——Geiq Vujsenh Yen Dungzlingj Cin Cungsim Hagdangz Lauxsae Veiz Feihfeih

De dwg boux lauxsae Sawcuengh Vahcuengh hagdangz Cuengh Gun song saw vah ngamq guhhong bi ndeu, dahsau ngamq ndaej ngeihcib lai bi ndeu.

Ndwen 5 ngoenz 26, gicej bae caijfangj de——Veiz Feihfeih boux lauxsae Vujsenh Yen Dungzlingj Cin Cungsim Hagdangz.

Ngamq sawq bakmid: Myokngaeux ngamq loh gok soemsoem

Ndwen 5 ngoenz 25 daengz ngoenz 26, aen hozdung yienhciengz yawjhag Cuengh Gun song saw vah sonhag daengx gih youq Vujsenh Yen banh, 170 lai boux boux sonhag yenzgiu Cuengh Gun song saw vah、lauxsae Sawcuengh Vahcuengh daj Vujmingz、Sanglinz、Dwzbauj、Denh- dwngj daengj 25 aen yienh（si、gih）daeuj haenx yienhciengz yawjhag, lij miz lauxhangz son’gyauq hix daengz dieg dingqgoq, aen ciengzmienh hung baenzneix, lingjdauj hagdangz hawj Veiz Feihfeih dahsau ngamq hwnj gangjvei youh giep gingniemh neix “hwnj daiz oknaj”.

Veiz Feihfeih dwg hwnj goq Sawcuengh Vahcuengh《Beij Coeng- mingz》, neiyungz cujyau dwg gangj duzdouq coengmingz ndeu yungh gij dungxcaiz bonjfaenh dwkhingz duzguk yakrwix ndeu. Dangzgoq hwnj sat, gyoengq lauxhangz caeuq lauxsae yawjhag youq mwh bingz dangzgoq faenfaen doiq dangzgoq Veiz lauxsae bingzgyaq gig sang:

“Lauxsae oiq ngamq guhhong bi ndeu, najdoiq aen ciengzmienh hung baenzneix, hwnjdangz gvenqsug、gangjvah raeuzrwd, saw hwzbanj guh ndaej ndei……ndaej baijok hawj caezgya, vanzlij guh ndaej gig ndei, daejyienh le Veiz lauxsae miz goeng- daej sonhag Sawcuengh Vahcuengh gig maenhsaed.”

Senj hag Sawcuengh: Roengzrengz buekguh cij ndaej baenz

Bi 2016 ndwen 6 ngoenz 22 banhaemh, ndaw lijdangz yaugih Cangzgangh Guengjsae Swhfan Yoz- yen, bizyez vanjvei ban Cuengh Gun song saw vah ciennieb siujyoz gyauyuz gaiq daeuz Guengjsae youq gizneix hoenghhwd banh.

Gwnz daizheiq, mwh biujyienj diuqfoux《Mauhcuk Va Vuenyungz》, buenx yaem’wenq angqyangz, cij raen gyoengq lwgsau ndang daenj buhvaq minzcuz gyaeundei riengjret diuqfoux, gyoengqde bouxboux cungj riunyum- nyum lumj dujva nei, yienghfoux gyaeundei, cingsaenz gvaekgvaek, bouxyawj cungj bekfwngz haenhhuhu.

“Baez vanjvei haenx ndei lai lo. Gou couhdwg bouxyienj diuqfoux ndaw《Mauhcuk Va Vuenyungz》ndeu.” Mwh Veiz Feihfeih lwnhgangj bizyez vanjveiz, gwnz naj de cungj dwg vuenheij caeuq louzlienh.

Veiz Feihfeih naeuz, dangguh hagseng gaiq daeuz conhgoh siujyoz gyauyuz (Cuengh Gun song saw vah fuengyiengq) ciennieb Guengjsae, gyoengqde bi 2014 haeujhag, bi 2016 ndwen 7 bizyez. Aen ciennieb neix hag 2 bi, vih hagdangz Cuengh Gun song saw vah dinghyiengq gungganq song saw vah swhfanswngh, song saw vah swhfanswngh ciuaeu haenx haeuj- hag gaxgonq aeu ciemdingh《Mbawsaw Hezyi Dajveh Dinghyiengq Gungganq Lauxsae Cuengh Gun Song Saw Vah Siujyoz Guengjsae》, bizyez le bae siujyoz Cuengh Gun song saw vah roxnaeuz gizdieg sonhag hezyi dingh- yiengq faenboiq yanghcin haenx guh Cuengh Gun song saw vah siujyoz sonhag 8 bi doxhwnj.

Seizneix, 78 boux hagseng bizyez ban Cuengh Gun song saw vah gaiq daeuz gaenq bae siujyoz Cuengh Gun song saw vah roxnaeuz gizdieg sonhag hezyi dinghyiengq faenboiq yanghcin haenx, dang lauxsae son Cuengh Gun song saw vah, vih saehnieb gyauyuz Cuengh Gun song saw vah Guengjsae ok rengz ok dungxcaiz.

Yaengx geiz hwnj din: Swnh rumz buq langh cungj miz seiz

Veiz Feihfeih daengz Vujsenh Yen Dungzlingj Cin Cungsim Hagdangz dang lauxsae Sawcuengh Vacuengh le, lingjdauj caeuq lauxsae geq Sawcuengh Vahcuengh ndaw hagdangz doiq de haeujsim dangqmaz, gujli de ansim guhhong, caemhcaiq maqmuengh de majhung riengjvaiq. Veiz Feihfeih naeuz, doeklaeng miz gienh saeh ndeu, hawj de doiq guh ndei lauxsae Sawcuengh Vahcuengh miz le nyinhrox engq laegdaeuq.

Ngoenzde, mwh de hwnj dangz Sawcuengh ndeu, raemqrwnq raen vah daih’it hagseng ndaw ban miz di bienq lo——Gaenh bi neix daeuj, vunz okrog dajgoeng gyalai, miz mbangj bohranz daiq lwgnyez daj iq couh okrog gvaq ndwenngoenz, youq diegrog cungj gangj Vahbujdungh, daengz seiz hwnj hagdangz cij soengq lwgnyez dauq mbanjranz hwnjhag, gvaiqndaej lwgnyez baenzneix mbouj rox gangj Vahcuengh lo.

“Cuengh Gun song saw vah sonhag, gaenq hwnj sang daengz swnjcienz vwnzva minzcuz!”Veiz Feihfeih naeuz, seizneix de cij laeg- daeuq roxnyinh daengz gij yiyi youqgaenj Cuengh Gun song saw vah sonhag, raemqrwnq roxnyinh diuzrap gwnz mbaq naekgywggywg.

“Bi’ndwen oiq couh wnggai lai hag.” Veiz Feihfeih gangj daengz gij ginglig hagsib majhung de bi ndeu daeuj: Gagrox caeuq lauxsae miz gingniemh hag. Caemhcaiq leihyungh vangjdoxlienz ciengzseiz caeuq doengzhag gak dieg youq gwnz muengx doxgyau gingniemh sonhag, aeu gij ndei bouj gij rwix, doxcaez cinbu.

Gangj daengz coglaeng, Veiz Feihfeih naeuz Cuengh Gun song saw vah sonhag yied daeuj yied ndaej daengz yawjnaek, ndigah de doiq daengzcog gig miz saenqsim. De naeuz, yaek ndeindei insik aen guhhong gangjvei neix, mboujduenh daezswng suijbingz cihsiz caeuq naengzlig sonhag bonjfaenh, ceng’aeu vaiqdi bienqbaenz boux caixhangz Cuengh Gun song saw vah sonhag.