Ndawranz Daegyit mbouj daiq miz ngaenz, bohmeh bi daengz byai cungj youq baihrog dajgoeng ra ngaenz, de daj seiz iq couh riengz daxgoeng youq. Daxgoeng gig gyaez Daegyit, Daegyit siengj aeu maz, daxgoeng cungj caenhliengh aeu hawj de, bohmeh mbouj ndaej youq ranz son’gyauq de, menhmenh de couh bienq ndaej manz dangqmaz.

Daxgoeng nyinhnaeuz lwgsai miz di manz dwg saeh cingqciengz, couh mbouj siengj guenj de baenzlai, cungj euq naeuz:“Vunz dwg lwgnyez maj, swhgvah duengh couh duengh, goeng- laux yawz bae guenj, neix mbouj suenq gijmaz.” Hoeng, Daegyit bae daengz hagdangz, couh guh daeuz guh ciengq, yawjraen doengzhag miz doxgaiq ndei, couh bae ciengj aeu. Miz baez ndeu de ciengj doengzhag mbouj hawj, de couh moeb vunz. Boux doengzhag deng moeb haenx bae lwnh hawj lauxsae nyi, lauxsae hoznyap raixcaix, sikhaek heuh cawjranz Daegyit daeuj hagdangz. Hoeng bohmeh de youq baihrog gyae- gyanggyang, daeuj mbouj ndaej, daxgoeng de couh daeuj lo. Aenvih daxgoeng gyaez lan lai, daeuj daengz hagdangz hix mbouj sij ndaej ndaq Daegyit, cij dwg caeuq lauxsae naeuz daengz ranz itdingh menhmenh gyauyuz Daegyit. Ngoenz daihngeih cuengqhag le Daegyit youh bae hoenx boux doengzhag haenx, naeuz de mbouj hawj doxgaiq deng moeb lij bae lwnh hawj lauxsae, boux doengzhag haenx deng hoenx ndaej daejnga’nga.

Doeklaeng, Daegyit mbouj cij youq hagdangz hangzhaep doengzhag, lij caeuq gij vunz mbouj sam mbouj seiq gwnz sevei gyonj guhdoih, caen dwg heiq haeu doxdoengz.

Bihaenx, Daegyit cuhcungh biz- yez, cunghgauj cingzcik mbouj ndei, gauj mbouj hwnj gauhcungh. De hix mbouj nyienh laebdaeb doegsaw lo, couh ngeix ok rog bae dajgoeng.

Codaeuz, Daegyit bae ra bohmeh, maqmuengh bohmeh bang de ra faenh hong ndeu. Hoeng daxboh de dingq de baenzneix gangj, sikhaek ndaq de, naeuz de mbouj rox saeh, heuh de dauqbae doegsaw. Daegyit dailix mbouj ei, seizhaenx couh hemq naeuz:“Gou mbouj dauqbae doegsaw, mwngz mbouj bang gou couh suenq lo, gou gag bae ra!” Yienzhaeuh de couh hozgaek deuz lo.

Hoeng seizhaenx Daegyit lij caengz rim 18 bi, caemhcaiq ngamq cuhcungh bizyez, gyawz aeu de guh hong? De seiqlengq gwq cuenq gwq byaij, ra doh daengx singz, gij ngaenz gwnz ndang da yawj couh yaek yungh caenh lo. Doeklaeng cungjsuenq miz aen gunghcangj raen mbouj ndaej daengngoenz ndeu nyienh soulouz de. Yienznaeuz ngaenzhong noix, danh- seih vihliux gwn haeux, de mbouj ndaej mbouj ngaem gyaeuj roengz- daeuj guh hong. De ngeix ha, camhseiz guh faenh hong neix gonq, gvaqlaeng caiq menhmenh ra faenh hong ndei di.

Daegyit couh baenzneix youq ndaw singz guh hong lo. Geij bi roengzdaeuj, de hix vuenh le geij faenh hong, ngaenzhong hix ciemh- ciemh lai ndaej di. Seizneix Daegyit hix rox daxboh bihaenx vih maz yaek gyaep de dauqbae doegsaw lo.

Doeklaeng, Daegyit ra ndaej youx, mbouj geij nanz couh doxaeu lo. Yah de hix youq ndaw cangj guh hong, songde mbouj miz naengzlig youq ndaw singz ciengx lwg, cijndaej dawz lwg ma ranzcoj. Seizhaenx bohmeh de gaenq laux lo, mbouj caiq youq baihrog gai rengz guh hong, dauqbae ranzmbanj dawz lan. Daegyit bi daengz byai ngamq ndaej raen lwg de geij baez.

Bohmeh youq ranz baenzlawz daiq lwg Daegyit mbouj rox, moix baez dwk denva ma cam lwg baenzlawz yiengh, dingqnaeuz lwg ndangdaej ndei couh cuengqsim guh hong lo. Hoeng de mbouj rox, bohmeh de hix gyaez lan dangqmaz, couh lumj doenghbaez de lij iq daxgoeng de gyaez de yienghhaenx.

Bi doek bi, gij ngaenz dajgoeng ndaej hix yungh sai lo, gaeuq gwn gaeuq daenj, suenq mbouj hwnj miz ngaenz, mbouj rox mbouj nyinh cib geij bi baez yaep da couh gvaqbae lo.

Sawqmwh miz baez ndeu, Daegyit ngamq dauqma daengz bakdou ranz- coj, yawjraen lwg de riuj daehbaufug youq gizhaenx caj de, faj naj caen lumj doenghbaez de lij coz, gangj gij vah caemh lumj:“Daxboh, gou mbouj siengj doegsaw lo, bang gou ra faenh hong guh ba!” Seizhaenx lwg de ngamqngamq cuhcungh bizyez.

Couh lumj aen gien ndeu, geijcib bi gvaqbae le, seizgan youh lwnz doxdauq daengz seiz de lij oiq. Caen dwg:

Gwnzbiengz lwg lumj boh,

Lajmbanj hoj guh gwn,

Baenq gien gvaq seiqvunz,

Byongh ciuh lwnz doxdauq.