Mboengqneix, aen go fanciengq《Fangzhwnzloq Gaeuq Dauq Luenz》ndeu youq gwnz muengx yinx ndaej vangjyouj gvangqlangh dawz haeuj sim, hoeng, gij yienzaen yinx ndaej caezgya dawz haeuj sim haenx mboujdan dwg aenvih fanciengq “ndei dingq lai”, engq dwg aenvih vah ciengq aen go neix hawj vunz dingq mbouj ok、faenbied mbouj rox.

Youq aen bingzdaiz vangjloz ciengq gajlah OK ndeu, mwh boux- ciengq aen go neix Dahsiu yungh cungj vah neix ciengq ok yaem’wenq caezgya sugrox, bouxdingq youqsienq gingqyienz miz baenz cien lai vunz. Diuh sugrox, hoeng, gij vah bouxciengq caezgya cix cungj caengz dingq nyi gvaq. Vah Daigoz? Youh roxnaeuz dwg vah Yeznanz? Vangjyouj youqsienq caezgya gujnanq yied daeuj yied lai, gak cungj vah youq gizdieg ciengq gajlah OK ciengzseiz raen haenx cungj deng caezgya cai liux lo.

“Neix dwg vah Bouxcuengh Guengjsae raeuz, Vahcuengh ha.” Youq laj caezgya iugouz haenqrem, Dahsiu bouxciengq bineix ndaej 32 bi neix dawzok aen dapanq. “Yienzlaiz dwg vah Bouxcuengh siujsoq minzcuz vunz ceiq lai guek raeuz ha, gig ndei dingq bw.” “Gij yaenqsiengq doiq go bonjdieg Bouxcuengh dan daengxyouq fwen bonjdieg, siengj mbouj daengz yungh Vahcuengh fanciengq go liuzhingz baenzneix ndei dingq, cungj vunqsik neix dwkbyoengq gij yaenq- siengq conzdungj gou doiq Vahcuengh lo.” Dahsiu bouxciengq aen go neix, deng gyoengq bouxmaezgo haenh “ciengqgo sing ndei dingq, doeg saw cingx, youq ndaw bouxciengq mehmbwk go Vahcuengh seizneix, bonjfaenh ceiq maij dingq go de ciengq lo, mbouj miz gizyawz.” Vanzlij miz bouxmaezgo naeuz“lwgsau couh dingq Siusiu”.

Dahsiu caencoh dwg Vangz Yungjsiu, deng vangjyouj ciuq Vahcuengh sibgvenq heuhguh “Dahsiu”.

Aen go ndeu hai ok diuzroen damqra yenzgiu Sawcuengh

“Gou dwg vunz Bouxcuengh, youq Yizcouh doekseng. Cuhcungh bizyez le couh daeuj daengz Liujcouh gvaq ndwenngoenz、cauhnieb, daj iq doiq fwen Bouxcuengh miz yinx naekna.” Ndwen 6 ngoenz 2 hauh, youq ndaw bouq gai mbawcaz Roen Sihgyangh Yizfungh Gih ndeu, gicej ndaej raen Dahsiu lo. Aenndang reuxiq、aennaj gvaigvet, daegbied dwg gij sing caeuq vahdiuh de, unqswnh lai raeuh lumj sing roegvenz nei. Youq ndaw bouq gai mbawcaz de, cawz daengx bouq mbawcaz, ceiq lwenqda vunz couhdwg baiz saw Sawcuengh sawloih ndeu caeuq aen dennauj lienz vahdoengz loegyaem ndeu, “gyangngoenz caeuq baengzyoux seiq fueng bet baih doxgyau vwnzva caz, gyanghaemh couh maij youq ndaw bouq ciengqciengq go, doxgyau doxgyau cihsiz Sawcuengh.”

Gizsaed, neix gaenq mbouj dwg Dahsiu baez daih’it yungh Vahcuengh fanciengq go liuzhingz lo, daj bi 2012 daengz neix, Dahsiu gaenq youq gwnz muengx yungh Vahcuengh fanciengq loegguh gvaq cib lai aen go liuzhingz caezgya dingq lai sugrox haenx, caemhcaiq gag doengh fwngz fanhoiz、ciengq gvaq sam aen go.

