Geij bi neix daeuj, Yayiz Cunh ciuq gij dajveh hwngfat “swnghdai laeb yienh, daegsaek hwng yienh” ndaw yienh bae guh, haenqrengz cauxguh gaiqbaiz swnghdai、lijyouz caeuq daegsaek nungzyez, dem guh gij hongsaeh nungz linz ndaem gosangh ciengx nonsei、ciengx douqnoh daengj, hawj Mbanjyauz engq gyaeundei yinx vunz, caemhcaiq baenz le “aenmbanj henhoh conzdungj Cungguek”“aenmbanj daegsaek minzcuz siujsoq Cungguek”, lij ndaej baecinj hawj “mbanj guhyiengh hwnjguh daegsaek bonjdieg Guengj- sae” dem.

Yayiz Cunh dieg youq baihdoengnamz Yayiz Yauzcuz Yangh Mungzsanh Yen, dwg giz diegyouq yangh yinzminz cwngfuj, liz yienhsingz 23 goengleix gyae. Daengx cunh miz 6 aen mbanj swyenz gungh 535 ranz 1583 vunz. Aenmbanj youq Ciuhcingh Dungzci nienzgan hainduj baenz mbanj, sien dwg beixnuengx Cazsanhyauz comzyouq, daengz Gvanghsi nienzgan baenz haw le, beixnuengx Banzsanhyauz caemh ciemhciemh senj daeuj youq. Bakmbanj dwg diuz lueglaeg Yayiz raez baenz 1.2 goengleix, diuz rij raemx sawyau ndeu hopheux aenmbanj ngutngeuj lae gvaq, youq gorungz hungsang gyaeujmbanj raemhrwd goemqcw lajde, 500 lai aen ranz Yauzcuz namh faex、ciensiu ciennaez caep baenz haenx hopheux aenhaw daengjbaij youq gwnz bo seiq mbiengj, miz sang miz daemq, gak miz daegsaek, gag baenz cungj gingj yinzvwnz daegbied ndeu.

Yayiz Cunh Yauzcuz beixnuengx gaenxhong simsoh, simhoengz simndei, rox eu fwen gyaez diuq foux, youq gwnz bya sang ndaw lueg gvaq saedceij daih dem daih, dawz faenh sim baiqfug swyenz caeuq gij dingqnyi yawjraen ndaw saedceij、guhhong daengj haenx yungzhab haeuj ndaw fwen foux caeuq hozdung gvaq ciet bae, gyoebbaenz le gij vwnzva minzsug conzdungj lai cungj lai yiengh, fwen Vahyauz、“haq gwiz、haqsau” conzdungj aeuyah baehaq sibgvenq fungsug Yayiz gaenq ndaej lied haeuj Vuzcouh Si feih vuzciz vwnzva yizcanj mingzloeg. Byaij haeuj Yayiz Cunh, mwngz ndaej dingqnyi yawjraen fwen Buenzvuengz、foux Buenzvuengz dakdaiq miz saedceij gyaeundei、cingzgamj vuenyungz、haeux ndaej fungsou haenx; yawjraen gij buhvaq diuzvunj Yauzcuz aeu hoengz、ndaem guh saekdaej, doenggvaq seuj、siuq、daemj、san daengj dinfwngz giujmiuq mehmbwk dahsau Yauzcuz guh baenz haenx baenzlai ndeiyawj hamz miz gij yisuz laeglwd haenx, caemh ndaej yawjraen gij aeuyah baehaq Yauzcuz “haqgwiz haqsau” daegbied de, ndaej cimz gwn ngaiz mbokcuk、ceizndek daengj conzdungj gijgwn haekfeih, hawj mwngz gvaq ngoenzgyaj cwxcaih angqyangz ndeu.

Daj bi’gyai gvaqdaeuj, Yayiz Yauzcuz Yangh giethab cauxguh “Mbanjyauz gyaeundei” seiq singgaep swnghdai lijyouzgih, youq Yayiz Cunh Mbanjswgiz、Mbanjgorungz、Mbanjluzcai、Gaiyayiz haiguh le gaij roen gaij raemx gunghcwngz, coih bae rog ciengz aenranz ndaw mbanj moqsag, guh gingjyawj doenghva henz hamqdah caeuq gorungz geq vwnzva gunghyenz daengj, hawj Mbanjyauz engq gyaeundei, yinx hekyouz bae yawjngonz youzcet engq lai.