Dieb daengz ban bi’ndwen neix, gou dauqfanj maij dauqngeix gij saeh yinx mwh lij iq. Yienznaeuz saedceij mwhde lij dwg gungzhoj, hoeng, gaeb roeg、ep bya、ra makndoi doenghgij saeh yinx neix hawj gou mwh lwgnyez gvaq ndaej gig miz yiyi. Ndawde, yawj denyingj youq gyangdien cuengq dwg gienh saeh ceiq gvaqyinx、ceiq vuenyungz ndeu.

Sijgij gonq 70 nienzdaih, ranz- mbanj gou lij dwg faen baenz song aen siujdui, baengh bohmeh bae ciengj goengfaen daeuj ciengx ranz. Mwh- haenx ra gijgwn gig nanz, engq mbouj yungh gangj maz cingsaenz swnghhoz lo. Ndigah, yawj denyingj dwg gienh saeh hawj vunzmbanj ceiq angqyangz ndeu, baez ndaej yawj lumj gvaq cieng nei nauhyied bw!

Seizhaenx cuengqingj denyingj dwg aen mbanj doxlwnz cuengq, gek yaek baenz ndwen couh lwnz daengz lo. Itbuen dwg youq gyangdien dieg haemq gvangqlangh cuengqingj denyingj. Mbanj gou couhdwg guding youq dieg siujdui caez dak haeux cuengqingj. Geiqndaej mwhhaenx aen siusik mbanj lawz cuengqingj denyingj cienz ndaej ceiq vaiq, byawz sien rox aen siusik neix hix ceiq ndaengmoj. Dou ceiq boiqfug boh’au youq siuj- maibu dadui gai huq lo, aenvih mbaw rwz de ceiq singj, hop henz cib leix gyae miz gyawz cuengq denyingj de cungj rox. Couhdwg aen yenzyinh neix, bang lwgnyez dou ceiq maij bae siujmaibu dadui guhcaemz, cungj maqmuengh daj aen bak de rox mbanj lawz miz denyingj cuengq.

Bae mbanjwnq yawj denyingj aeu gap doih bae, caemhcaiq aeu bae ndaej caeux, lij aeu riengz ndang daiq aen dendungz dem. Haemhlawz gou ganj mbouj hwnj gwn haeux, couh rox bwh ndei daeh haeuxdaeqlang ndeu, doq byaij doq gwn, mbouj nguh bae yawj denyingj! Danghyenz, bae mbanjwnq yawj denyingj dieg ndei ciengxlwenx lwnz mbouj daengz mwngz, ndaej miz dieg ndwn couh baenz lo, saek baez lij aeu benz byai canz roxnaeuz diegdangz cij ndaej yawj dem! Danghnaeuz saedcaih mbouj miz dieg yawj, hix mbouj youqgaenj, goj bae mbaw muq baihlaeng yawj dauqfanj. Gizsaed yawj doxfanj ciuqyiengh miz yinxdaeuz, cij mbouj gvaq baihnaj yawj dwg baihgvaz dawz cungq, baihlaeng yawj couh bienqbaenz baihswix dawz ndwi!

Daengz ngoenz daihngeih, byawz mbouj ndaej caemh bae yawj, couh rox cam gyoengqvunz haemhlwenz bae yawj, cam denyingj yienj maz、ndei mbouj ndei yawj daengj vwndiz. Boux ndaej yawj haenx couh daj nduj daengz byai lwnh okdaeuj, caemhcaiq lij dik din loengh fwngz, ciuq gij dungcoz ndaw denyingj yienj okdaeuj, caezgya youq henz vuenheij dangqmaz!

Haemhlawz lwnz daengz mbanj gou cuengq denyingj, gyoengq lwgnyez ndaw mbanj couh bienq ndaej daegbied angqyangz youh dingqgangj, ganjvaiq guh sat gij hongranz bouxlaux daengq guh, coi bohmeh cawj haeux caeux di. Vah youh gangj doxdauq, haemhhaenx ceiq ndei dwg cawj haeuxam, gwn haeuxcuk rox ok nyouh lai. Byaij ok ndaw ciengz bae ok nyouh youh byaij dauq, cungj dangj bouxwnq yawj, geij baez roengzdaeuj, haengjdingh deng vunz caengz. Caiqlij danghnaeuz mbouj ndaej yawj gij giz cingcaij, hix mbouj ndaej dauqbae caiq yawj lo.