Dahsiu naeuz, vangjmingz Dah- siu couh hamz miz gij feihdauh vwnzva conzdungj Bouxcuengh naekna lo, “dah” ndaw Dahsiu, couhdwg daegbied ceij lwgmbwk oiq Boux- cuengh. “Ranz dou dwg ranz Bouxcuengh, daj iq gangj Vahcuengh. Gou daj iq maij ciengqgo, hoeng, aenvih diuzgienh ndaw ranz hanhhaed, mbouj ndaej caeuq lauxsae caencingq hag gvaq ciengqgo.” Dahsiu 17 bi couh gaen mehbaj daeuj daengz Liuj- couh gvaq ndwenngoenz cauhnieb, caenhguenj hong baenzlawz nyaengq, hoeng cix mbouj vutvak gij yinx bonjfaenh, riengz yinhyoz gag ngon gag ciengq couh baenz giz angq Dahsiu mwh ndwenngoenz nyaengq- nyatnyat lo. Bi 2010 hainduj, Dahsiu couh doenggvaq bingzdaiz vangjloz ciengq gajlah OK, caeuq vangjyouj daengx guek doxgyau gij fapgiuj ciengqgo. Aenvih ciengq ndaej ndei, Dahsiu youq gwnz bingzdaiz vangjloz ciengq gajlah OK gig miz mingzheiq.

Baez gihvei dingjlingz ndeu, Dahsiu ndaej dingq aen go 《Nyaenma Hau》banj Vahcuengh. Diuh go ndei dingq boiqhab Vahcuengh unqswnh, hawj Dahsiu doiq Vahcuengh miz le roxyiuj hungloet. “Gaxgonq cungj raen Vahcuengh ‘doj’ lai, fwen Vahcuengh hix mbouj hab gij gyaepgouz bouxcoz doiq go liuzhingz. Daeuj daengz Liujcouh ca mbouj geijlai mbouj gangj Vahcuengh lo, binaengz hix dan dwg dauq ranzcoj caeuq vunz ndaw ranz doxcaez youq cij gangj.” Dahsiu naeuz, dingq gvaq 《Nyaenma Hau》banj Vahcuengh le cij rox gizsaed Vahcuengh hix ndaej baenzneix ndei dingq.

“Seizneix mboujlwnh lajmbanj roxnaeuz hawsingz, bouxcoz ndaej baumaenh laebdaeb gangj Vahcuengh ngoenz noix gvaq ngoenz, sawloih、vahdiuh Vahcuengh conzdungj ban- laux miz mbangj gaenq deng lumz liux, gou siengj doenggvaq cungj fuengsik neix hawj caezgya haeujsim Vahcuengh, gyaez hwnj Vahcuengh.” Doiq vwnzva minzcuz bonjfaenh miz roxyiuj moq, Dahsiu miz le cungj siengjfap yungh Vahcuengh fanciengq go liuzhingz.

Ginggvaq ca mbouj geijlai aen singhgiz ndeu saeqsim fanhoiz caeuq lienhguh, 《Fangzhwnzloq Gaeuq Dauq Luenz》banj Vahcuengh Dahsiu youq gwnz muengx baez okdaeuj couh yinx ndaej caezgya gvangqlangh dawz haeuj sim, 《Fangzhwnzloq Gaeuq Dauq Luenz》banj Vahcuengh de lij deng boux maij ciengqgo guh baenz MV sibinz youq gwnz muengx gvangqlangh cienz ciengq. Doeklaeng, de gek duenh seizgen ndeu couh youq bingzdaiz vangjloz ciengq gajlah OK guh aen go liuzhingz banj Vahcuengh moq ndeu, boux maij ciengqgo gwnz muengx caeuq de damqlwnh vah、go Bouxcuengh yied daeuj yied lai.

Hawj engq lai vunz roxyiuj gij yinxdaeuz vwnzva Bouxcuengh

Go liuzhingz fanciengq baenz go Vahcuengh lai lo, Dahsiu yawjraen aen vwndiz ndeu: Haujlai go Vah- cuengh fanhoiz haenx “bienq Gun” gig youqgaenj, miz mbangj aen go vanzlij couhdwg ciuq vahfap Vahgun hoiz okdaeuj, doq mbouj dwg ciuq sibgvenq Vahcuengh dengcingq fan- hoiz.

