(1)

Lauxngux ok Sawvuen,

Dawz ma cienz dienyah.

Sih neix mbouj vunz maz,

Guh fwen ma danhmingh.

Meh seng caet lwgsai,

Song lwg dai biengz luenh.

Haj beixnuengx guh ranz,

Gou baizhangz daihhaj.

(2)

50 nienz gaijfang,

Bae Hozsanh giuzging.

Gauj ndaej daihngeih mingz,

Haeuj Cienjgyangj Cunghyoz.

Meh lij coz guh maiq,

Baengh cuzdaih caez bang.

Nienzgeng 40 bi,

Daengz neix goj roxnyinh.

(3)

Doeg cunghyoz bi lai,

Bik gai mehcwz ndangq.

Laeng gyaranz byouqbyangq,

Dauq ma ranz langh cwz.

Haemh siengj doh youh doh,

Cungj aeu ra loh byaij.

Meh gvangz gwnz gvangz laj,

Haq heiq mbouj ok hanh.

(4)

Nguxnyied doiq ngoenzciet,

Gwnz haw diepcih gangj.

Naeuz Yizsanh Swhfan,

Daeuj lajmbanj ciuseng.

Dangqgonq doeg swhfan,

Mbouj fanz aeu cienz bouj.

Gou sien bae bauqmingz,

Simcingz caen dwg angq.

(5)

54 nienz seizhah,

Faen bae Da’myauzsanh.

Son Lwgmyauz baenz ban,

Deng gwn nanh haujlai.

Ndawsim angqfaifai,

Haenqrengz byaij baenaj.

Baiq ganbu guh sae,

Laeng menh bae hwnjdangz.

(6)

Baujsoengq bae Gveilinz,

Haeuj Minzcuz Swhfan.

Bizyez gauj yindung,

Loek deng an “youbai”.

20 bi caengz ndaej,

Faenzcieng cienz daengz ging.

Caux goek miuz guh ndei,

Soh daengz bi gag hanh.

(7)

Yamqdin ok Gveilinz,

Dungxliengz daengz gyaeujhoq.

Yunghsim ganq baenz go,

Miuz cin soh deng nei.

Loek veh baenz “youbai”,

Haih gou byongh ciuhvunz.

Uengjfeiq dungx bitmaeg,

Dawz bae saek conghdoh.

(8)

Ndawbiengz faen baenz sam,

Gamhanh youq daihseiq.

Nienzgeng ngeihcib ngeih,

Ruz boek vih hwnjrumz.

Guh hong deng souhheiq,

Ndawsim caen mbouj gam.

Haeuj ndaw “Miuhgimsienh”,

Nyienh cang yiengh roengz gveih.

（caengz sat）