Douqhau、yiengzbya caeuq loeg- raiz cingq youq itheij guhcaemz, duz roeglaej ndeu mbin daeuj, gigi caca hemq naeuz: “Dingq gou gangj! Dingq gou gangj! Gwnz ndang duzlingz goj miz duznaenz, daxmeh de cingq bang de gaeb ne.”

Dingq le gij vah roeglaej, douq- hau sikhaek ciep gangj:“Lingzlwg baenzneix uq, gou mbouj caeuq de guhcaemz lo.”

“Dou hix mbouj caeuq de guhcaemz lo, lau duznaenz gwnz ndang de lah hawj dou.” Yiengzbya caeuq loegraiz hix baenzneix gangj.

Cingq gangj, lingzlwg couh daeuj lo. Roeglaej youh buet youh diuq ciengq naeuz:“Lingzlwg lingz- lwg caen haeucaengq, duznaenz dwg- caengz benz rim ndang.”

Lingzlwg yaepyaep lwgda, ngaez- ngwd yawj roeglaej, roxnyinh roeglaej caeuq de gangjriu, youh yawjyawj sam boux doengzdoih, couh coh gyoengqde byaij gvaqbae.

“Gaej byaij gaenh dou.” Sam boux doengzdoih doq hemq doq daenq laeng.

Raen gyoengq doengzdoih bingz- seiz caeuq de gig ndei, seizneix baenzneix doiq swhgeij, lingzlwg roxnyinh nanzgvaq lai, danqheiq gangj:“Gou guh loek maz saeh lwi?”

“Mwngz mbouj guh loek saeh lawz. Hoeng, gwnz ndang mwngz miz duznaenz, lah hawj dou, baenzlawz guh?”

Lingzlwg baez dingq, siengj daengz daxmeh de ngamq youq gwnz ndang de gaeb doxgaiq caemhcaiq ndang de ciengz haenz, couh naj hoengz lo, daej dwk buet ma ranz ra daxmeh de.

“Daxmeh, vaiq hawj gou swiq ndang ba, gyoengq baengzyoux gou yiemz gwnz ndang gou miz duznaenz, cungj mbouj caeuq gou guhcaemz lo.” Gangj sat de couh daejnganga hwnj- daeuj lo.

“Duznaenz? Gwnz ndang mwngz mbouj miz duznaenz ha!” Daxmeh de dap naeuz.

“Yienghneix, haxbaenh mwngz youq gwnz ndang gou gaeb maz? Lij aeu heuj bae haeb.”

Daxmeh riu hwnjdaeuj, gangj:“Lwg huk lai, daxmeh mbouj dwg youq gwnz ndang mwngz gaeb duznaenz, dwg naed gyu iq, ndangdaej daxmeh sihyau gyu. Byaij, daxmeh bae caeuq doengzdoih mwngz gangj- gangj, daengz gou gangj liux, gyoengq baengzyoux mwngz itdingh youh caeuq mwngz itheij guhcaemz moq lo.”

Lingzlwg caeuq daxmeh de ra daengz douqhau、yiengzbya caeuq loegraiz, duz roeglaej baklai hix youq henz. Lingzlwg buet gvaqbae, sing hung doiq de naeuz:“Vei, Sou dingq ndei! Daxmeh gou gangj lo, youq gwnz ndang gou mbouj dwg duznaenz, dwg naed gyu iq.”

“Ho ho”! Caezgya cungj riu hwnjdaeuj. Gyoengqde cungj nyinh- naeuz vah lingzlwg ndeiriu. Roeglaej youq gwnz faex youh sing soem dwk ciengq hwnjdaeuj:“Geizheih geizheih caen geizheih, gwnz ndang duzlingz maj naed gyu.”

“Sou gaej riu, neix dwg caen,” Daxmeh lingzlwg nyinhcaen dwk gangj:“Gwnz ndang duzlingz dou, bwn lai, ok hanh lai, nanz ndaej hawq. Ndaw hanh miz gyu, menhmenh couh giet baenz naed gyu iq, nem youq gwnz ndang haenznyatnyat. Haxbaenh roeg- laej raen gou youq gwnz ndang lingzlwg gaeb, couhdwg naed gyu, gou dwg nyep daeuj gwn. Mbouj saenq, sou nyep naed ndeu cimz.

“O, laxlawz dwg baenzneix.” Gyoengq doengzdoih iq cungj naj nyaenq dwk ngaemgyaeuj roengz- daeuj, roeglaej lij hawj lingzlwg boizlaex ne!