Laeuzbaiz yiengh gaeuqgeq、ranzlaeuz cienheu baenz caengz baenz dab、roenmbanj sohsangh bingzbwd…Mwngz mboujdan ndaej bae gwnz Huzyinzhoz raemx sawyau yap ronghndit yebyeb haenx vad ruz, caemh ndaej bae ndaw ndoengfaex mwncup ndaetfwd haenx dwk roeggae, lij ndaej bae ndaw suen guhyiengh swnghdai nungzyez mbaet mak sou gve…Youq baihdoeng Luzgingj Cin Hwngzyen, miz aen mbanj gyaeundei yiengh mbanj moqsag seuqset、saedceij vuenyungz ndeu—Mbanjyinzhoz.

Mbanjyinzhoz youq henz roen- sengj 101, liz Liuj-Nanz Gauhsuz bakok Luzgingj 15 goengleix gyae. Gaxgonq mbanj neix caeuq gij mbanj bingzciengz wnq ityiengh, guh ndaej gaeuq gwn, sojmiz bienqvaq cungj dwg daj bi 2013 hainduj, bihaenx Mbanjyinzhoz ndaej dingh guh Namzningz Si gij mbanj guhyiengh cunghab ndawde aen ndeu, ndaw yienh roengzngaenz 3000 lai fanh maenz, haenqrengz doihaeuj aenranz cingjcoih、canjnieb hwngfat、haeuj- laeg gaijgwz、gihcwngz cujciz、cunhfungh vwnzmingz haj daih bouhfaenh 60 lai aen hanghmoeg iq hwnjguh. Seizneix, ngiengx gyaeuj yawj gvaqbae, baenz baiz baenz coij ranzlaeuz moq guh ndaej yinzrwd caezcup, caeuq gij raemxsaw aenhuz ndaw mbanj nem gij roen sohsad bingzbwd song henz faex heuswd haenx doxdaengh yienj gyaeu, ndeiyawj raixcaix. Ndaw mbanj gizgiz sanqfat gij rengzhoengh gangj daudwz sim sienhsoh haenx, yienh’ok cungj vwnzmingz huzndei lajmbanj moq ciuhneix ndeu.

Youq ndaw Mbanjyinzhoz menhmenh byaij cet, mwngz ndaej yawjraen, ndaw mbanj gizgiz “ndaem” doh vwnzva: Gij rin yawjngonz ndaek hung ndaek iq haenx gwnzde deu miz ngeihcib seiq cietheiq、gojgaeq conzdungj meijdwz daengj; 20 lai faqciengz gwnzde veh miz nditromh byoengq mok、sai dah hopheux、va’nding ndaw fwn daengj bet yiengh gingj gyaeu Hwngzcouh geq caeuq dajcae dawzrauq、lizsij aenmbanj daengj fukveh cawjdawz haenx, hawj vunz yawj le roxyiuj haujlai. Mbanjyinzhoz youq gyang mbanj guh le cunhsij cinzlezsiz, baij cuengq gij doxgaiq guhhong gaxgonq yungh gvaq haenx, noegcae、aenrauq、muhrin、aendoiq、gvihbeizrumz、loz- gei、laeprieng、ndoengjndij daengj yienghyiengh miz caez, Mancuengh gyaeundei、aennda lai yiengh、daeng- youz caiqlij fungsug sibgvenq aeuyah baehaq Bouxcuengh dangdieg, rox- naeuz aeu doxgaiq roxnaeuz aeu faenzcieng mbawdoz baij youq dangqnaj vunzmbanj caeuq hekyouz. Ndaw mbanj youq guh gij sezsih goekdaej vwnzva caezcup doengzseiz, yawjnaek hawj de fat ok cozyung, laebbaenz le lanzgiuzdui、vwnzyidui, heuhcomz vunzmbanj guh gak cungj gak yiengh hozdung mizik, yienjheiq dwkgiuz, dwkgeiz lienzndang, hawj vunzmbanj saedceij seiz hongsoeng caeuq doengxhaemh engq mizyinx; ndaw mbanj lij cingj lauxsae daengz ndaw mbanj, banh le vwnzmingz lijyiz、cauxnieb haenqhwnj、gisuz saedyungh daengj banbeizyin, hawj vunzmbanj lai rox cihsiz, fungfouq gij neihanz mingzcoh aenmbanj “vunzmbanj simsienh, aenmbanj doxhuz” neix.