“Couh lumj ‘meh gou’ aen swz neix, haujlai vunz youq mwh fanhoiz go couh hoiz baenz ‘gou dih meh’, hoeng, Vahcuengh cix mbouj miz ‘dih’, gou caz gvaq haujlai sawloih, hix cam gvaq haujlai vunzgeq cij rox, aen swz neix dwg heuh ‘meh gou’.” Doiq gij fanhoiz “bienq Gun” haujlai vunz, Dahsiu simgaenj dangqmaz.

“Gou siengj hawj caezgya dingq daengz Vahcuengh yienghnduj, cijmiz vah yienghnduj cij ceiq ndaej fanjyingj neihanz vwnzva aen minzcuz ndeu.” Fanhoiz vahgangj, ceiq youq- gaenj couhdwg aeu rox raiz, hoeng, ciengzgeiz gvaqdaeuj, Dahsiu doiq Vahcuengh dan rox gangj mbouj rox raiz.

Vihliux ndaej fanhoiz ok gij go bonjfaenh maij, Dahsiu gietdingh gaghag Vahcuengh. De doenggvaq diuzroen gwnz muengx, rox boux lauxhangz vwnzva vahgangj Vah- cuengh Vahdung Liujcouh ndeu, caemhcaiq “baiq de guh bohsae”. Dahsiu bae bouqsaw cawx《Sawloih Cuengh Gun》daengj saw, daj singmeh yinhmeh Vahcuengh daengj cihsiz giekdaej hainduj hag, baenz cih baenz cih hainduj hagsib sijfap、yaemdiuh、yaemdoeg Vahcuengh. Bungzdaengz swz mbouj rox, de couh youq ndaw ginz QQ cam gyoengq boux maij yenzgiu Vahcuengh, giethab bonjfaenh daj iq gangj Vahcuengh geiqndaej bae ra gij fanhoiz ceiq habngamj. Baeznaengz dauq ranzcoj, Dahsiu couh bae cam gyoengq vunzgeq ndaw mbanj, seizneix vunzgeq bi’ndwen hung、rox gangj Vahcuengh yiengh- nduj haenx mbouj miz geijlai lo, baeznaengz daj ndaw bak vunzgeq damqra caeuq geiqloeg ndaej swz Vahcuengh yienghnduj, Dahsiu cungj lumj ndaej bauj ceiq ndei nei geiq youq ndaw cek bitgeiq bonjfaenh.

“Mbangjbaez youq gwnz roen hai ci soengq huq bae hawj bouxhek, ndaw ukgyaeuj fwt yaep gvaq mbangjdi sawloih Vahcuengh mbouj sug ngaih lumz haenx, hix cungj sikhaek geiq youq ndaw soujgih. Okrog bungzdaengz boux yungh Vahcuengh gangjgoj, hix cungj nyaenx mbouj ndaej daengxyouq yaep ndeu siengj dingqdingq miz mbouj miz sawloih bonjfaenh caengz dingqnyi gvaq. Yied dwg haeujsim yenzgiu, yied raen Vahcuengh gyaeundei caeuq gij yinxdaeuz vwnzva Bouxcuengh.” Dahsiu naeuz.

Seizneix, swz Vahcuengh Dahsiu geiqloeg haenx gaenq raiz rim sam cek bitgeiq hung, caezcup fanhoiz ok sam aen go gag miz feihdauh vahgangj Bouxcuengh yienghnduj.

“Vah minzcuz itdingh aeu geiq- loeg, engq itdingh aeu swnjcienz. Doenggvaq yenzgiu vahgangj Boux- cuengh, hawj gou youq suijbingz vwnzva cihsiz、lingjyiz caeuq vunz baedauq doxgyau miz daezsang gig hung, gou siengj dawz cungj gyaeundei neix cienz hawj engq lai vunz.” Dahsiu naeuz, de caepcawq fanhoiz fanciengq geij aen go lwgnyez, gungganq buek “boux maez Vahcuengh iq” ndeu, hawj yenzgiu caeuq cienz ciengq Vahcuengh hawj engq lai vunz maij.