Yungzyen ciuhgonq heuhguh Yungzcouh, dwg diegcoj Yangz Gveifeih, gij diegok ceiqgonq makbugdiengz, lij dwg gyauzyangh Guengjsae ceiq hung, gij vazgyauz、vazyinz youq rogguek caeuq gij vunz youq Yanghgangj、Aumwnz couh miz 70 lai fanh vunz.

Yungzyen dwg dieg ok vunz gvai vunz ak, bouxmizmingz ok lai. Cawz Ciuhdangz gveifeih Yangz Yivanz le, seiz Minzgoz miz 300 lai boux vunz dangbing caeuq guh hak gvaq. Lij miz dieggaeuq aenyiuz cwngzgvanh Ciuhdangz Ciuhsung doenghgij dieg mizmingz neix dem. Dieg neix ok gak cungj dwzcanj cizlieng ndei, lumj makbugdiengz、maknganx、laehcei、seireh、ywfuk caeuq gaeqsamvuengz Yazyenh daengj. Ndawde, makbugdiengz youq ndaw guek caeuq guekrog gig mizmingz, youq bak bi gonq couh gunghawj Genzlungz vuengzdaeq gwn, doeklaeng Genzlungz vuengz- daeq maij gwn dangqmaz, ndigah dajciengj hawj aen coh——mak- bugdiengz. Daj seizhaenx hwnj, makbugdiengz Yungzyen couh baenz gungbinj, okmingz gwnzbiengz.

Yungzyen swnghdai vanzging gig ndei, daengx yienh ndoengfaex goemqcw daengz 68%, daj ciuhgeq gvaqdaeuj couhdwg gizdieg souh- yienz, bi 2011 daengx yienh miz vunzlaux bak bi 91 vunz, fanh boux vunz ndawde couh miz 1.1 boux; miz vunzlaux 80 bi doxhwnj 14923 vunz, bak boux vunz ndawde couh miz 1.81 boux, ndigah bihaenx ndaej soengq hawj aen baizbenj “gizdieg souhyienz Cungguek”.

Yungzyen mboujdan dwg dieg mizmingz miz daegsaek, gij swhyenz lijyouz de hix cibfaen lai. 1999 nienz, Yungzyen ndaej lied haeuj Guengjsae 15 aen yienh cungdenj lijyouz ndawde aen ndeu, hix dwg gij gingjgih cujyau Yilinz Si. 2005 nienz 7 nyied ndaej aen cwnghauh “aenyienh gig ndei lijyouz Guengj- sae”, baenz Guengjsae aen yienh dog ndaej guekgya 4A gaep lijyouzgih. Yungzyen lij miz aen gingjgih lijyouz “sam mingz”, dwg youz aen gingjgih Cinhvujgwz、aen gingjgih Ranzcoj Gveifeih caeuq aen gingjgih Byaduhgyauz sam aen gingjgih mizmingz neix gyoebbaenz, gingjsaek daegbied yinxvunz, hawj gyoengq hekyouz ndaw guek rog guek gig haengjgyaez bae youz cet.

Seizcou, gij heiq makbug hom yinx ndaej hekyouz maez. Yungzyen moix bi banh “ciet vwnzva caeuq lijyouz makbugdiengz”, hozdung gig ndeiyawj, gijgwn feih ndei caemh- caiq miz daegsaek bonjdieg, engq yinx hekyouz.