Lwgguk coh de heuh Maengh- maengh, hoeng gij yiengh Maengh- maengh di ndeu hix mbouj maengh. Aen da de iqet, ndang de daemqdet, aensing de hix dwg gig iq gig iq.

Aenvih sing iq lai, Maengh- maengh gig lau caeuq vunz gangjvah, de cungj lau vunz yawj de, lau swhgeij gangj mbouj ok coenz vah he daeuj, engq lau singriu bouxwnq riu swhgeij haenx. Daegbied youq ndaw hagdangz, Maenghmaengh moix baez ndwn hwnj dap duzciengh lauxsae daezcam seiz, sing de couh lumj duzrwi gongznye- nye luenh mbin nei, de mbouj gamj yawj lwgda duzciengh lauxsae, engq gaej dwen yawj saek mbat daengx ban doengzhag lo.

Couh yienghneix, aenmbei Maenghmaengh hainduj bienq ndaej engq iq lo.

Song ngoenz neix, cingqngamj dwg hagdangz gawjhengz cuzgiuz doxdax, doengzhag iu de gyahaeuj doihcuzgiuz doxcaez camgya doxdax, hoeng Maenghmaengh lau lwgda bouxyawj yawj de, hix mbouj rox baenzlawz caeuq doengzdoih gangj- vah. Maenghmaengh gietdingh ndoj hwnjdaeuj, yienghneix, cuengqhag le, Maenghmanegh ma daengz ranz couh ndoj hwnj gwnz bam bae.

Gwnz bam miz di nit, Maenghmaengh haetcwi mbat ndeu, de ra fan damj he goemq youq gwnz ndang, yienzhaeuh gutgungq youq gwnz eij, raq rumz nit he ci youq gwnz naj Maenghmaengh, Maenghmaengh gamjdaengz swhgeij bienqbaenz duz- moedndaem yienghhaenx iq. Maengh- maengh mbin ha mbin ha, de mbin gvaq diuz dah iq ronghmyagmyag he, mbin gvaq duj fwjhau unqnemnem he, doeklaeng mbin daengz gwnz duj vahenj ndaw reih vahhenj haenx.

Song duz mbungqmbaj gyaeundei yawjraen Maenghmaengh lo, gyoengq- de angq dwk ciengqgo, cingj Maenghmaengh hix daeuj camgya aen hoih mbungqmbaj diuqfoux yaek gawjhengz haenx.

“Hoeng gou dwg duz guk iq he, aensing gou youh gig iq. Aenvih gou lau caeuq vunz gangj vah.” Mwh Maenghmaengh gangjvah aennaj de ndingfoedfoed.

“Mbouj youqgaenj law, doxcaez ciengqgo ba, cijaeu mwngz mbeihung lo, sing mwngz couh bienq ndaej gig hung gig hung.” Song duz mbungqmbaj vad song gaiq fwed gyaeundei gangj dwk.

Maenghmaengh miz di mbouj saenq, hoeng, aenhoih diuqfoux hung- hwd haenx gaenq hainduj lo.

Seizde, baenz cien duz mbungq- mbaj mbin daengz cungqgyang reih vahenj bae, gyoengqde humx baenz gij yiengh aen gienva he, vad gaiqfwed, angqyangz dwk diuqfoux ciengqgo. Maenghmaengh ndwn youq gwnz limq vahenj haenx hix dawzok damjliengh gyahaeuj doihciengqgo mbungqmbaj, aensing Maenghmaengh gingqyienz bienq ndaej yied daeuj yied hung, mbei de hix bienq ndaej yied daeuj yied hung lo.

Maenghmaengh ciengq ha ciengq ha, daj banngaiz ciengq daengz daengngoenz roengzbya, daj duj vahenj neix ciengq daengz lingh duj vahenj bae. De roxnyinh ndang swhgeij bienq ndaej yied daeuj yied maengh, ndangsang de hix bienq ndaej yied daeuj yied sang.

“A’ha……” Mwngz yawj, Maenghmaengh laep ndaet aenda de, ciengq ok sing ceiq sang he.

Caj Maenghmaengh hai da, aenrug de miz haujlai vunzhek, Maenghmaengh yawjraen le daxboh daxmeh, yawjraen le dahcej duzcenh caeuq bohlungz duzvaiz ranznden. Aeya, lij miz duzciengh lauxsae caeuq geij boux doengzhag dem!

“Maenghmaengh, laxlawz mwngz ndoj youq gizneix ha!” Daxmeh umj dawz Maenghmaengh gikdoengh dwk naeuz. Mwhde, daihgya cungj yungh aenda gvensim yawj dwk Maengh- maengh daj ndaw loq ndiu gvaqdaeuj haenx.

Hoeng Maenghmaengh youq mwhde yawj dwk lwgda daihgya gvensim de haenx, di ndeu hix mbouj lau lo, de mbouj gaenj mbouj menh iet genfwngz iq de, yungh aensing gig hung gig hung de naeuz: “Gou yaek camgya cuzgiuz doxdax! Aenvih gou mbouj caiq dwg boux Maenghmaengh mbeiiq haenx lo, hix mbouj caiq ndoj youq ndaw gungxgox lo.”

Daihgya yawjraen Maengh- maengh mbei bienq hung neix, mwngz yawjyawj gou, gou yawjyawj mwngz, cungj angq riu lo.

(Cangh Yenh)