 lai maenz ngaenz. Daegngeq naeuz:“Gaeuq raeuz yungh song ngoenz lo.”

Daegyou naeuz:“Ndaw daeh mbouj miz ngaenz mbouj baenz, ndaej geijlai yungh geijlai, yienghneix roengzbae raeuz seizlawz cij miz ngaenz a! Baezlaeng raeuz yaek guh couh guh ‘saeh hung’!”

Liqlaenj、Daegngeq cungj naeuz ndei.

3 boux byaij daengz gyaeuj mbanj seiz, Daegyou gyae’gyae couh yawjraen daxboh de ndwn youq lajroq, de doeksaet mbouj siuj, mbouj rox aen seizhaeuh neix daxboh de vih maz saeh dauqranz. Daegyou rox ndoj mbouj ndaej, gyajcang onj sim roengzdaeuj, ciuq bingzciengz nei mbouj vaiq mbouj menh dwk coh ranz byaij bae.

Daxboh Daegyou heuh guh Daegcih, Daegyou caengz okseng de couh bae Guengjdoeng dajgoeng lo.Daxmeh Daegyou heuh guh Dahriemj, Daegyou okseng ndaej 12 ndwen de hix bae gaen bouxgvan guh hong, ce Daegyou hawj daxbuz daiq. Gvanbaz bi daengz byai cij dauq ranz baez ndeu, cibgeij bi daeuj, ndaw sim Daegyou cij miz daxbuz mbouj miz bohmeh.

Miz bi ndeu, Daegcih caeuq Dahriemj dauq ranz gvaqcieng, seiz- haenx Daegyou 4 bi lai, gyoengqde haeuj ranz seiz, Daegyou lumj lau caeg nei cungj ndoj youq baihlaeng daxbuz, baenzlawz heuh de cungj mbouj gamj gaenh Daegcih caeuq Dahriemj. Guh bohmeh guh baenz yienghneix, ndaw sim Daegcih caeuq Dahriemj gwn raemx soemj imq dungx caez.

（caengz sat）