Mbwn laep ndaej iet fwngz mbouj raen haj lwgfwngz, vunzmbanj cungj ninz caem lo, seiqlengq caemrwdrwd, seizneix dwg seiznit, couh lienz duzdaek duznengz hix mbouj nyi sing.

Daegyou daeuj daengz laj roq Baeuqhan, yawjyawj seiqhenz mbouj miz vunz baedauq, de ndonj daengz bakdou Baeuqhan, laeglemx daj ndaw daehvaq mbon aeu fag mid iq he okdaeuj, menhmenh yaek haeuj dou bae.

Aen dou Baeuqhan dwg doufaex, doengxhaemh de yaek haeuj ninz le, dawz gyaek dou gven hwnjdaeuj, couh onj sim ninz daengz ranzrongh. Cib lai bi daeuj, Daeglwg Baeuqhan caeuq dahbawx cungj youq baihrog dajgoeng, bi daengz byai cij dauq ranz it、ngeih baez, dahlan de Dahcah caeuq Baeuqhan youq ranz, seizneix Dahcah gaenq doeg cuhcungh, gwn ninz youq hagdangz, ndaw ranz couh Baeuqhan boux dog gvaq saedceij.

Baeuqhan 72 bi, mbouj ndaej caiq guh hongreih hongnaz lo, daeglwg nanz mbouj nanz couh geiq sam haj bak maenz ngaenz dauq hawj de yungh.

Daegyou lumh daengz ndaw rug, dingqnyi Baeuqhan ninz ndaek gyaenfotfot, yawj daeuj yaep seiz ndiu mbouj gvaqdaeuj. Daegyou yaemj din yaemj fwngz rag geu buh Baeuqhan hoij youq gyaeuj ninz haenx gvaqdaeuj, seiq aen daeh buh cungj lumh caez, mbouj raen miz saek faen ngaenz, Daegyou naemj: Danghnaeuz haemh neix caeg mbouj ndaej ngaenz, ngoenzcog couh mbouj miz ngaenz bae guhcaemz lo. Caiq gangj ngoenzneix ciq Liqlaenj aeu 10 maenz ngaenz, ngoenzcog hix yaek aeu boiz dauq lo.

Naemj daengz neix, Daegyou hoz mbouj fug, de youq ndaw rug baenq bae baenq dauq, naemj ra gij ngaenz Baeuqhan yo youq gizlawz.

Baeuqhan gyaez gwn di laeuj, byonghhwnz ndeu dauq hix aeu gwn song amq, aen bingz laeuj couh cuengq youq laj gyaeuj ninz. Sawqmwh “byanglang——” sing yiengj ndeu, Daegyou daemj daengz aen bingz laeuj lo. Baeuqhan laihnaeuz duznou doxraih daemj deng aen bingz laeuj, daihsing hat baez ndeu. Baez sing hat neix, hwk ndaej Daegyou nyouh yaek conh dangzvaq bae.

Baeuqhan fwd hai dendwngh rongh, Daegyou couh lumj duzlingz nei guhmuengz hai dou buet okrog bae. De din baez caij hoengq, doek daengz laj canz bae lo, aen gyaeuj daemj deng rin soem, bungq miz aen congh lo, lwed laeyeye, vunz ninz vang youq gwnz namh doenghdanh mbouj ndaej.

Byonghhwnz miz vunz daj ndaw ranz buet okbae, Baeuqhan rox miz saeh mbouj ndei lo, daihsing hemq hwnjdaeuj:“Miz caeg haeuj ranz gou daeuj lo, daihgya daeuj bang gou gaemh caeg a!”

Daxgoeng ranz laj, mehbaj ranz gwnz cungj comz gvaqdaeuj lo, yaep seiz, laj roq Baeuqhan ndwn rim vunz, daihgya raen Daegyou ninz youq laj lae Baeuqhan, mbouj cam hix rox dwg maz saeh lo.

Ciuqgangj raen miz bouxsieng, gyoengqvunz itdingh gibseiz gouq vunz, baezneix mbouj doengz, vunz- mbanj raen dwg Daegyou, bouxboux biq myaiz, baenq ndang sanq bae ranz lo.

Daxbuz Daegyou dingqnyi vunz- mbanj hemq gaemh caeg, fwngz gaem aen dienhdoengz ndeu ndang saenz- digdig gvaqdaeuj yawj, raen Daegyou lwed ndingfwgfwg ninz youq gwnz namh, doq daej doq naeuz:“Yaemgoeng sonj lo, yaemgoeng sonj lo.”

Daegyou bineix 13 bi, vunz baenz mbauq youh gvailili, lij iq seiz boux raen boux gyaez, bouxboux cungj siengj cup de amq he. Seizneix de gaenq mbouj doegsaw lo, ngoenz- ngoenz guh saeh vaih.

Daxbuz aemq Daegyou daengz ranz, aeu raemx ndat swiqswiq gij lwed gwnz gyaeuj gwnz naj de seuq, aeu laeuj swiqswiq baksieng, caiq aeu gaemz ywdoj he oep dwk baksieng, doq guh doq doek raemxda.

Buz caeuq lan hwnz he fouz vah, hwnz he ninz mbouj ndaek.

Duzmou miz bang, duzyiengz miz doih.Youq ndaw mbanj, Daegyou hix miz Liqlaenj caeuq Daegngeq song boux baengzyoux, Liqlaenj beij Daeg- you hung bi ndeu, Daegngeq beij Daegyou iq song bi, gyoengqde cungj mbouj doegsaw, ngoenzngoenz guhdoih youz mbanj lauh biengz.

Daegngeq doiq Daegyou naeuz:“Mwngz hab dai lo, bae guh gij saeh neix hix mbouj heuh gou, raen dai la?”

（caengz sat）