1985 nienz 6 nyied, banhaet, bouxsoengqsaenq hai gyaq danci beq aen daehfanzbu daeuj daengz bak mbanj cam naeuz:“Moz Lijginz youq ranz lwi?”

Boux mehsimj ndeu han naeuz:“De ok rog dajgoeng lo, daxmeh de youq ranz.” Seizneix, boux mehmbwk cungnienz ndeu byaij gvaqdaeuj, de couhdwg daxmeh gou. Daxmeh gou daj ndaw fwngz bouxsoengqsaenq dawz gij doxgaiq gou dauq.

Ndwenlab ngeihsam, gou ma ranz, daxmeh gou gig vuenheij, lau gou dungxiek, gipmuengz cawj faenj hawj gou gwn. Deq gou gwn imq lo, de haeuj ndaw rug dawz dab baengznong okdaeuj cuengq youq gwnz daizcaet, baez caengz baez caengz haiok. Yenzlaiz ndaw baengz dwg mbaw bauqceij, gou miz di geizheih. Daxmeh doiq gou naeuz:“Neix dwg mbaw bauqceij geiq hawj mwngz, gou lau de deng duzsap roxnaeuz duznou haeb bae, ndigah aeu baengz duk hwnjdaeuj ce hawj mwngz.”

Neix dwg mbaw 《Bauq Saw- cuengh》1985 nienz 9 nyied 14 hauh ngoenzhaenx okbanj. Song fwngz gou dawz mbaw bauq neix, bienj daengz banjdaihngeih, gwnz de fatbiuj sawcuenh dinj gou, daezmoeg heuhguh《Dauq Yamq Haeuj Hangzmou》! Yawj bien sawcuenh neix ndawsim gou geijlai doxndiep geijlai ndeigyaez ha! Lumjbaenz doiq gou naeuz, cijaeu buekguh haengjdingh baenz!

Henz ndang daxmeh riunyum- nyum yawj gou, ndaw lwgda cungmuenx maqmuengh. “Ngoenz- haenx”, daxmeh naeuz, “Bouxsoengq- saenq ndenq mbaw bauqceij hawj gou, doiq gou naeuz:‘Daeglwg mwngz youq gwnz bauqceij fatbiuj bien faenzcieng ndeu, ndaej cienzsijgauj bet maenz haj gak, mbaw fei cienzsijgauj neix dawz bae dadui goepyaenq le couh daengz youzdensoj bae lingx cienz.’ Vunz ndaw mbanj rox le cungj goenghoh gou, dawz mbaw bauqceij neix cienzyawj, bouxboux cungj yawj mbouj rox, miz boux lauxsae naeuz lumj dwg Yinghyij. Gou naeuz：‘Neix dwg Sawcuengh, gij saw Bouxcuengh raeuz, daeglwg gou gaenq hag buenq bi lo.’Auliengz naeuz:‘Miz gihvei gou hix hag, hag rox le aeu daeuj geiq fwen.’ Go’gvei naeuz:‘Sawcuengh gaenq yaenq hwnj gwnz ngaenzceij, baihgwnz yaek aeu doigvangq hagsib Sawcuengh.’ Gou naeuz:‘Bouxcuengh raeuz gaxgonq rox gangj mbouj rox sij, lumjbaenz noix maz, seizneix ndei lo, dauqdaej miz saw swhgeij lo.’ Ngoenz daihngeih, gou bae dadui goepyaenq le daengz youzdensoj lingx ndaej bet maenz haj gak ngaenz, dawz song maenz haj gak bae cawx ndaej haujlai doxgaiq.” Daxmeh gangj ndaej gig mizyinx.

Gij ngaenz neix doiq daxmeh daeuj gangj, ndaej cawx haujlai doxgaiq, hoeng doiq gou youh dwg gij yiyi wnq, neix dwg gujli gou laebdaeb sij faenzcieng, neix cijdwg fanh leix cangzcwngh ngamq byaij yamq daih’it, lij aeu engqgya roengzrengz. Daj seizhaenx hwnj, gou couh amq roengz gietsim: Doeklaeng aeu Sawcuengh sij ok engq lai coz- binj!

