Diegseng gou miz cungj nywj ndeu, heuhguh nywjva’nding. Go rum neix maj ndaej gig maenh’ak, youq ndaw naz dieg baihnamz dou, dauqcawq cungj yawjraen rizdin de.

Seizdoeng nitsisi、gaekriengrieng, doenghgo caeuq gofaex haujlai gaenq ndoqndangndang lo, go nywjva’nding lij dangjfwn dangj- rumz dwk maj gij goek youq laj namh!

Seizcin ngamq daengz, ndaw naz mbouj miz saek di saekloeg, go nywjva’nding ngwn dwk ciengj gonq lau laeng daj ndaw goekfiengz bi’gvaq maj okdaeuj. Mbaw de heuswdswd、mwncupcup, gwnz ganj oiq hai miz duj va nding iq, lumj gingz bog feiz ndeu nei, ndeiyawj dangqmaz.

Ndwenngeih, bak va caez hai, go nywjva’nding youh fouzeiq caeuq gyoengq va wnq doxceng, va de iq, couh ndoj youq ndaw mbaw mwn.

Laengcin gyoengqva loenqfoenfoen, va go nywjva’nding ngwn dwk ndwn youq gwnz ganj, seizneix va de cij rangfwdfwd, heiqhom gyuemluemz gwnzbiengz, hoengheiq lumj iemq haeuj dangzsei nei, yinx ndaej gyoengq rwi daengx ngoenz geuj heuz henz aeu vafaeux.

Moix daengz seiz ndaemnaz, go nywjva’nding youh deng fan haeuj ndaw namh bae, bienqbaenz bwnhfoed ndei, vih seizcou ndaej demsou vut mingh swhgeij.

Gyoengqvunz cungj naeuz haeux mbanj gou gwn ndaej van, cawj cuk mbouj coq dangzhau lwgnyez hix gyaez gwn. Gou nyinhnaeuz goulau aenvih vunz mbanj gou aeu go nywjva’nding guh bwnhfoed ba!