Ndwencieng, Bouxlongj hai aen faengx daih’it seiz, haengjdingh aeu gij rongfaengx cug hwnj diuz saeu bae. Gij byaimbaw rongfaengx coh gwnz, goekmbaw coh laj. Aeu gij cag cug faengx daeuj cug gij rongfaengx youq gwnz saeu, aeu cug ndaet, mbouj hawj gij rongfaengx gyod roengz roxnaeuz doek roengz. Baenzneix guh dwg vunzlai maqmuengh daengz haicin seiz, ndaem haeuxyangz go maengh lumj diuzsaeu, yienghneix gij faek doxwngq hix hung, daengz seizcou couh ndaej demsou.

Cieng co’ngeih haet yaek rongh, Bouxlongj ranzranz cungj dawz faengx cug hwnj fagcae、fagguek caeuq fagcanj, roxnaeuz cuengq roengz loz daengj doenghgij hongdawz. Youq gwnz gij ceh haeuxyangz coemh geij mbaw ceijcienz, yunghsim bae caeq, yienh’ok gij gingqeiq caeuq aeueiq doiq gij hongdawz caeuq gij ceh, maqmuengh bineix haicin ndaem ndei gomiuz, seizcou aeu ndaej demsou.

Gvaq cieng le hai cae roengz ceh aeu hawj goengdauh ra ngoenzndei, daengz ngoenzhaenx cij ndaem, caemhcaiq ranz goengdauh sien ndaem, bouxwnq caiq ndaem.

Moix bi seizcou sou doenghgo le, Bouxlongj couh gvej gij rum ndaw reih seuq caiq coemh cingh, cae reih dak namh. Yaek daeh bwnh seiz hix aeu hawj goengdauh ra ngoenzndei gonq, daengz ngoenzhaenx cij daeh, caemhcaiq hix dwg ranz goengdauh sien daeh bwnh, bouxwnq caiq daeh.

Gij fungsug neix swnj daengz seizneix, Bouxlongj vanzlij lumj ciuhgonq nei guh.