Danhseih, seizhaenx gou mbouj ndaej ansim laebdaeb sij roengzbae. Daegnuengx gou doeg gauhcungh, daxboh gou dwg vunzguhnaz, daxmeh gou dang duicangj ndaw mbanj, gou ngamq aeu yah, daengx ranz cij miz naz haj moux, gvaqcieng le gou couh youh okbae ra cienz lo.

Daj cien buen vax, beuj naez vat gvangq…… Daj bouxdajgoeng daengz dang lauxbanj, youh daj dang lauxbanj daengz bouxdajgoeng. Seiqvunz gou couh lumj raemxlangh, vaeg hwnj vaeg roengz. Guh seng’eiq siedbonj, ra hong guh youh deng vunz yaeuh cienz, mehyah ndatheiq yaek deuz. Gwnz- biengz haujlai saeh rwix gou cungj deng. Gou nyapnyuk simgaenj, gou doeknaiq simndum, gou saetmuengh simliengz! Baihnaj mokfoenfoen, gou yawj mbouj daengz seiz ndei……

Baez siengj daengz Sawcuengh, gou youh miz rengz lo. Gou daj seiziq couh ndiepgyaez sij faenzcieng, yawj gvaq haujlai saw, 18 bi seiz youq 《Majsanh Vwnzyi》 caeuq 《Vujmingz Vwnzyi》 fatbiuj sei caeuq fwen. 24 bi doiq Sawcuengh miz yinxdaeuz, couh bae riengz Vangz Gencangh lauxsae haghag singmeh、 yinhmeh caeuq singhdiuh, gvaqlaeng couh gag hag buenq bi, couh sij baenz sawcuenh dinj 《Dauq Yamq Haeuj Hangzmou》.

Baez yaep da, 30 bi gvaqbae lo, yaek dawz hwnj bit aeu Sawcuengh sij faenzcieng moq. Hoeng, Sawcuengh gaenq lumz seuqsatsat. Cingj beix- nuengx Moz Lijfungh bang ra swhliu, de youq Majsanh Yen yinzminz cwngfuj gunghcoz, bang ra ndaej song bonj sawloih, bonj ndeu naeng henj, bonj ndeu naeng heu, bienj bae bienj dauq cih ndeu cungj mbouj rox doeg, gou ienqhoij yaek dai, ra mbouj ndaej lauxsae son gou, song bonj sawloih lumjbaenz song goengq bya hungsang dangj youq baihnaj gou nei.

Mbouj ndaej vutvak! Bet maenz haj gak ngaenz youq ndawsim gou hemqswenj! Gij ngaenz neix, daj gyaeuj daengz byai gaenq mbouj cij dwg ngaenz lo, de dwg aen ceij- namzcim ndeu, ceijyinx gou buet baenaj coh aeu Sawcuengh sij faenzcieng. Cijaeu lij miz gaemz heiq ndeu, gou couh caiq hix mbouj cuengq roengz de lo! Cungj dwg siengj hwnj bihaenx daxmeh lingx ndaej gij cienzsijgauj bae cawx huq dwg baenzneix angq, vunz ndawmbanj rox gou rox aeu Sawcuengh sij faenzcieng lij ndaej fatbiuj dwg baenzneix hozhaenz.

3 bi seizgan, gou daiq song bonj sawloih youq gwnz ndang, byaij daengz gak dieg bae dajgoeng, moix ngoenz banhaemh sai song aen cungdaeuz bae maeq, cungjsuenq ndaejgeiq hwnj di baenzlawz bae doeg lo, seizneix rox aeu Sawcuengh sij faenzcieng moq lo.

Bet maenz haj gak, youq ndawsim gou, couh lumj daengngoenz nei hoengzfwgfwg、ronghsagsag, hawj daengx ndang gou raeujrubrub!