Daengngoenz ngamq doek baihsae, gyoengq lwgnyez couh gig caeux gwn haeux sat, bouxboux ram daiz gwed daengq bae hah dieg lo. mizmbangj mbouj miz rengz ram daiz gwed daengq, couh sien dawz gyoqmij bae veh dieg. Dou lij doxceng bae bangfwngz boux cuengq denyingj gang mbawmuq、baij daiz、baij daengq daengjdaengj, baenzneix de couh ndaej caeux di cuengq denyingj. Ciepdwk couhdwg maqmuengh mbwn laep vaiq di. Aen lahbah gauhyinh sing hung dwk cuengq gij go gwzming, lumjnaeuz daegdingh coi vunzmbanj: Vaiq di daeuj lo, yaek cuengq denyingj lo! Mbwn menhmenh laep roengzdaeuj, vunzlai hix coh dieg dak haeux siujdui gyonj gvaqdaeuj, youh lwnz daengz vunz mbanjwnq deng ndwn baihlaeng vunz mbanj dou roxnaeuz laeng muq yawj lo.

Baez ingj denyingj, caezgya rox gag caemdingh roengzdaeuj, song da mbouj yaep baez ndeu dwk cimyawj mbawmuq……

Yawj denyingj youq gyangdien cuengq ceiq lau song yiengh: Yiengh ndeu dwg lau fwn doek, baez doek fwn couh miz vunz daenj gyaep gang liengj, gig yingjyangj boux baihlaeng yawj, danghnaeuz rumz hung dem, mbaw muq cuengq denyingj hix deng baet mbin deuz, neix couh youqgaenj lo; lingh yiengh dwg lau dingz dienh, saek baez yawj ndaej cingq mizyinx seiz, fwt dingz dienh, aeu fazdengih daeuj fat dienh laebdaeb cuengq denyingj, hoeng saekseiz fazdengih daj mbouj hwnj roxnaeuz youz mbouj gaeuq, neix couh doeknaiq lai lo.

Mwhhaenx gij daezcaiz denyingj cujyau miz daeuq dicuj caeuq hoenxciengq. Mbouj yungh gangj, lwgnyez ceiq maij yawj gij denyingj hoenxciengq lo, gij denyingj neix hawj dou yawj geij lai baez cungj mbouj rox mbwq. Seizhaenx bouxvunz swhsiengj caengz ndaej hailangh, danghnaeuz miz gij gingdaeuz lumj doxcup roxnaeuz doxgot couh mbouj ndaej lo! Geiqndaej miz aen denyingj heuhguh《Daihbet Aen Dwg Siengqdoengz》, ndawde miz aen gingqdaeuz dwg boux youzgizduiyenz ndeu aeu bae hoenx- ciengq, de aemq cungq yaek ok dou seiz, fwt cienq ndang cup mehyah de mbat ndeu. Cuengq daengz gizneix, sikhaek deng dadui cihsuh fwngz goemq aen gingdaeuz mbouj hawj yawj, naeuz neix dwg nywjdoeg, yawj lai vunz bienq vaih. Seizneix ngeix- dauq caen ndeiriu ha!

Lij iq yawj gij denyingj neix ndaej daengz gwzming gyauyuz gig hunglaeg, hawj dou ndiepgyaez guek- coj caeuq lwgminz, doiq gij vunzyak vunzrwix haeb heuj haeb faenz, gag aeu gij vunz doiq guekgya、doiq lwgminz miz gungyen guh yiengh- ndei. Vanzlij rox ngoenzneix Cung- guek moq ndaej laeb hwnjdaeuj gig mbouj yungzheih, dwg yungh gij lwed ciencien fanhfanh boux gwzming lezsw cij vuenh ndaej ha!

Ngoenzneix gangj daengz yawj denyingj, vunz ciuhneix roxnyinh dwg gienh saeh gig bingzciengz ndeu, aenvih miz gij densidaiz cuengq denyingj, gwnz vangj youh ndaej yawj gak cungj denyingj, vanzlij miz yendenyingj dem. Hoeng, gou doiq gij denyingj ciuhneix mbouj miz maz yinxdaeuz, dauqfanj cungj ngeix- daengz seiz iq yawj denyingj gyangdien.