Bineix daeuj, Namzningz Si Gyanghnanz Gih youq cingjceih daezswng vanzging giekdaej gwnzde, gaenxmaenx damqra gij banhfap lajmbanj hwnjguh laebdaeb hwngfat, doed ok daegsaek、 ciuq dieg bae guh, hwngfat nungzyez lijyouzyez canjnieb, cauhmoq fugsaeh saedceij beksingq gwnzbiengz, haenqrengz dajcauh vwnzva cin’iq, doidoengh hwnjguh “lajmbanj habyouq”.

Aen gih neix cujciz fatdoengh Gyanghsih、 Suhhih、 Yenzanh sam aen cin caeuq Gai Sahcingj haiguh “bobo gvaqgvan” cienhangh hengzdoengh, haeujlaeg laebdaeb cingjceih veiswngh vanzging lajmbanj, gya’gvangq caeuq gyalaeg hozdung neiyungz. Geiqdoh daihngeih daeuj, aen gih neix doed ok hong cingjceih vanzging song henz dietloh, cienzmienh baizcaz cingjceih song henz dietloh diegguenjleix, baujmaenh song henz dietloh 500 mij gvaengxlaengx yawj ndaej raen haenx mbouj miz nyapnyaj doxgaiq luenh cuengq、 mbouj veizcangh daphwnj、 mbouj veizcangh nem gvangjgau daengj.

Aen gih neix cungfaen vatcimh caeuq haifat Yangzmeij Gujcin、 Dungzsinh Cunh Muzcunhboh、 Dungzgyangh Cunh Sanhgyanghboh daengj conzdungj mbanj gaeuq vwnzva swnghdai lijyouz swhyenz, yungh gij biucinj caeuq iugouz gingjgih gveihva hwnjguh cin gih lijyouz boiqdauq fugsaeh sezsih, haenqrengz cauxlaeb vwnzva canj- yezhingz swnghdai habyouq daegsaek cin’iq.

Linghvaih, aen gih neix lij dawz haiguh “lajmbanj habyouq” hozdung caeuq hwngfat nungzyez canjnieb yienghmoq gaenjmaed giethab hwnj- daeuj, cugyamq dawz Gyanghsih Yangzmeij Gujcin、 Seiqgeiq Nazlangz Swnghdaiyenz、 gwnhcuzboh, Namz- ningz Vaznanzcwngz daengj dieg lienz baenz diuz sienq, caeuq rangh ginghci hamqnamz Dahyunghgyangh doengz- yamq maeuzveh、 doengzyamq haifat、 doengzyamq hwnjguh. Doenggvaq bwhcwk cungdenj hanghmoeg、 guh ndei daezswng lijyouz gveihva、 ciu lijyouz hanghmoeg caeuq cienjhingz swnggaep lijyouz canjnieb, daiq- doengh hangznieb fugsaeh wnq hoenghvuengh hwngfat.

（Yenj Yaujyingz）