“Gyo’mbaiq lai, gyo’mbaiq gyoengq beixnuengx, ngoenzneix daeuj doxcomz, eu hot fwen angq coux……” Baez daengz Yizcouh, gij sing fwen Liuz Samcej couh yiengj youq henz rwz.

Yizcouh dwg diegcoj Liuz Samcej sienfwen, miz Bouxcuengh、Yauzcuz、Myauzcuz、Mulaujcuz daengj 30 lai aen minzcuz siujsoq youq gizneix comzyouq. Yizcouh Si gwnz lizsij ok miz Liuz Samcej、 Fungz Gingh daengj bouxmizmingz. Liuz Samcej dwg sienfwen youq ndaw cienznaeuz Bouxcuengh; Fungz Gingh youq Gingliz bet bi camgya dienhsawq, doeklaeng gauj ndaej canghyienz, aenvih gaxgonq de camgya yanghsawq caeuq veisawq, faenbied gauj ndaej seqyienz caeuq veiyienz, ndigah vunzlai heuh de guh “Fungz samyienz”.

Yizcouh lizsij gyaenanz, gij vwnzva ronghsag, fungcingz minzcuz siujsoq daegbied caeuq bya raemx gyaeundei, hawj gij lijyouz Yizcouh guh ndaej gig hoengh. Gij dieg mizmingz miz Mbanjliuzhoz、Gamjdahsien caeuq Byacinyenj daengj. Ndawde, Mbanjliuzhoz dwg ranzcoj Liuz Samcej sienfwen, ndawde miz gorungz hung ndeu, gaenq miz 1500 bi lo, vunz dangdieg nyinhnaeuz gorungz neix dwg gofaex sien, cienznaeuz bihaenx Liuz Samcej caeuq Govaiz couhdwg youq laj faex neix dinghcingz. Bae Mbanjliuzhoz youz, ceiq yinx vunz couhdwg caenndang camgya gij hozdung miz daegsaek minzcuz siujsoq. Doiq fwen、 dingq caijdiuh、 aemq bawx- moq、 gwn gij byaek feih ndei miz daegsaek minzcuz siujsoq daengj, hawj mwngz lumjnaeuz dauq daengz seiz Liuz Samcej youq haenx.

“Fwen mwngz yawz miz fwen gou lai, fwen gou cib fanh bet cien loz”. Vwnzva gaq daizheiq gonq, ginghci caiq daeuj ciengq heiq, daj bi 2010 hwnj, Yizcouh Si doenggvaq gawjbanh “ciet lijyouz vwnzva Liuz Samcej”, mboujduenh gyahung gij yingjyangj gij binibaiz Liuz Samcej, rengzrwd dwk doidoengh aen singz hwnjguh caeuq lijyouz hwngfat. Bi 2014, gij vwnzva hozdung youz gij cujciz gvendaengz vwnzva、gij donzdui vwnzyi roxnaeuz ginzcung guh haenx miz saek 1000 ciengz. Lumj banh baenz gij biujyienj gvendaengz “gij siengjmuengh Cung- guek gou, vwnzva haeuj fanh ranz” hozdung; youq Gingyenj Cin gawjbanh gij doxdax eufwen gvendaengz dangj raeuz ginzcung lohsienq son’gyauq saedguh caeuq hengzguh gij gyacizgvanh haedsim sevei cujyi, ndaej daengz senhconzbu swcigih dangjveij haenh. Bi 2015 banh ndei daihroek gaiq “ciet lijyouz vwnzva Liuz Samcej”, guh aen hozdung “vunz Yizcouh gangjgoj”, senj aeu gij gojgaeq gaenxmaenx baenaj、mizyinx nem miz cihsiz vunzgeq ciuhneix, gij cienznaeuz gvendaengz vunz mizmingz, gij cienznaeuz gvendaengz gij ranzcoj lengj Liuz Samcej caeuq gij gangjriuz daengj, hawj vunzlai humx dingq humx yawj. Bi 2016 daihcaet gaiq “ciet lijyouz vwnzva Liuz Samcej”, aeu fwen guh moiz、 aeu ciet gap youx, miz gij hawfwen fanh vunz、 minzcuz cunzyouz caeuq fwenvuengz ganj hawfwen daengj hozdung, yinx baenz fanh boux vunz humx yawj, aen gvangjcangz vunz lai vunz daih, cungfaen baijok gij gyaeundei Yizcouh.

Daengz seizneix, “ciet lijyouz vwnzva Liuz Samcej” moix bi guh baez ndeu gaenq baenz gvenqlaeh, hix baenz aen binjbaiz mizmingz ndeu lo. Gij gingj gyaeundei caeuq fungcingz naekgywg Yizcouh gaenq byaij haeuj ndaw lwgda ndaw sim bouxyouz bae, gij fwen Liuz Samcej eu ndaej baenz cien bi haenx riengz gyoengq bouxhek cienz doh gwnz- biengz, hawj engq lai beksingq cingqcaen ndaej yiengjsouh daengz gij cwngzgoj vwnzva lijyouz hwngfat.