Bonjbauq siusik(gicej Cau Dwzfeih) 6 nyied 20 hauh banhaemh, aen bizyez vanjvei ban Cuengh Gun song saw vah siujyoz gyauyuz ciennieb gaiq daihngeih Guengjsae youq Guengjsae Swhfan Yozyen Cangz- gangh yaugih banh. Swcigih Minz- yijveij fucujyin Yi Siz, Guengjsae Swhfan Yozyen fudinghgiz diuyenz- yenz Cangz Ginhswng, Swcigih Gyauyuzdingh Minzcuz Gyauyuzcu cucangj Veiz Lanzmingz, Guengjsae Swhfan Yozyen Codaengj Gyauyuz Yozyen suhgi Bungz Yinghbyauh、yencangj Couh Sinzdungh daengj bouxdaeuz camgya caemhcaiq yawj le bizyez vanjvei.

Gwnz vanjvei, Yi Siz cukhoh hagseng ban Cuengh Gun song saw vah gaiq daihngeih hag liux bizyez, de naeuz, gaenh geij bi neix daeuj, Guengjsae Swhfan Yozyen gaenx- maenx gvancez doeksaed gij anbaiz cunghyangh caeuq swcigih, yawjnaek hong son’gyauq vunzcaiz lauxsae Cuengh Gun, aeundaej cingzcik ndei ndaej vunzbiengz haenh. De muengh gyoengq hagseng ban Cuengh Gun song saw vah guhhong le, laebdaeb gyagiengz hagsib, mboujduenh buek- guh damqra, vih hong son’gyauq Cuengh Gun song saw vah gih raeuz okrengz.

Veiz Lanzmingz muengh gyoengq hagseng yaek bae gak dieg guh hong son’gyauq Cuengh Gun song saw vah haenx ndeindei guhhong: Giendingh saenqsim、mbouj lumz aensim codaeuz, giendingh gij saenqsim caeuq gietsim guh hong son’gyauq Cuengh Gun song saw vah; laebdaeb hagsib, mboujduenh hag gij ciennieb cihsiz Sawcuengh Vah- cuengh, aeu giekdaej dwk ndaej engq maenh bae; gaemdawz gij bonj- saeh saedhengz sonhag, cugyamq aeu bonjfaenh gungganq baenz “lauxsae ndei seiq miz”, vih gyauyuz saehnieb dieg minzcuz okrengz.

Bizyez vanjvei faen baenz sam aen biencieng: Doxcomz siujgyauq·cingsaenz gvaekgvaek、lwglan Boux- cuengh·caiz lai naengzganq、Fwen- cuengh goksa·ciengqyiengj daengz- cog. Mwh vanjvei, hagseng ban neix doenggvaq eu fwen、 diuq foux Boux- cuengh、 yienj siujbinj Vahcuengh daengj hingzsik, langhbaij gij yiengh ndei caeuq cingsaenz gvaekgvaek gyoengqde, hix langhbaij le gij cing- saenz lauxsae bwhlaeng Cuengh Gun song saw vah buekguh doxhwnj.

Doih Fwencuengh daj aen Yozvei Fwen Guengjsae daeuj haenx hix daeuj daengz yienhciengz hwnj daiz eu fwen hoh gyoengq hagseng bizyez angqyangz, ndaej daengz yienhciengz bouxyawj bekfwngz haenhndei.

Gyoengq hagseng ban neix yaek lizhai hagdangz, byaij hwnj aen gangjvei son’gyauq Sawcuengh Vahcuengh, yungh gij saedsaeh hengzdoengh gyoengqde yiengq hagdangz bonjfaenh cwngmingz bonjsaeh bonjfaenh.