Gou dwg Cinz Genmouz,

Bouxcuengh raeuz lajmbanj,

Ndaw rungh dujdwzcanj,

Mbouj van hix mbouj haemz.

Gyoengq bouxcoz eufwen,

Sing rwenz doengz lwggyangq,

Gou bouxlaux heuj vangq,

Hix daeuj angj gij coenz.

Fwen gou rieng gaeqhangh,

Ndang dwg ndang gaeqboux,

Miz gyaeuj mbouj miz rouj,

Gaeqboux laux nanz haen.

Fwen gou maenz ndaw reih,

Van mbouj beij lwgleiz,

Dangh byawz mbouj cung’eiq,

Mbouj gwn eihmaiq biq.

Seizneix Cungguek ndei,

Gwndaenj meiz(miz) daihbaj,

Gou goengheij daihgya,

Baenaj engq lai ndei.

Goengheij coenz daih’it,

Daihgit youh daihleih,

Goengheij raeuz gak veih(gak boux),

Bineix fat daihcaiz.

Goengheij coenz daihngeih,

Hoh gak veih ndang cangq,

Boulaux sim ciengz angq,

Bang lwglan maenh’ak.

Goengheij coenz daihsam,

Lwg gyam lan coengmingz,

Gauhgauj ndaej daeuzmingz,

Doeg Baekging Dayoz.

Goengheij coenz daihseiq,

Diendeih hai valienz,

Raeuz vunzvunz miz cienz,

Beij bouxsien lij fouq.

Goengheij coenz daihhaj,

Reihnaz ndaej fungsou,

Caizsaenz haeuj bakdou,

Fouz ngaenz hix miz gim.

Goengheij coenz daihloek,

Roeggacak mbin faex,

Reihnaz roengzrengz cae,

Daengz cou caez demsou.

Goengheij coenz daihcaet,

Guenhunh yaek daeuj daengz,

Ndawsim miz fag caengh,

Daeng vih minz guh saeh.

Goengheij coenz daihbet,

Gvaqciet et baij daiz,

Nohlab hoij baenz baiz,

Cwngloengz miz haijfeih.

Goengheij coenz daihgouj,

Bouxboux daenj buh moq,

Gwnz raemx boi gim do,

Laeujnoh fox fouzbeij.

Goengheij coenz daihcib,

Vunzhuk bienq gig gvai,

Bouxhoj ndaej fatcaiz,

Daih beij daih engq fouq.

Goengheij raeuz vunzlai,

Boux fatcaiz daihbaj,

Daxbuz daenj buhva,

Couh lumj dah lwgsau.

Goengheij mwngz daihgo,

Laeujdoj caih mwngz sai,

Siengj gwn laeujmauzdaiz,

Goj haici bae cawx.

Goengheij mwngz bazsauj,

Ngoenzngoenz caux miz ngaenz,

Buh moq seizbienh daenj,

Haiznaeng rim aen loengx.

Goengheij goeng caeuq buz,

Laeuj cang huz miz lai,

Song bouxlaux caemh daiz,

Buz raix goeng dawz boi.

Goengheij mwngz goengda,

Miz bya cien ndaw rek,

Siengj gwn nohroegfek,

Youq ndaw deb gag nip.

Goengheij mwngz hauxseng,

Ra maex deng hix heih,

Guh ndaej laeuz moq ndei,

Dahsien eiq daeuj haq.

Fwen gou mbouj ndei rwenz,

Cingj canghfwen hwnj daiz,

Gaeucwz doiq gaeuvaiz,

Dingj mbwn laep mbouj cuengq.