Mbanjleihcei miz daegmbauq ndeu heuhguh Daegsang, 24 bi seiz dayoz bizyez. Bihaenx, de gaenq miz 1.85 mij sang, ndang naek 170 lai gaen, bouxvunz gig mbauqndei, hoeng de caengz ra ndaej youx.

Densidaiz miz aen cezmuz he“Bang sau ra gvan, bang mbauq ra yah”. Miz ngoenz he, Daegsang bae Densidaiz gouz bang ra yah.

Haemh ndeu, Daegsang hwnj aen cezmuz neix. Youq gwnz daizheiq, miz 16 boux dahsau ndwn youq, gyoengqde gyaeundei caemhcaiq naj hau, lij oiq, hawj gyoengq bouxsai yawj ndaej da hix mbouj yaep. Doeklaeng, youq ndaw rongh caetsaek、sing go、sing bekfwngz, Daegsang caeuq dahsau ndeu gaemfwngz, cij caj Daegsang doengzeiq, songde couh ndaej guh gvanbaz lo. Byawz hix ngeix mbouj daengz, Daegsang sawqmwh cuengq fwngz byaij deuz. Dah haenx ca di lae raemxda, doeklaeng hix lizhai lo. Daegsang gig ienqhoij mbouj ndaej youq gwnz daiz caiq senj aeu boux dahsau wnq.

Miz vunz cam de vihmaz mbouj aeu dah haenx guh yah. De naeuz:“De guh canghyw, hwnzngoenz aeu hwnjban, ngoenzgyaj mbouj dingh, caiq naeuz gyoengqde ngoenz youq yihyen, miz maz binghdoeg……”

Doeklaeng, aenvih Daegsang senj maex sang mbouj aeu, daemq mbouj eiq, bineix de gaenq 35 bi lo, lij dwg dandog gag gvaq saedceij.

Miz ngoenz he, Daegsang caeuq baengzyoux bae aen mbanj ndaw rungh ndeu. Gyoengqde youq rog mbanj bin gwnz faexmak bae mbaet mak gwn. Daegsang mbouj siujsim daj gwnz faex doek roengzdaeuj, gyaeuj sieng fwngz goenx maez gvaqbae lo. Haep ndaej geij boux doengzdoih naj bienq heu caez, gipmuengz hawj de ninz youq gwnz doi haz. Yaep he, Daegsang singj gvaqdaeuj lo, in ndaej gyangz mbouj dingz. Miz boux he nyaij mbaw go’ngaih daeuj oep giz oklwed de, naeuz:“Fwngz goenx beng ndok- hoh fukvih couh ndei lo, seizneix lau ukgyaeuj sieng naek…… Miz dah canghyw he daeuj ranz Lauxlij mbanj raeuz. Raeuz sien dawz Daegsang baema ndaw mbanj, caiq bae heuh de daeuj yw. Naengh de yw mbouj ndaej, raeuz menh ram Daegsang bae yihyen. Hai, mbanj neix youh caengz doeng ci……”

Daegsang singj gvaqdaeuj seiz cingq ninz youq gwnz mbonq, itcig gyangz mbouj dingz. Dah canghyw haenx daeuj yawj de le, couh heuh boux vunz he daeuj beng fwngz de. Boux vunz neix beng mbat ndeu, Daegsang couh sing hung swenj hwnj- daeuj:“Haiyo! Meh ha, in lai a!” Dah canghyw haenx riu naeuz:“Mbouj lau, nyaenx di, beng geij mbat couh ndei.” Hoeng geij bouxcoz lwnz bae beng, lij caengz beng deng, Daegsang in ndaej yaek dai, raemxda hix lae mbouj dingz. Dah canghyw youh danq naeuz:“Sou mbouj rox beng, hawj gou daeuj!” De dawz gen Daegsang hwnj- daeuj, ndwn ndei, yungh rengz beng mbat he, ndok caed couh fukvih lo. Ciepdwk de hai sieng dawz yw okdaeuj bang Daegsang oep giz sieng, youh bang Daegsang dajcim, Daegsang youh swenj hwnjdaeuj lo. Dah canghyw youh riu naeuz:“Mwngz raen dai caengz? Mwngz yiemz canghyw, mbouj aeu canghyw guh yah, lau canghyw daiq binghlah lah mwngz. Mbatneix mbouj miz gou, caj ram mwngz bae daengz yihyen, mwngz daisieng lo……” Daegsang nyaenx in cengq da baez yawj, sau neix cingq dwg youq gwnz cezmuz caeuq de gaemfwngz haenx. De naj gig mong laep song da hwnjdaeuj, mbouj gamj yawj sau neix, cij ajbak itcig gangj docih.

Doeklaeng, Daegsang sieng ndei lo, couh dawz doxgaiq bae docih dah canghyw haenx, lij gouz de haq hawj swhgeij. Dah haenx mbouj aeu huq Daegsang soengq, riunyumj naeuz:“Ceiz lo. Mwngz yawj gou lij lumj dahsau lwi? Daeglwg gou gaenq doeg it nienzgaep lo……”

Caiq doeklaeng, boux canghyw neix guh moiz, Daegsang caeuq dah canghyw ndeu doxaeu lo.